Mark 15

Yesu 'ina yatala Pailato matana

(Madiu 27:1-2, 11-14; Luke 23:1-5; Yoni 18:28-38)

Gona 'i'adaleya ma topwaoli madoudi ta babadao ta loina 'adi tohe'itao ta wete toloinao mabwaiyadi si'eto'autama, ma siloina Yesu weyahina, 'oinega nimana sipaidiya ma sitauyeya Pailato 'oina ma 'abehega Pailatoina 'iloinae.

Coinega Pailato Yesu 'ihesilaleya ma 'igwae, “Cuhepwaila, 'owa meYudiya 'idi kini, 'awa?”

Ma Yesu 'igwaeya, “Beno 'ugwae pwaiya.”

Eeta topwaoli madoudi ginaula baibaiwana weyahidi Yesu sihe'eweya. Coinega Pailato Yesu 'ihesilala hileya, 'igwae, “Togidega ta geya 'uda hemaisa? Hepwaila bewa sihehe'ewago 'uhesagoheya?”

Ma Yesu geya wete to'aha 'ida hemaiseya, 'oinega Pailato nuwana 'ihepwanopwanowa madouna.

Siloina ma Yesu 'i'amasa

(Madiu 27:15-26; Luke 23:13-25; Yoni 18:38-19:16)

Bolime 'aigeda 'aigeda Hataona Guyaina 'oidiya toloinaina 'ina mumuga beno deliyega 'aigeda loheya 'ida lihasi ma 'ilatuma, 'eguma taiya boda sihesinuweya. Tuta nage 'oina tupwadi meLoma 'adi 'alehao meYudiya deliya simiyamiya. Mwalo meYudiyaedi geya nuwadi meLoma 'idi loina, 'oinega silo'alehediya, ma 'aigeda 'oidiyega sanina Balaba 'alehaina 'alona tomota 'ilohe'amasidiya. Coinega meLomaedi Balaba ma'iyanao si'abiyahidiya ma deliya silagu luhuwediya.

Eeta boda si'eto'autama ma si'ahwanoiya Pailato 'oina, sigwaeya, “Sawasawahina ma 'aigeda loheya 'ulihasi weyahima, gide 'ima 'ahwanoi 'oiuwa 'upaipaihowa bolime 'aigeda 'aigeda 'oidiya?”

Ma Pailato 'ihegwaediya, “Nuwanuwami 'abehega meYudiya 'imi kini yalihasi weyahimi, 'awa?” 10 Weyahina Pailato 'isanapuya 'abehega topwaoli madoudi 'idi he'ipi'ipiyega si'wayamiya.

11 Ma hesi topwaoli madoudi tomota 'idi nuwatuhu sihenuwalagu pwaiyeya 'oidiya, 'oinega Yesu siguipaileya ma Balaba hesi sanina si'inaneya, ma 'abehega 'ilihasi weyahidi.

12 Ma Pailato 'ihegwaediya 'igwae, “Togidega hede yaloina 'ese tauna wabwauweya 'imi kini?”

13 Ma sitala'asona, sigwae, “Kelose 'oina tatutuhepa'i!”

14 Ma Pailato 'igwaeya, “To'aha hede 'ina pui ta 'oinega 'abehega 'amasa 'iloba?”

Ma siwuiwui 'enadi madounega, sigwae, “Kelose 'oina tatutuhepa'i.”

15 Coinega Pailato nuwanuwana ma boda 'i'abihe yaliyayaedi, ta Balaba 'ilihasiya 'oidiya, ma 'ina tolo'alehao 'iloinaediya ma Yesu gulahega sisapiya ma muliyetega 'abwa situtuhepa'ine kelose 'oina.

Tolo'alehao Yesu silotuyaneya

(Madiu 27:27-31; Yoni 19:2-3)

16 Pailato 'ina tolo'alehao Yesu sisapiya ma sitoeya 'ina hada siluhuweya, beno tolo'aleha 'idi tupwa madouna hadaina 'alona ma tolo'alehao 'idi bodao mabwaiyadi sibwau he'autedima. 17 Coinega wasawasao 'adi 'ale'o bwehabwehalinega Yesu sihe'wameya, ma debana 'ana pasa talitali 'oinega sipaihoweya ma debana silaguya.

18 Ma sihe'aleya lotuyanega siloyauwedoweya, ma sihegwaeya, “Yauwedo, 'owa meYudiya 'idi kini baa!”

19 Ma wete 'aiwe 'oinega Yesu debana sisapiya, ma si'esoheya, ta lotuyanega Yesu matana si'etuluha. 20 Cidi lotuyana 'igumwala, ta 'ale'o wasawasaedi 'oinega sihaloloya, ma 'iboi 'ana 'ale'owega sihe'ote hileya, ma sitoeya sabi gihekelose.

Yesu situtu hepa'ineya kelose 'oina

(Madiu 27:32-44; Luke 23:26-43; Yoni 19:17-27)

21 Yesu sitoeya, 'asa madouna 'oinega silatuwa, ma silobeya gwama Sailini pwatulega 'itautauyama, ta siloineya ma Yesu 'ana kelose 'i'ahali. Loheyaina sanina Saimoni, beno Alekisana ma Lupuso tamadiu.

22 Coinega sitoeya tupwa Goligota 'oina (Ma Goligota 'ana sanapu beno Mwagu 'asaina), 23 ma mulamula si'ebwaeya, beno waini* ta mulo* ba'idana, ma 'abehega geya'abwa muya madouna 'ilolotoho, ta Yesu 'iguipaileya. 24 Ma 'oinega bale'uwa situtu hepa'iyeya kelose 'oina, ma sihetoholoya. Muliyetega topaihowaowedi Yesu 'ana 'ale'o si'ewediya, eeta siguyaiyeya siboidimo 'oidiya. Cidi heguyaina gide kati 'oinega, ta 'eguma taiya 'iwini 'ana 'ale'o 'aigeda 'i'ewa.

25 Tutaina Yesu si'abihe keloseya beno gonagona 'ana gamwagamwana 'oina. 26 Ma 'ana kelose 'oina sileleya, “MeYudiya 'idi kini.” Beno 'ina 'amasa lamuna. 27 Ma wete toyagaha 'eluwa si'abihe kelosediya, 'aigeda 'ina 'ebeulega ma 'aigeda 'ina 'adigeyegeyega.

29 Tomota 'edai sitautau ma Yesu kelose 'oina si'iteya, ma silotuyaneya ma sihenameya, sigwae, “Nuwa'ole'oleu 'iya! Cugwaeya 'abehega sawasawahiu Hada He'asisi 'uligehi ma sabwelo 'etoi 'oidiya 'u'abihila. 30 Hana 'u'abihetego 'uboi ma kelose 'oinega 'usuluma.” 31 Ma wete topwaoli madoudi ta loina 'ana tohe'itao siboi 'oidiya sigwaehaneya, ma Yesu si'eheteteyeya, sigwaegwae, “Hali tomota 'ilemediya, ma hana 'iboi 'ida leme? 32 Tauna 'abehega To'abihetenaina ma tupwa Isileli 'ana toloina, hana keloseina 'oinega 'ida suluma ma tada 'ita ma 'ane tahemisae.”

Ma wete toyagahaowedi Yesu ba'idanao si'abihe kelosediya, taudi 'adi kelose 'oidiyega sibwau baleya eema siheliyeya.

Yesu 'i'amasa

(Madiu 27:45-56; Luke 23:44-49; Yoni 19:28-30)

33 Ma 'i'asudiladila pwaiya, ma tupwa mabwaiyana 'iguguyouwa 'ana siga lahilahiya. 34 Lahilahiya Yesu 'enana madounega 'ibwauwa, 'igwae, “Eloi, eloi, lama sabakitani,” ma 'ana bui, “Cigu Yehoba, 'igu Yehoba, to'aha weyahina 'u'ebesinegauwa?”

35 Ma tupwadi deina sitotoholo 'ina bwauina sihesagoheya ma sigwae, “Wahesagoha, Ilaitiya 'ibwaubwauwe.” 36 Coinega 'aigeda 'oidiyega 'ipiliya ta balou 'i'eweya, ma waini memaina 'oina 'ihebuteya, eeta 'aiwe 'aigeda matana 'ibadiyeya, ma 'i'eyoyo haneheya Yesu 'ahwana, 'itonunusiya, ma loheyaina 'igwaeya, “Tuwa tayamwayamwa, nuwana 'i'iunamo Ilaitiya 'ilatuma ma kelose 'oinega 'i'abihete.”

37 Eeta Yesu 'enana madounega 'iwuiya, ma yawasina 'igumwala.

38 Ma 'ale'oina Hada He'asisi 'ana biliupa* 'i'e'igala luweya tabwanega ma 'isuluwa duduna.

39 Ma tolo'alehao 'adi tohanugeta Yesu 'ana kelose matana 'itotoholo, Yesu 'ina 'amasa 'ana 'ita bewa gide 'i'iteya, 'oinega 'igwaeya, “Moisa tuwa, loheya nage Yehoba Natuna.”

40 Tupwadi wahiwahine wete bwagebwagega si'e'ebubuna, beno Meli Magidala ma'ina waliyesa, tauna Yosepa ma tasina 'alomauna Yemesa sinadiu, ma Salome wete, 41 taudi mwalo Yesu simuliyeya ma 'ana sipaihoweya 'ina sakowasi Galili 'oina, ma tupwadi wahiwahine wete Galili 'oinega silagama Yelusalema Yesu ba'idanao. Ma mabwaiyadi Yesu 'ina 'amasa si'e'ebubu.

Yesu sigaliheya

(Madiu 27:57-61; Luke 23:50-56; Yoni 19:38-42)

42 Ma 'ilahilahi pwaiya, beno 'atububu 'ana tuta sabwelo 'inaonaoma weyahina, beno meYudiya 'idi Sabati. 43 Coinega Alimatiya loheyaina sanina Yosepa 'inaoma, tauna ma'ana hemisa ma 'iyamwayamwa ma to tuta Yehoba bale'uwa 'ida hetoloina. Tauna Yosepaina 'inaoma ta ma'ina 'atepatu 'iluhuwa Pailato matana, ma Yesu wahina 'i'ahwanoiyeya ma 'abehega 'igalihe.

44 Ma 'oinega Pailato 'isalutuwa, 'igwae, “Ciyaa! Yesu 'i'amasa?” Coinega tolo'alehao 'adi tohanugeta 'ibwauweyama ma 'inaoma, ta Pailato 'ihesilaleya, 'igwae, “Togidega, Yesu 'i'amasa pwaiya?”

45 Ma loheyaina 'igwaeya, “Cehe, 'i'amasa pwaiya.” Coinega Pailato 'itagwala ma 'abehega Yosepa Yesu wahina 'i'ewa. 46 Ta Yosepa 'ale'o wa'ewa'e'ena 'igimwaneya, ma 'i'eweyama, ta ma'ina topaihowao Yesu wahina kelose 'oinega silagu dobiheya, ma 'ale'oina 'oinega siwaduya, muliyetega sigaliheya. Ma galihinaina yalayalaina gide duluha da'ule 'alona, eema da'ule madouna ma pwa'upwa'uwana 'oinega galihina si'ahubodeya. 47 Ma Meli Magidalaina ma 'ina waliyesa, tauna Yosese sinana ma'iyana si'e'ebubuna, ta si'iteya galihina 'oina wahinaina silaguya.

Copyright information for `BDD