Mark 3

Yesu tonima meyomeyo 'i'abihe bwebwe'aneya

(Madiu 12:9-14; Luke 6:6-11)

1Muliyetega Yesu 'ihilama hada tapwalolowa*. Nage 'oina 'aigeda loheya nima meyomeyona 'ilobeya 'imiyamiya. 2Ma Palisiyao Yesu si'e'ebubu, ma 'eguma loheya 'i'abihe bwebwe'ane Sabatiya nata sihe'ewa. 3Coinega Yesu loheyaina 'ihegwaeya, “Cutoholo 'ulagama,” ma loheyaina 'itoholowa ta 'ilaga.

4Cilagama. Yesu babadaedi 'ihegwaediya, 'igwae, “Bewa 'igu hesilala 'oimiya: To nuwatuhu bwebwe'ana 'oida? Sabati 'oina tomota talemedi, bo talohe'amasidi?” 5Ma Yesu 'i'ebubu yahiyahidiya ma'ina gamwasowala ma wete ma'ina nuwagala 'idi debapa'ala weyahina, ma loheyaina 'ihegwaeya, “Nimau 'uyasi,” ma nimanaina 'iyasi hedumwaluya ma 'ibwebwe'ana.

6Coinega Palisiyao ma'idi gamwasowala silatuwa, ma Helodi 'ina boda mahetediyao siloiloina togidega Yesu silohe'amasi 'ese.

Boda Galili holaina

7Yesu 'i'ebesinediya ma'ana tomuliyaowedi sidobiya Galili holai, ma boda madouna simuliyeyama. 8Bodaedi bewa Yesu 'ina paihowao wasana sihesagoheya, ta Galiliyega ma Yudiyaega ma Yelusalemega ma Idumea tupwanega ma Yolidani hali tupwega ma wete 'asaedi Taiya ma Saidoni deidiyega si'eto'autama.

9Weyahina Yesu tolohalao 'i'abihe bwebwe'anediya, eeta tolohalaowedi baibaiwadi siheheduidui, nuwanuwadi si'abitoho, 'oinega Yesu 'ana tomuliyaowedi 'ihegwaediya, “Waga weyahigu wa'eweyama, ma 'eguma tomotaedi siheheduidui hedada, yagelu wagai.”

11Ma taiyawedi tomota hi'ahi'a 'oidiya siluhuwa, ma 'eguma Yesuina si'ita sibe'u ma si'eno talutalubu'i matana ma sibwaubwau, sigwae, “Cowa Yehoba Natuna.” 12Ma Yesu 'iloina pa'alediya, 'igwae, “Sahena wabwaubwau ma wahehepwailegau 'abehega Taugu Yehoba Natuna.”

Yesu 'ana tomuliyao site tuwelo 'ihesinuwediya

(Madiu 10:1-4; Luke 6:12-16)

13Muliyetega 'oyai 'ihaneya, ma tupwadi 'ana tomuliyaowedi 'ihesinuwediya ma 'ibwauwediya, sihanema 'oina. 14Ma 'ihegwaediya, 'igwae, “Comi wate tuwelo yahesinuwegomiya ma 'omi ba'idagwao tamiyamiya, ma muliyetega yahewasaegomi 'asa tupwadi 'oidiya, ma waguguya ma waiwai 'oinega hi'ahi'a tomota 'oidiya waulalatuhedi.”

16Ma sanidi bewa: Saimoni, tauna 'ibwauweya Pita. 17Ma wete Yemesa ma tasina Yoni, taudi Sebedi natunao, ma Yesu 'ibwauwediya Bowanage (ma Bowanage 'ana nuwasabwalena 'abehega taudi tutu gide). 18Ma wete Andulu ma Pilipi ma Batolomiu ma Madiu ma Tomasi, ma Yemesa 'ina waliyesa, tauna Alipiyo natuna, ma Tadiyasi ma Saimoni 'ina waliyesa, tauna to'ala'ohe'ohe madouna Isileli 'ina miyawasi Loma weyahina. 19Ma wete Yudasa Isakaliyota, tauna 'abwa Yesu 'itebae.

Tomudulele weyahina

(Madiu 12:22-32; Luke 11:14-23; 12:10)

20Yesu 'ihila 'asai, ma boda madouna si'autama, ma geya sowasowahina Yesu ma'ana tomuliyaowedi si'aiyawasi eema si'ai. 21Ma 'ina susuwao sihesagoheya 'abehega Yesu geya 'ida 'aiyawasiya, 'oinega sinaowa 'abehega sitoeyama, sigwaegwae, “Ciheyauyaule pwaiya.”

22Ma loina 'ana tohe'itao tupwadi Yelusalemega sidobima, ma Yesu 'ina paihowa madouna si'iteya, ma sigwae, “Loheya bewa 'ihetopaihowa weyahina welabana 'idi bada beno Tomudulele 'ilemeleme, ma tauna 'ina waiwaiyega welabanao 'ipa'ipa'idi.”

23Coinega Yesu loheloheyaowedi 'ibwauwedima ma gwae hegehegediyega 'ihe'ita 'oidiya, 'igwae, “To'aha weyahina Tomudulele 'abehega tauna 'iyanao 'ipa'idi?” 24Ma wete 'igwaeya, “Ceguma 'aigeda 'ebeloina 'oina loheloheya siwatahidi ma siboi silo'aleha hiladi, 'abwa 'ebeloinaina 'iwe'a ma 'ibe'u. 25Wete 'eguma susu 'aigeda ma siwatahi ma siboi silo'aleha hiladi, 'idi miya 'igala. 26Tomudulele wete gide, 'eguma ma'iyanao siboi silolo'aleha hiladi, 'abwa 'ina 'ebeloinaina 'ibe'u, ma 'igumwala hataya.

27“Cebe'ita 'aigeda wete loheya waiwaina, beno Tomudulele 'ina hada: Geya sowasowahina 'aigeda taiya 'iluhu tohewaiwaiina 'ina hada ma 'ina tobwatobwa 'i'ewadi, ma hesi 'eguma 'aigeda loheya gulaha 'oinega tohewaiwaiina nimana ma 'ahena 'ipai nugetedi, ee 'abwa 'iluhu 'ina hada, ma tobwatobwa 'i'ewadi.

28“Coinega bewa yahegwae bwaibwainigomi 'abehega tomota 'idi puiyao ma 'idi gwae galagala mabwaiyana Yehoba 'ida nuwasamudi, 29ma hesi 'aigeda tuwa geya, beno 'eguma taiya Yaluyaluwa Tabuna 'i'ahwa galagalae, Yehoba nata geya 'inuwanuwasam, ma bewa mumuga galanaina 'oina 'imiya hataya.”

30Bewa gide Yesu 'igwae 'esa weyahina sigwaegwae 'abehega tauna 'oina hi'ahi'a 'iluhuwa.

Yesu sinana ma tasinao 'oina sinaowa

(Madiu 12:46-50; Luke 8:19-21)

31Eema Yesu sinana ma tasinao silatuwa ma 'atamana sitoholowa, ma gwaemo sihewasaeya Yesu 'oina ma 'abehega 'ihapwesa 'oidiya. 32Ma tomotaedi Yesu deina simiyatoiya, ma sihegwaeya, “Bada, sinau ma tasimwao wa'ita latu 'atamana, nuwanuwadi 'owa.”

33Yesu 'ihegwae hilediya, “Taiya sinagu? Ma taiyawedi tasigwao?” 34Ma 'ana tomuliyaowedi deina simiyatoiya 'i'e'ebubudi, ma 'igwaeya, “Wa'ita bewa taudi sinagu ma tasigwao. 35Taiya 'owa 'eguma Yehoba 'ina nuwatuhuina 'umulimuliya, 'owa beno tasigu bo nuhugu, nuwana sinagu.”

Copyright information for `BDD