Matthew 12

Yesu tauna Sabati* 'ana toloina

(Maki 2:23-28; Luke 6:1-5)

Sabatiya Yesu ma'ana tomuliyao tanoha 'alonega sitauya, ta tomuliyaowedi sigomaleya, 'oinega witi huwaina si'abilolodiya ma si'aiya.

Ma tutaina Palisiyao si'itediya, Yesu sihegwaeya, sigwae, “Bada, togidega ma 'oinega 'a tomuliyao Sabati 'ana loina siligeligehi?”

Coinega Yesu 'idi gwae 'ihemaiseya, 'igwae, “Buki He'asisi 'oina sileleya Debida weyahina, 'eguma wahasili wasanapu 'abehega Debidaina ma'iyanao sigomaleya, ta Yehoba 'ina hada 'iluhuwa ma beledi hehe'asisina 'i'eweya ta si'aiya. Belediina ma'ana loina, 'abehega topwaolimo 'adi tagwala ma si'ai, ma hesi sigomaleya ta 'oinega tuwa si'aiya.

“Buki He'asisi 'alona loina wete 'imiyamiya 'abehega Hada He'asisi 'ana topwaoliyao Sabati 'ana loina siligehi, ma beno geya pui.

“Moisa Hada He'asisi ginaula madouna, ma hesi 'aigeda ginaula madou hedade bewa. Yehoba 'ina gwae 'abehega, ‘Pwaoli geya nuwagu, ma 'atemuyamuya hesi.’ Ceguma gwae bewa 'ana sanapu wasanapu, sahena 'agu tomuliyao wa'ahwa'ahwa galagalaedi, weyahina geya sipui.

“Weyahina Sabati 'ana toloina loheyaiguina taugu tuwa.”

Yesu loheya nima meyomeyo 'i'abi hebwebwe'aneya

(Maki 3:1-6; Luke 6:6-11)

Nage 'oinega Yesu 'itauya, ma 'idi Hada tapwalolo 'oina 'iluhuwa. 10 Ta nobwa 'aigeda loheya nima meyomeyona, 'oinega Palisiyao Yesu 'oina sihesilala, sigwaeya, “Bada, togidega, sawasawahina ma Sabati 'oina tolohala ta'abihe bwebwe'anidi?” Ma 'idi hesilalaina weyahina beno 'eguma Yesu 'igwae pui, eema sihe'ewa toloina matana. 11 Ma 'idi gwae Yesu 'ihemaiseya, 'igwae, “Togidega 'omi 'eguma 'aigeda ma'ina sipi 'aigeda tuwamo, ma sabwelo Sabati 'oina gaula 'alona 'ibe'u, 'ilobwaineya ma 'ilisi hanehe? 12 Moisa sipi ginaula 'i'iuna, ma tomota hesi ginaula madouna. Coinega sawasawahina ma paihowa bwebwe'adi Sabatiya tapaihowadi.”

13 Coinega Yesu loheyaina 'ihegwaeya, 'igwae, “Nimau 'uyasi.” Ta loheyaina nimana 'iyasiya ma 'ibwebwe'ana hila, gide wete hali nimana.

14 Ma hesi Palisiyao ma'adi gamwasowala silatuwa ma taudimo siloina togidega Yesu silohe'amasi 'ese.

Yehoba 'ina topaihowa

15 Taudi 'idi loina 'waihina Yesu 'isanapu pwaiya, 'oinega tupwa nage 'i'ebesineya ma 'itauya hali tupwa, ma tomota mabwaiyadi simuliyeya, ta nage 'oina tolohala mabwaiyadi 'i'abihe bwebwe'anediya, 16 ma wete 'ihegwaediya ma 'abehega sahena sihehepwaila dadane tomota 'oidiya. 17 Cina paihowaina bewa mwalo palopita Aiseya Yehoba 'ina gwae 'ihepwaila nugeteya, 'igwae,

18 “Wa'ita 'igu topaihowa bewa hesihesinuwaina, ma 'ateguwega yahelauweya ma'igu yaliyaya. Yaluyaluwagu yalagu 'oina ma loina dumwaludi 'ihepwailedi taudi ganamuli 'oidiya.
19 Tauna nata geya 'ihehe'ohe'ohe bo 'ihehebwaubwau bo 'asa 'alona 'igwaegwae 'asona.
20 Digona lasalasana sahena 'ilologwahate. Ma wete wodam butabutana sahena 'iuleule, ta 'ana siga tauna 'oinega loina dumwaluna 'ihewaiwai,
21 ma 'ane tauna saninega tomiya ganamuli sihemise.”

Yesu ma Tomudulele*

(Maki 3:20-30; Luke 11:14-23; 12:10)

22 Caigeda loheya, mwalo welabana 'idi paihowega matana sigibuwa, ma wete memenana 'ibuiya, 'oinega si'eweyama Yesu 'oina ta 'i'abihe bwebwe'aniya, ma sawasawahina 'igwae ma 'i'ebubuna. 23 Coinega tomota mabwaiyadi nuwadi 'ihenainaida ma sigwae, “Bewa To'abihetenaina, Debida 'ina susuwega, 'awa?”

24 Ma hesi Palisiyao paihowa bewa wasana sihesagoheya ma sigwae, “Geya, ma hesi welabanao 'iyadi sanina Tomudulele* 'ina waiwaiyega hi'ahi'a 'iula latuhediya.”

25 Ma Yesu 'idi nuwatuhu 'isanapu pwaiya ta 'ihegwaediya, 'igwae, “Tomudulele tauna 'iyanao geya sowana 'iulaula latuwedi.” Ma wete 'igwae, “Ceguma 'aigeda 'ebeloina 'oina tomota siwataha ma siboidimo silolo'aleha, 'abwa 'ebeloinaina 'iwe'a ma 'ibe'u. Casa bo susu wete gide 'eguma 'alodiya wataha 'ilatu, 'abwa siwe'a ma sibe'u.

26 “Seitani wete gide, 'eguma ma'ina bodao siboidimo silo'aleha, nata 'ina 'ebeloinaina 'ibe'u. 27 Wagwae pwaiya 'abehega taugu Tomudulele 'ina waiwaiyega hi'ahi'a yaula latuwediya, ma taiya hede 'ina waiwaiyega 'omi waulaula latuwedi? Tomudulele 'oinega, bo Yehoba 'oinega? Bewa weyahina wanuwanuwatuhu ma wasanapu 'abehega taiya taugu.

28 “Ma taugu hesi Yehoba Yaluyaluwana 'ina waiwaiyega hi'ahi'a yaula latuwediya, 'oinega wasanapu 'abehega Yehoba 'ina loina 'ilatu pwaima 'oimiya.

29 “Cebe'ita bewa loheya waiwaina gide Seitani 'ina hada. Geya sawasawahina 'aigeda taiya 'iluhu ma 'ina tobwatobwa 'ilohetuwe, ma hesi 'eguma 'aigeda loheya balaeyega tohewaiwaiina nimana ma 'ahena 'ipai nugetedi, ma 'oinega muliyetega sawasawahina 'iluhu 'ina hada ma tobwatobwaedi 'ilohetuwe.

30 “Ceguma taiyawedi taudi geya 'agu to'abihetenao, taudi 'agu 'alehao. Ma wete taudi taiyawedi geya ba'idagwao 'ada paihowa hegogona, taudi 'igu paihowa si'abi'abi hegala.

31 “Coinega bewa yahegwae bwaibwainigomi 'abehega tomota 'idi puiyao ma 'idi gwae galadi mabwaiyana Yehoba 'inuwasamudi. Beno namo 'eguma Yaluyaluwa Tabuna si'ahwa galegale, geya sowana Yehoba 'inuwasamudi.

32 “Ma 'eguma taiya 'i'ahwa galegalegau taugu Loheyaiguina, Yehoba nata gwaeina 'inuwasam, ma 'eguma taiya Yaluyaluwa Tabuna 'i'ahwa galegale gesowana Yehoba 'inuwanuwasam, tuta bewa 'oina, ma tuta sinaonaoma 'oidiya.”

Caiwe huwaidi

(Luke 6:43-45)

33 Yesu wete 'ihegwaediya, “Caiwe 'eguma 'ausalana, huwaina wete 'ausalana. Ma 'eguma 'aiwe galana, huwaina wete galana. Weyahina 'aiwe 'aigeda 'aigeda huwaidi 'oidiyega tasanasanapudi 'abehega 'aiwedi 'ausaladi bo galadi.

34 “Comi tuwa mwata natunao, 'oinega geya sawasawahina ma gwae 'ausaladi wa'inanadi, weyahina mabwaiyami togala, ma wete 'imi nuwatuhuwao to'aha gide 'atemiya simiyamiya, tuta mabwaiyana 'ahwamiyega silatulatuma. 35 Weyahina loheya 'ausalana 'atenega ginaula 'ausaladi 'ipaihowa, ma hesi loheya galana 'atenega ginaula galadi 'ipaipaihowadi.

36 “Coinega yahegwaegomi 'abehega sabwelo yatala 'oina 'omi 'imi gwae bwagabwaga mabwaiyadi weyahidi Yehoba 'ihesilalegomi, ma huhuna wahepwaile latuwedi.

37 “Ma 'owa 'ino gwaeyao tuwa 'oidiyega Yehoba 'i'ahwa bwebwe'anego, bo nuwana 'i'ahwa galegalego.”

Cila'ilala weyahina

(Maki 8:11-12; Luke 11:29-32)

38 Eeta loina 'ana tohe'itao ma tupwadi Palisiyao Yesu sihegwaeya, sigwae, “Tohe'ita, nuwanuwama ma 'ila'ilala 'aigeda 'upaihowa ma 'a'ita.”

39 Ma Yesu 'ihegwaediya, “Comi tomota 'ehaumi galami ma ganawala* huhumi, beno huhuna 'ila'ilala wa'ebe'ebesa ma 'abehega 'oidiyega wasanapu bwaibwainigau 'abehega Yehoba 'oinega yanaoma, ma hesi sahena 'ila'ilalaedi wa'ita'ita. Beno namo palopita Yona* weyahina wanuwatuhuyahi, tauna tuwa 'ila'ilala weyahimi. 40 Weyahina tauna Yonaina sabwelo 'etoi ma nihuwana 'etoi 'oidiya silahana madouna gamwana 'imiyamiya, 'abwa taugu Loheyaiguina wete gide sabwelo 'etoi ma nihuwana 'etoi 'oidiya bale'u 'alona yamiyamiya.

41 “Cabwa sabwelo yatala 'oina nata meNinibe sitoholo ma mehau 'omi sihe'ewegomi, weyahina Yona 'oidiya 'ilohatotowa ma Ninibeyedi 'idi mumuga galana 'oidiyega sinuwabuiya, ma 'omi tuta bewa lohatoto 'ausala hedade wahesagoha pwaiya ma geya wada nuwabuiya. 42 Wete gide kuini mwalo yalasi 'oinega 'inaoma Solomoni 'ina gwae sonosonogadi sabi hesagohedi, ma 'abwa sabwelo yatala 'oina kuiniina 'itoholo ma mehau 'omi 'ihe'ewegomi, weyahina tauna bwagebwagega 'inaoma Solomoni 'ina gwae sonosonogadi sabi hesagohedi, ta sauga bewa gwae sonosonoga hedadedi wahesagohediya ma 'omi geya wada nuwabuiya.

Hi'ahi'a 'ilohihila loheya 'alona

(Luke 11:24-26)

43 “Ceguma hi'ahi'a loheya 'aigeda 'oinega 'ilatu, loheya 'ibwebwe'ana, ma hi'ahi'aina nata tuwa 'atamana 'iyawayawala bwagabwaga ma 'ina 'ebe 'aiyawasi 'i'ebe'ebesa ma geya 'iloba. 44 Coinega hi'ahi'aina 'iboinamo 'oina 'igwae, ‘Nuwana yalohihila 'igu 'ebemiya nugenugetana 'oina.’ Eeta 'ihila ta 'ebemiyaina 'ilobeya hadenamo se'ise'ilina ma 'atu'atububuna. 45 Coinega 'itauya ma hi'ahi'a site sebeni wete 'itoedima ta ba'idanao siluhuwa 'ebemiyaina 'oina, ta nobwa ba'idanao simiyamiya. Eeta loheyaina 'ina miya si'abihegala bwaibwainiya, mwalo geya gide. Mehau 'omi wete gide togala ma 'imi 'ebe losaloha gala hedade.”

Yesu sinana ma tasinao

(Maki 3:31-35; Luke 8:19-21)

46 Yesu 'abwa boda 'oidiya 'ihehegwaegwae, ma sinana ma tasinao sinaoma, ma 'atamana sitotoholo, ma si'ebe'ebesa togidega ma 'oina sigwae. 47 Coinega 'aigeda loheya wasadi 'i'eweyama Yesu 'oina. 48 Ta Yesu loheyaina 'ina gwae 'ihemaiseya, 'igwae, “Taiya hede sinagu, ma taiyawedi tasigwao?” 49 Coinega 'ana tomuliyao 'oidiya 'ilonimasusuwa ma 'igwae, “Bewa taudi sinagu ma tasigwao.

50 “Weyahina 'eguma taiyawedi Tamagu galewa 'ina nuwatuhu simulimuliye, taudi tasigwao, nuwana nuhugwao, nuwana sinagwao.”

Copyright information for `BDD