Matthew 15

Me Yudiya tubudiyao 'idi mumuga

(Maki 7:1-23)

1Muliyetega Palisiyao ma loina 'ana tohe'itao Yelusalemega sitauyama Yesu 'oina, ma sihegwaeya sigwae, 2“To'aha weyahina 'a tomuliyao 'eguma muliya 'abwa 'ai geya nimadi sida buyoya, beno tubudao 'idi loina siligeligehi?”

3Ma 'ihegwaediya, “Comi wete Yehoba 'ina loina waligeligehi, weyahina tubumiyao 'idi mumuga wamulimuliyedi. 4Yehoba 'ina loina 'eluwa bewa, 'aigeda 'igwae, ‘Tamau ma sinau 'uhe'asisiyedi.’ Heluwena wete 'igwae, ‘Ceguma taiya tamana bo sinana 'i'ahwa galegaledi, sawasawahina walohe'amasi.’ 5Ma 'omi 'imi he'ita 'abo'abo, wagwae, ‘Ceguma taiya tamana ma sinana 'ihegwaedi, 'igwae, “Cigu tobwatobwao yatagwala pwaiyediya Yehoba 'oina, 'oinega geya sawasawahigu ma ya'abihetegomi.” ’ Coinega 'imi nuwatuhu 'abehega loheyaina 'ina 'abihetena nuwana 'ina he'asisi tamana 'oina geya ginaula madouna. 6Tubumiyao 'idi loinaina 'oinega Yehoba 'ina loina waheginaula besobesoweya.

7“Bewa 'imi 'abo. Mwalo hene Aiseya palopita weyahimi 'ihepwaila nugeta, tutaina Yehoba 'ina gwae 'ihepwaileya, 'igwae,

8‘Tomota bewa 'ahwadiyega sihehe 'asisiyegau ma geya 'atediyega, 9ma wete 'oiguwa sitapwatapwalolo besobeso, weyahina 'idi he'itao taugu geya 'oiguwega, ma hesi tomota tuwa 'idi nuwatuhuwega.’”
10Coinega tomota 'ibwauwedima ma 'ihegwaediya, “Gwae bewa wahesagohe ma wasanapu 'abehega 11'e'ahaiyedi 'ahwadega siluhuluhu geya sawasawahina ma si'abihe bi'igita, ma hesi gwaeyedi 'ahwadega silatulatuma taudi hesi si'abi'abi hebi'igita.”

12Ma Yesu 'ana tomuliyao 'oina sinaoma ma sihegwaeya, “Bada, 'uhesagoheya 'abehega Palisiyao 'ino gwae bewa weyahina sideba mwadina.”

13Ma Yesu 'igwaeya, “Caiweyedi Tamagu geya 'i'umadi, 'abwa 'idabu yahuledi. 14Ma tuwa, Palisiyaowedi simiyamiya 'ana siga sibe'u, weyahina taudi tohanugeta matagibugibudi, ma 'iyadiyao 'eguma matagibugibudi sihanugetedi, nata mabwaiyadi gaula sibe'u.”

15Coinega Pita 'i'ahwalagata ma 'igwae, “Gwae hegehegedi bewa 'ana nuwasabwalena 'ulihasi 'oima.”

16Ta Yesu 'igwaeya, “Nuwana 'omi wete 'abwa nuwami geya 'isabwalena, 17Coinega wasanapu 'abehega to'aha 'ahwadega 'iluhuluhu gamwada 'idobidobi, ma muliyetega 'itautauya mohomoho 'oina. 18Ma hesi to'aha tomota 'ahwadiyega 'ilatulatuma, beno 'atediyega silatulatuma ma si'abi'abi hebi'idi, 19beno nuwatuhu galadi gide lohe'amasa ta loyawe ta ganawala ta yagaha ta gwae 'abo'abo ta gwae sinala wete.

20Ginaulaedi bewa 'oidiyega tomota 'i'abi'abi hebi'idi, ma 'eguma nimada sahena tabuyobuyo tuta 'ai 'oina, beno yaluyaluwada geya 'i'abihebi'idi.”

Kenani wahineina 'ina hemisa

(Maki 7:24-30)

21Ma Yesu tupwaina 'i'ebesineya ta 'itauya Taiya ma Saidoni tupwaidi 'oidiya.

22Ma tupwaina 'oinega Kenani wahineina 'aigeda 'ilatuwa, ma Yesu 'ihegwaeya, 'igwae, “Bada, 'owa Debida 'ina susu, 'u'atemuyemuyegau, weyahina natugu mewahinena hi'ahi'a 'i'abihebuweya.”

23Ma Yesu wahineina 'ina bwau geya 'ihemaise, 'oinega 'ana tomuliyao sinaoma ma Yesu si'ahwanoiyeya, sigwae, “Wahineina 'uhesumane ma 'itauya, weyahina 'ibwau hedahedade.”

24Ma Yesu 'igwaeya, “Taugu yanaoma sipi 'wani'wanidi Isilelimo 'ina 'ebeloina 'alona weyahidi.”

25Ma hesi wahineina 'inaoma, ma Yesu matana 'i'etuluha, ta 'igwaeya, “Bada 'u'abihetegau.”

26Ta Yesu 'igwaeya, “Geya sawasawahina ma gwagwama 'adi ya'ebwae 'edewa 'oidiya.”

27Ma wahineina 'igwaeya, “Bada, beno moisa. Ma togidega 'e'ahai mugumuguna, 'eguma sigubagubala bada 'ina 'ebe'ai 'oinega, sawasawahina ma 'ina 'edewao si'aidi?”

28Coinega Yesu wahineina gwaeina 'ihemaiseya, 'igwae, “Wahine, 'owa tuwa tohemisa moisa, 'oinega bewa tuwa 'ino hemisaina huwaina 'ilatuwa.” Ma tutaina nage 'oina wahineina natuna 'ibwebwe'ana hila.

Tolohala baibaiwadi 'i'abihe bwebwe'anediya

29Ta Yesu tupwaina 'i'ebesineya ma 'ihasahasane Galili holai, ta 'oyai 'ihaneya, ma nobwa 'imiyatoiya. 30Ta boda madouna sihanema ma 'idi tolohalao si'ewedima, taudi toha'au'au ta taudi hesilae 'oinega siwe'a, ta taudi tomata gibugibu, ta taudi na'ona'o, ma tupwadi tolohalao wete Yesu deina sihalagudiya, ma 'i'abihe bwebwe'anediya. 31Ma bodaedi si'itediya beno na'ona'owedi sihegwaegwae ma wete sihesagoha bwaibwaini, ma taudi hesilae 'oidiyega siwe'a sibwebwe'ana hila, ma toha'au'au sitauya dumwadumwalu, ma tomata gibugibu matadi sitayahala. Coinega bodaedi nuwadi 'ihenainaida ta meIsileli 'idi Yehobaina sihehepwatuwe.

Yesu boda 'ihe'aidiya

(Maki 8:1-10)

32Ta Yesu 'ana tomuliyao 'ibwauwedima, ma 'ihegwaediya, “Boda bewa ya'atemuye muyediya, weyahina sabwelo 'etoi 'ebwa mahetegwao 'amiyamiya, geya 'adimo. Geya nuwagu ma magomaledi yahesumana hiledi, 'amuge gide ma 'edai sihemwalomwalohana.”

33Ma 'ana tomuliyao sihegwaeya sigwae, “Tupwa bewa balabala 'awawa, ma togidega boda madouna bewa 'adi 'e'ahai taloba 'ese?”

34Ta Yesu 'ihesilalediya, 'igwae, “Hisa 'ami belediyao?” Ma sigwaeya, “Beledi sebeni ma tupwana silahana 'i'iudi.”

35Coinega boda 'ihegwaediya ma bale'uwa simiyatoiya. 36Ta beledi sebeni ma silahanaedi 'i'ewediya ma weyahidi 'igwae helauwa Yehoba 'oina, ma 'i'ehisihisiya, ta 'i'ebwaediya 'ana tomuliyao 'oidiya, ma taudi siheguyaiyeya bodaedi 'oidiya.

37Ma mabwaiyadi si'aiya ma simwausuwa ma muliyetega 'e'ahai tupwatupwadi sidomwa 'autediya ta kodo sebeni silohemahediya.

38To'aiyedi loheloheyamo 'adi baibaiwa powa tausani, ma wete wahiwahine ma gwagwama baibaiwadi geya sihasilidi.

39Muliyetega boda 'ihesumanediya ma sihila, ma Yesu wagai 'igeluwa, ta Magadani tupwaina 'oina 'itauya.

Copyright information for `BDD