Matthew 27

Yesu 'ina yatala Pailato matana

(Maki 15:1; Luke 23:1-2; Yoni 18:28-32)

Gona 'i'adaleya, topwaoli madoudi ma babada mabwaiyadi siloina Yesu weyahina, nuwanuwadi 'abehega silohe'amasi. Coinega Yesu nimana sipaidiya ma sitauyeya toloina madouna Pailato 'oina, ma 'abehega Pailatoina 'ida loina.

Yudasa 'ina 'amasa

Ma Yudasaina 'isanapuya 'abehega Yesu 'i'iuna ma silohe'amasi, 'oinega 'inuwabuiya, ta 'ina mane siliba teti 'ihilediya topwaoliyao ma babadao 'oidiya, ta 'igwae, “Yalopuiya, weyahina loheya bwebwe'ana 'oimiya yatebaeya.” Ma sigwaeya, “Beno geya 'aigeda to'aha 'oima, ma 'owa tuwa weyahiu 'unuwanuwatuhu.”

Coinega mane tetiyedi 'iula suluhedi Hada He'asisi 'alona, ma 'ihapwesa ma 'itauya, ma balaeyega 'ani'ona 'ididi heyapasiya, ta 'i'amasa.

Ma topwaoliyedi maneyedi sihegogonediya, ta sigwae, “Geya sawasawahina ma Yehoba 'ana helau 'oina talagulagu, weyahina mane bewa loheya 'ana lohe'amasa maisana.” Coinega siboidimo siloina ma maneina 'oinega 'aigeda to'abi walata 'ina bale'u 'aigeda sihemaiseya, ma 'abehega bale'uina taumanao 'adi galiha. Coinega bale'uina sibwauweya, “Bweyaha bale'uina”, ma saninaina 'abwa 'imiyamiya. Nage 'oina to'aha palopita Yelemaiya 'igwae nugeteya 'ihapwesa, weyahina mwalo Buki He'asisi 'oina sileleya 'abehega,

“MeIsileli tauna 'ana maisa sibwauweya, beno dimwa siliba 'adi baibaiwa teti, ta maneyedi si'ewedima.
10 Ma 'oinega to'abi walataina 'ina bale'u sihemaiseya, gidemusa 'ida Bada 'ihemataluwegauwa.”

Pailato Yesu 'ihesilaleya

(Maki 15:2-5; Luke 23:3-5; Yoni 18:33-38)

11 Coinega Yesu Pailato matana sihetoholoya, tauna toloina madouna, ma Pailatoina Yesu 'ihesilaleya, 'igwae, “Cuhepwaila, 'owa meYudiya 'idi kini, 'awa?” Ma Yesu 'igwaeya, “Beno 'ugwae pwaiya.” 12 Coinega topwaoli madoudi ma babadao Yesu sihe'eweya Pailato matana, ma Yesu geya 'aigeda to'aha 'ihehemaise. 13 Ma Pailato 'igwaeya, “Togidega, hepwaila bewa 'a he'ewa weyahidi 'uhesagoheya?” 14 Ma Yesu geya wete 'ihemaise, ma tuwa 'ihehenono, 'oinega Pailatoina nuwana 'ihepwanopwanowa madouna.

Pailato 'iloina ma Yesu silohe'amasi

(Maki 15:6-15; Luke 23:13-35; Yoni 18:39-16)

15 Bolime 'aigeda 'aigeda 'oidiya, Hataona Guyaina 'oina toloinaina 'ina mumuga beno deliyega 'aigeda loheya 'ilihasi ma 'ilatu, 'eguma taiya boda sihesinuweya. 16 Ma tuta nage 'oina 'aigeda loheya deliya 'imiyamiya, sanina Balaba, tomota mabwaiyadi sisanapuya 'abehega tauna togala madouna. 17 Coinega tomota mabwaiyadi si'eto'autama Pailato 'oina, ma Pailato 'ihesilalediya, 'ihegwaediya, “To loheya nuwanuwami ma weyahimi yalihasi? Balaba? bo Yesu tauna sibwauweya To'abihetena?” 18 Weyahina Pailato 'isanapuya 'abehega he'ipi'ipiyega Yesu sitebaeya sabi lohe'amasina.

19 Ma wete tutaina 'abwa Pailato yatala 'ipaipaihowa, ma mwanena wasa 'ihetuneyama ma 'igwaeya, “Sahena wete to'aha 'uloinae loheya beno bwebwe'ana. Weyahina nige yanihiyeya, ta 'ebe matauta madouna 'oiguwa.”

20 Ma hesi topwaoli madoudi ta babadao tomota sibo'a heyaheyabadi ma 'abehega si'ahwanoi Pailato 'oina ma Balaba 'ilihasi 'oidiya ta Yesu silohe'amasi. 21 Coinega toloinaina 'ihesilalediya, 'igwaeya, “Siteluwa 'oidiyega taiya nuwanuwami ma weyahimi yalihasi.” Coinega sigwaeya, “Balaba.”

22 Ma Pailato 'igwaeya, “Ma togidega yaloina 'ese Yesu tauna sibwauweya To'abihetena?” Coinega mabwaiyadi sigwaeya, “Kelose 'oina tada tutuhepa'ine!”

23 Ma Pailato 'ihegwaediya, “To'aha hede 'ina pui, ma 'oinega 'abehega 'amasa 'iloba?” Ma sibwau 'aso'asona, sigwaeya, “Kelose 'oina tada tutuhepa'ine!”

24 Coinega Pailato 'isanapuya 'abehega geya 'ina waiwaimo, ma boda sihe'ohe'ohe 'ana 'oleya 'abehega nata sihegaina ma sihe'upwa. Coinega we'ahega nimana 'ibuyoya bodaedi matadiya, ma 'igwae, “Sahena wete to'aha yaloiloina loheya bewa bwebwe'ana 'ina 'amasa weyahina, ma waboimo wada loina.”

25 Ma boda mabwaiyadi sigwaeya, “Bwebwe'ana! Tauma 'ada loina, ma 'ana maisa 'ada loba, tauma, ma mehau sihanehanema 'oidiya wete.” 26 Coinega Pailato 'idi gwae 'ihesagoheya, ta Balaba 'ilihasiya, ma wete 'ina tolo'alehao 'iloinaediya ma Yesu balaeyega sisapi, ma muliyetega 'abwa situtuhepa'i kelose 'oina.

Tolo'alehao Yesu silo'aleheya

(Maki 15:16-28; Yoni 19:2-3)

27 Coinega toloinaina 'ina tolo'alehao Yesu sisapiya, ma siluhuweya 'idi hada madouna 'alona, ta 'idi boda mabwaiyadi sibwau he'autedima Yesu 'oina, 28 ma 'ana 'ale'owao sihalolodiya, ta 'ale'o wasawasa 'oinega sihe'oteya sabi lotuyae, 29 ma 'ana talatala talitali 'oidiyega sipaihoweya, ma debana silaguya, ma guna 'ina 'ebeula silaguya, ma wete matana si'etuluha ma silolotuyane, sigwaeya, “Yauwedo 'owa meYudiya 'idi kini, 'awa?” 30 Ma wete si'esoheya, ta 'ina guna si'eweya, ma 'oinega debana sisapiya.

31 Ta 'idi lotuyana 'igumwala, ma 'ale'o wasawasa 'oinega sihaloloya, ta tauna 'ana 'ale'owega sihe'wama hileya, ma sitoeya sabi hekeloseye.

Yesu situtu hepa'ineya kelose 'oina

(Maki 15:21-32; Luke 23:26-43; Yoni 19:17-27)

32 Yesu sihapweseya ma sitauyeya, ma 'edai Sailini loheyaina 'aigeda, sanina Saimoni, sihalobeya, ma siloineya ma Yesu 'ana kelose 'i'ahali. 33 Ma Saimoniina 'i'ahala ta 'ana siga silatuwa Goligota tupwaina. (Goligota, 'ana sanapu beno mwagu 'asaina.)

34 Ta waini ma pase'uma sihebweliyeya ta si'ebwaeya, ma 'abehega sahena muya madouna 'ilotolotoho, ma hesi Yesu 'ilotohoyamowa ta 'ilogwahateya.

35 Coinega, kelose bale'uwa silaguya ma Yesu 'oina situtu hepa'iya ma sihetoholoya, ma muliyetega topaihowaedi Yesu 'ana 'ale'o si'ewediya ma siguyaiyeya siboimo 'oidiya, ma 'idi heguyai 'e'opi'opi sipaihoweya gide kati, ma 'eguma taiya 'inugeta 'ana 'ale'o 'ida 'ewa. 36 Muliyetega simiyatoiya ma sihehe'asine. 37 Ma wete 'ana kelose tabwanina sileleya, “Yesu tauna meYudiya 'adi toloina.” Beno 'ina 'amasaina lamuna.

38 Wete toyagaha 'eluwa si'abi hekelosediya, 'aigeda Yesu 'ina 'ebeulega ma 'aigeda 'ina 'adigeyegeyega.

39 Ma tomota tupwadi 'edai Yesu 'ana kelose 'oina silolotuyana ma sihehenama, 40 sigwae “Ca mudala! Cugwaeya 'abehega sawasawahiu ma Hada He'asisi 'uligehi ma sabwelo 'etoi 'oina 'u'abihila. Hana 'uda 'etopelego 'uboi ma keloseyega 'usuluma, 'eguma 'owa Yehoba Natuna.”

41 Wete gidemusa topwaoli madoudi ta loina 'ana tohe'itao ta babada Yesu silotuyaneya, ma sigwae, 42 “Hali tomota 'ilemediya, ma tauna 'ida 'etopele. Tauna 'abehega tupwa Isileli 'ana toloina. Hana keloseyega 'isuluma ma 'oinega tahemisae. 43 Tauna 'abehega Yehoba 'ana tohemisa ma 'igwaeya, ‘Taugu Yehoba Natuna.’ Ceguma Yehoba nuwanuwana tauna, 'ida 'etolihasi, 'awa?”

44 Ma toyagahaedi Yesu ba'idanao si'abi hekelosediya, taudi 'adi keloseyega sibwa'abala ma taudi Yesu siheliyeya.

Yesu 'ina 'amasa

(Maki 15:33-41; Luke 23:44-49; Yoni 19:28-30)

45 Casudiladila ma lahilahi gogo mabwaiyana 'iguguyouwa. 46 Ma lahilahiya Yesu 'enana madounega 'ibwauwa ma 'igwaeya, “Eli, eli, lamasabakitani!” Cana bui beno gide, “Cigu Yehoba, 'igu Yehoba, to'aha weyahina 'u'ebesinegauwa?”

47 Ma tupwana tomota deina sitotoholo 'ina bwau sihesagoheya, ma sigwaeya, “Wahesagohe! Loheya bewa Ilaitiya 'ibwaubwauwe.” 48 Coinega 'aigeda 'oidiyega 'ipiliya ma balou 'i'eweya, ma waini memaina 'oina 'ihepwaseya, 'oinega 'aigeda 'ai'aiwe matana 'ibadiyeya, ma 'ihe'etohaneheya Yesu 'ahwana, ma 'imala'u'uya.

49 Ma loheyaina 'iyanao sigwaeya, “Tuwa tayamwayamwa, nuwana nata Ilaitiya 'ilatuma ma 'i'etolihasi.”

50 Ma Yesu 'enana madounega 'ibwau hila, ma yawasina 'igumwala. 51 Ma 'ale'oina* Hada He'asisi 'ana libu 'ilotaliliya tabwanega ma 'isuluwa duduna, ma mwani'ini'i 'ipiliya, ma da'ule madoudi si'emutumutudiya. 52 Ma wete galiha si'eso'ediya ma tohemisao tupwana baibaiwadi mwalo si'amasa wahidi sitoholo hila, 53 ma Yesu 'ina toholo mulina taudi wete galihega sihapwesama, ma Yelusalema 'oina siluhuwa, ma tomota tupwana baibaiwadi 'oidiya sihapwesa.

54 Ma tolo'alehaowedi ma'idi tohanugeta saugenina Yesu kelose 'oina si'ita'itayahiya, mwani'ini'i ma ginaula mabwaiyana si'itediya, ta simatauta madouna, sigwaeya, “Moisa, loheya bewa Yehoba Natuna.”

Yesu 'ana lagu taona

(Maki 15:42-47; Luke 23:50-56; Yoni 19:35-42)

55 Wahiwahine wete tupwana bwagebwagega si'e'ebubuna, taudi mwalo Galiliyega Yesu sihemuli tabubuweyama, ma 'ana sipaipaihowa. 56 Caigeda sanina Meli Magidala, ma 'ina waliyesa tauna Yemesa ma Yosepa sinadiu, ma wete Sebedi natunao sinadiu.

57 Lahilahiya 'aigeda Alimatiya loheyaina 'inaoma Pailato 'oina, tauna towasawasa ma wete Yesu 'ana tomuliya 'aigeda, sanina Yosepa. 58 Ma Pailato 'oina wahina 'i'ahwanoiyeya, ma Pailato 'itagwala.

59 Citagwala, ma Yosepa ma'ina hewahewaliyao Yesu wahina si'eweya, ma 'ale'o wa'ewa'e'ena ma 'ehauna 'oinega siwaduhiya. 60 Ma Yosepaina 'ana galiha hauhauna 'oina silaguya, ma galihina sipidiya gide duluha 'alona. Ma da'ule madouna ma pwa'upwa'uwana 'oinega galihina 'ahwana silagu bodeya, ma muliyetega Yosepa 'itauya.

61 Ma Meli Magidala ma'ina waliyesa galihina deina simiyatoiya, ma sihehe'asine.

Galiha si'itayahiya

62 Ma Yesu si'abi hekeloseyeya meYudiya 'idi sabwelo 'atububu 'oina, 'oinega gona 'i'adaleya, beno 'idi Sabati, topwaoli madouna ma Palisiyao bodaidi sitauya Pailato 'oina, 63 ma sigwaeya, “Bada, to'aboina mwalo mayawasina 'imiyamiya 'ina gwae 'anuwatuhuya 'igwae, ‘Sabwelo 'etoi ma 'amasega yatoholo hila.’ 64 Coinega 'eguma sawasawahina, 'uloina ma galiha 'ana to'itayahinao si'itayahi bwaibwaini ma 'ana siga sabwelo 'etoi, tabu ta 'ana tomuliyao sinaoma ma Yesu wahina siyagahi ma sidene, ma tomota si'abowedi 'abehega 'amasega 'itoholo hila, ma 'oinega 'abo mulimuliyana 'abo nugetana 'ida gala sine.”

65 Ma Pailato 'ihegwaediya, 'igwaeya, “Cimi to'ita yahinaowedi tolo'alehao simiyamiya, watauyedi ma galiha simiya loyamwa bwaibwaini.”

66 Coinega sitauya ma galiha 'ahwana 'ana loboda dimwaina wete sibwadeya, ma nobwa to'itayahinaedi sihalagudiya.

Copyright information for `BDD