Revelation of John 16

Yehoba 'ina gamwasowala biyonao sebeni

Ma Hada He'asisi 'alonega 'aigeda 'enana madouna yahesagoheya, 'igwaegwae aneloseyedi sebeni 'oidiya, 'igwaeya, “Wanao ma wasulu bale'uwa, ma Yehoba 'ina gamwasowala biyonao wasiwadi.”

Coinega anelose nugenugetana 'inaowa ta 'ina biyo bale'uwa 'isiweya, ta bwe'a galadi ta muyadi silatuwa taudi hebai 'ina dimwa tagitagina 'ana to'etuluha 'oidiya, taudi beno hebaiina 'ana 'ila'ilala 'oidiya 'imiyamiya. Ma anelose heluwena wete 'ina biyo 'i'eweya ta holai 'isiweya, ta holaina mabwaiyana 'ihebweyaha, 'ana 'ita gide to'amasa 'aigeda bweyahina. Coinega ginaula mabwaiyadi mayawasidi ni'uwa si'amasa.

Ma anelose hetoina wete 'ina biyo 'i'eweya ta we'aha daudauna ma bidala 'oidiya 'isiweya, ta wete sihebweyaha. Coinega aneloseina tauna we'aha 'ana toloina 'enana yahesagoheya, 'igwaeya,

“Yehoba yo, 'owa tuta mwalo ta bewa 'oidiya 'umiyamiya, ma wete dumwaluu ma 'asi'asilalau. Cino loina bewa bwebwe'ana hedade, weyahina tomotaedi galadi,
ta Yehoba 'ina topaihowao ma wete 'ina palopitao sihunudiya, ta bweyahidi si'abi hedauya. Coinega 'adi maisa 'u'ebwae pwaidiya ma 'abehega bweyaha sinuma, ta maisaina beno 'ilobwainediya moisa.”
Ma 'enana 'aigeda wete yahesagoheya 'ebe pwaoli 'oinega 'igwaeya, “Bada yo, 'owa Yehoba Tohewaiwai hedada 'ino loina bewa 'ausaladi ma dumwaludi.”

Eema anelose 'ehatana 'ina biyo 'i'eweya ta sinala 'oina 'isiweya, ta sinala 'ina waiwai 'ilohepoiya, ta sawasawahina ma tomota 'i'alasidi. Ma yahiyahiina madouna tomota 'i'ala'alasidi, 'oinega Yehoba siheliyeya, weyahina tauna 'ina loinega ma mwauwedi silatuma. Ma tuwa geya sida nuwabuiya ta 'abehega Yehoba sihepwatuwe.

10 Eema anelose henimana wete 'ina biyo 'isiweya hebaiina bwehabwehalina 'ina wagahata wasawasa 'oina, ta 'ina 'ebeloina mabwaiyana 'iguguyouwa. Ta tomota muyaina 'oinega sihesala'i'ita. 11 Ma Yehoba galewa siheliyeya, bwe'aedi muyamuyadi weyahidi, ma hesi geya sida nuwabuiya 'idi paihowa puiyedi 'oidiyega.

12 Eema anelose hesikisina 'ina biyo 'i'eweya ta we'aha sanina Yupeletisi 'oina 'isiweya ta we'ahina mabwaiyana 'iyapasa, ma kini tupwadi sihabalama tupwa bolibolimeyega. 13 Ma yaluyaluwa 'etoi galadi ya'itediya, 'adi 'ita gide 'we'we silatulatuma hebaiina bwehabwehalina 'ahwanega, ma wete hebaiina holega ma wete 'ina palopita 'abo'aboina 'ahwadiyega. 14 Yaluyaluwa 'etoiyedi beno Tomudulele 'ina 'ali'eyao taudi 'ebe henainaida sipaihowediya, ta sinaowa kiniyao bale'u mabwaiyana 'oina ta 'abehega 'idi bodao sihegogonedima ma taudimo silo'aleha hiladi, beno nata Yehoba Tohewaiwai hedada 'ina sabwelo madouna 'oina.

15 “Wahesagoha, 'abwa 'igu hapwesama gide toyagaha 'idi hapwesama tuwa, ma 'eguma 'owa taiya 'ulomatayahi ma 'a 'ale'o 'u'otemomosi, 'uyaliyaya, 'ane geya'abwa 'umwadina 'ino bugewa weyahina.”
16 Coinega yaluyaluwaedi kiniyao ma'idi bodao sihegogonedima tupwa 'aigeda, sanina 'ena Ibeliuwega* sigwae “Amagedoni” 'oina.

17 Ma anelose hesebenina 'ina biyo 'i'eweya ta galewa ma bale'u gamwagamwanidiya 'isiweya, ma wagahata wasawasa Hada He'asisi 'alonega 'aigeda 'enana madouna 'ilatuma, 'igwaeya, “Cigumwala pwaiya.”

18 Ma nage 'oina namala ta dagugu ta gugula ta wete mwani'ini'i madoudi silatuwa. Mwalo hene ta nige, tomota 'idi tuta 'oina, geya 'eta mwani'ini'i 'ana madou nage gide 'ida latu'esa. Ma bewa moisa gala hedade. 19 Eeta 'asa madounaina 'i'ewatahiya, ta 'ana watahina 'etoi silatuwa. Ma tupwa mabwaiyana 'oidiya mwani'ini'iina 'idi 'asa 'igihegalediya, ma 'asa madouna sanina Babiloni 'ina pui Yehoba 'inuwatuhu yahiya ta 'ina biyo 'oinega waini 'ihenumeya, ma wainiina beno 'ina gamwasowala madouna wainiina. 20 Ma wete bwanabwanao ma 'oya mabwaiyadi sisawala, ta geya wete sawasawahina ma taloba hiladi. 21 Ma wete dohi madoudi ma patupatudi, gide da'ule madoudi, galewega sigubagubalama tomota 'oidiya. Coinega tomotaedi Yehoba siheliyeya dohiina gala hedadena weyahina.

Copyright information for `BDD