Revelation of John 19

Ma muliyetega hedagadaga madouna yahesagoheya, gide boda madouna 'enadi sihehegwaegwae,

“Yehoba tahepwatuwe, tauna To'abihetena ma Towasawasa ma Tohewaiwai.
Ma 'ina loina mabwaiyana dumwaluna ma bwebwe'ana, weyahina tohemata ganawalina 'ina ganawalega bale'u mabwaiyana 'i'abihegaleya, ta 'ana maisa 'ilobeya. Ma wete 'asaina 'oina Yehoba 'ina tomota silohe'amasidiya, 'oinega 'i'abi hegaleya.”
Ma sibwau, sigwaeya,

“Yehoba tahepwatuwe, weyahina 'asaina madouna 'i'ala'alasi, ma 'asuna tuta mabwaiyana 'ihanehane.”
Coinega babadaowedi site tuweniti powa ma wete hebai site 'ehataedi sibe'u talutalubu'iya tauna Yehoba 'ina wagahata wasawasa 'oina 'imiyatoiya matana, ta 'oina sigwaeya, “Gide, 'ahepwatuwego!”

Lami 'ina hai guyaina

Eeta wagahata wasawasaina 'oinega 'aigeda 'enana 'inaoma 'igwaeya, “Comi Yehoba 'ina topaihowao ma 'ana tohe'asisiyao 'i'iumi ma madoumi, wahepwatu 'oina.” Ma wete yahesagoheya gide boda madouna 'enadi, ma wete gide we'aha daudauna 'enana, ma wete gide gugula 'enana sigwaegwae,

“Yehoba wahepwatuwe, weyahina tauna 'ida Bada Tohewaiwai hedade ta 'ihetoloina pwaiya.
Tayaliyaya madouna ma wete tahepwatuwe, Lami 'ina hai weyahina, ta mwanena 'ihepasa pwaiya 'idi hai weyahina, ma wahineina 'ana 'ale'o bwebwe'ana wa'ewa'e'ena Yehoba 'i'ebwae pwaiya.”
Ta 'ale'oina 'ana nuwasabwalena beno Yehoba 'ina tomotaiyao mumugadi dumwaluna.

Ma aneloseina 'oiguwa 'igwaeya, “Gwae bewa 'ulele 'abehega, ‘Taiyawedi 'omi Yehoba 'ibwauwegomiya Lamiina 'ina hai guyaina 'oina, wayaliyaya.’” Ma wete aneloseina 'igwae hila, ta 'igwaeya, “Bewa Yehoba 'ina gwae moisa.”

10 Ma 'ahena yabe'u talutalubu'iya ta ya'e'etuluha 'oina, ma 'oinega 'igwaeya, “Geya'abwa gide. Taugu tuwa Yesu 'ina topaihowa 'owa gide, ma wete gide tasimwao taudi Yesu 'ana tohepwailao. Yehoba hesi 'oina 'u'etuluha.” Weyahina Yesu 'ana tohepwailao 'adi lotohona gide palopitao 'adi lotohona Yehoba yaluyaluwana 'oinega.

Hosi wa'ewa'e'ena 'ana togelu.

11 Ta ya'iteya galewa 'i'eso'eya, ma hosi wa'ewa'e'ena 'ihapwesa, ta 'ana togeluina sihesaniyeya Toguibiga Dumwaluna. Ma 'ina loina dumwaluna 'oinega 'iyatala ta wete 'ilolo'aleha.

12 Ta matana 'adi 'ita gide 'aiwe 'ininininima, eema debana 'ana pasa wasawasaedi baibaiwadi. Ma wete sanina sileleya geya sawasawahina ma taiya 'eta 'isanapu. Ciboinamo 'isanapuya. 13 Ma 'ana 'ale'oina 'i'oteya bweyaha 'oinega 'ihebuteya, ta sanina silaguya, sigwae, “Yehoba 'ina gwae.”

14 Ma galewa 'ana tolo'alehao 'idi hosi wa'ewa'e'edi sigeludiya, ta simuliyeya, 'adi 'ale'o wa'ewa'e'edi ma 'ausaladi. 15 Ta 'idi tohanugetaina 'ahwanega 'elepa 'aleha mamatana 'ilatulatu, tauna 'abwa 'elepaina 'oinega tupwa baibaiwadi 'ihewaiwai sinedi ma 'oidiya 'iloina pa'ala, ma wete waini 'ebe hida 'oina 'ihidadi, beno Yehoba Tohewaiwai hedade 'ina gamwasowala madouna. 16 Ta 'ana 'ale'o 'oina ma wete 'ahena sanina silelediya, sigwae, “Loheya bewa toloinao 'idi Toloina, ma wete babadao 'idi Bada.”

17 Eeta 'aigeda anelose ya'iteya sinala 'oina 'itotoholo ta 'ibwaubwau bwasumowedi galewa ma bale'u gamwagamwanina sitahetaheya 'oidiya, 'igwaeya, “Wasawalama Yehoba 'ina guyai madouna 'oina, 18 ma wa'ai kiniyao hesiyodi, ma 'aleha 'ana tohanugetao hesiyodi, ta tolo'alehao hesiyodi, ma wete hosiyao ta 'adi togeluwao hesiyodi, ta wete loheloheyao baibaiwadi hesiyodi, taudi babadao ma 'idi topaihowao wete, madoudi ta 'i'iudi.”

19 Ma ya'iteya hebaiina holega 'inaoma, ta bale'u 'ana babadao ma'idi tolo'alehao si'auta sabi lo'aleha hosi 'ana togeluina ma'ina tolo'alehao 'oidiya. 20 Nage 'oina hebaiina ma'ina palopita 'abo'abo si'abi yahidiya, ta mayawasidi siulediya 'asa 'ala'alata 'alona, beno dimwa hulahulaidi 'oina. Palopita 'abo'aboina tauna mwalo 'ina paihowa waiwaina 'ipaihowediya hebaiina matana, ma 'oinega tomota 'i'abowediya, taudi hebaiina 'ana 'ila'ilala 'oidiya 'imiyamiya, ta 'ina dimwa tagitagina 'ana to'etuluhao.

21 Ma 'elepaina hosiina 'ana togelu 'ahwanega 'ilatulatuma, 'oinega hebaiina ma'ina palopita 'abo'abo 'idi tolo'alehao 'ilohe'amasidiya. Eeta bwasumo baibaiwadi sinaoma ta to'amasaedi wahidi si'aidiya, ta gamwadi 'i'otuwa.

Copyright information for `BDD