Revelation of John 20

Bolime tausani

Ma wete 'aigeda anelose ya'iteya galewega 'isulusuluma, ta gaulaina madouna 'ana 'ebeso'e kihi* ma balae madouna 'i'ewediya, ma 'inaoma, ta hebai bwehabwehalina 'i'abiyahiya, tauna mwata nugenugetana ma Tomuduleleina, beno Seitani, ta 'ipaiya ta 'ana siga bolime tausani sigumwala. Coinega aneloseina hebaiina 'i'abi haneheya ta 'iuleya gaulaina madouna 'alona, ta nobwa 'igudubodeya, ma 'igihepa'aliya, ta geya'abwa bodao 'i'abo'abowedi 'ana siga tausani bolime sigumwala, ma muliyega 'ilihasi tuta 'i'iunamo weyahina.

Ma wete tupwana wagahata wasawasa ya'itediya, ma 'oidiya taudi Yehoba loina 'i'ebwaediya simiyatoiya. Ta wete tomotaedi tani'odi si'upwediya, weyahina taudi Yesu 'ana tohepwailao ma Yehoba 'ina gwae 'ana tohepwailao, yaluyaluwadi ya'itediya, taudi geya hebaiina ma'ina dimwa tagitagina 'oidiya sida 'etuluha, ta geya 'ana 'ila'ilala manidiya ma nimadiya silagudi. Taudi bewa 'amasega sitoholo pwaiya, ta Keliso ba'idadiu siloiloina bolime tausani 'oidiya. Taudi totoholo nugenugetaidi, ma to'amasa mabwaiyadi bolime tausani sigumwala 'abwa muliyetega taudi wete sitoholo hila.

Ta taudi totoholo nugenugetaedi 'asi'asilaladi, 'oinega ma'idi yaliyaya, ma 'amasa heluwena geya'abwa silobaloba, ta taudi hesi Yehoba ma Keliso 'idi topwaoliyao, ta Keliso ba'idadiu sihetoloina bolime tausani 'oidiya.

Seitani 'ina we'a

Coinega bolime tausani 'igumwala, 'abwa Seitani 'ebe paiyega silihasi, ma 'ilatuma, ma 'itauya bale'u mabwaiyana 'oidiya sabi 'abowedi, tupwaina gide Gogi ma Magogi 'oidiya. Coinega Seitani taudi mabwaiyadi tolo'aleha 'ihe'autediya sabi 'aleha, tahasila 'asae, gide namonamo holai.

Eema bale'u mabwaiyana 'oinega sitauyama ta Yehoba 'ina 'asaina madouna 'oina silatuwa, ma 'asaina Yehoba 'ina tohemisaowedi 'oina siha'wabu'wabudiya, ta 'aiwe ninima galewega 'isuluma ta 'i'ala hegumwalidiya. 10 Coinega 'adi to'abo Seitaniina si'eweya, 'asa 'ala'alata 'alona siuleya. Yahiyahiina 'alona mwalohene hebaiina ma palopita 'abo'aboina siula pwaidiya, ma tupwaina 'oina sitetoiyedi simuyamuya sabwelo ma nihuwana 'oidiya, ta geya'abwa 'igumwagumwala.

Yatala 'ana 'ebe losaloha

11 Ma ya'iteya wagahata wasawasa wa'ewa'e'ena ma madouna, ma wagahataina 'ana tomiyaina matanega galewa ta bale'u sisawala, ma geya sawasawahina ta'ita hila. 12 Ma to'amasa mabwaiyadi ya'itediya, madoudi ta 'i'iudi, 'ebemiya wasawasaina matana sitotoholo, ta buki 'iyahalidiya, ma 'aigeda wete buki 'iloyahaliya, tauna yawasida 'ana buki, ta to'amasao 'iloinediya, to'aha gide mumugadi lelelelena bukiyedi 'oidiya 'imiyamiya.

13 Taudi ni'u 'adi to'enowao ma Bwebweso* 'ana tomiyao ta bale'u 'ana to'amasao mabwaiyadi sitauyama, ta 'aigeda 'aigeda 'iloinediya, to'aha mumugadi gide. 14 Ma 'amasa ta Bwebweso 'iula dobihediya 'asa 'ala'alata 'alona, ta yahiyahiina beno 'amasa heluwena.

15 Ma 'eguma taiyewedi geya sanidi 'ilobaloba yawasida bukina 'oina 'iuledi 'asa 'ala'alata 'oina.

Copyright information for `BDD