Revelation of John 22

Eeta aneloseina yawasida we'ahina 'ihe'itegauwa, we'ahinaina matana maemaedanina moisa, Yehoba ma Lami 'idi wagahata wasawasaina 'oinega 'idaudauma. Ma 'asaina gamwagamwaninega 'idaudaudobi. Ta we'ahinaina papalidiya yawasida 'aiwenao sitotoholo. Caiweyedi huwaidi wai'ena 'aigeda 'aigeda hagadi ma hagadi, 'oinega bolime 'aigeda 'alona matuwelo sihuwahuwa, ma nabainao boda mabwaiyadi bale'uwa 'idi mulamula.

Ta hesi ginaula gala hedadedi 'abwa sisawala 'asaina 'oinega, ma Yehoba ta Lamiina 'idi wagahata wasawasa 'oina simiyamiya, ma Lamiina 'ina topaihowao 'oina sipaihowa. Ma wete manina si'ita, tauna sanina manidiya. Geya'abwa wete 'ida guguyou, ma geya nuwadi sinala ma mayale 'asilaladi, weyahina Bada Yehoba tauna tuwa 'idi 'asilalaina, ma siloina hataya.

Yesu 'ina naoma

Ta aneloseina 'ihegwaegauwa, 'igwaeya, “Gwae bewa moisa ma dumwaluna. Bada Yehoba tauna tuwa yaluyaluwa 'ana to'ebwaya palopitao 'oidiya, ma 'ina anelose 'ihetuneyama topaihowao 'oidiya 'ihe'ita to'aha nata 'ilatuma.”

Ma Yesu 'igwaeya, “Wa'ita! Bewa ma yanaowa, ma taudi gwae hemisa buki bewa 'oina 'adi tohematamatanao siyaliyaya.”

Taugu Yoni ginaula bewa mabwaiyadi yahesagohediya ta ya'itediya. Ma ginaula bewa sigumwala, ma aneloseina 'ahena yabe'u talutalubu'iya, tauna ginauledi 'ana tohe'ita 'oiguwa, ta 'oina ya'etuluha. Coinega tauna 'ihegwaegauwa, 'igwaeya, “Geya'abwa gide, weyahina taugu topaihowa tuwa gide 'owa, ma tasidao taudi palopitao, ta wete taudi buki bewa 'ana tohematamatanao. Ma hesi Yehoba 'iboi namo 'oina 'u'etuluha.”

10 Ma wete 'ihegwaegauwa, 'igwaeya, “Geya'abwa gwae nugetaedi buki bewa 'alona 'udahwadahwadi, weyahina tuta deina tuwa. 11 Ma 'oinega taudi togala, tuwa galana 'oidiya 'imiya hataya, ta 'eguma taudi mumugadi bi'ibi'ina, tuwa bi'i 'oidiya 'imiya hataya, ta 'eguma taudi mumugadi bwebwe'adi, mumugadi 'ibwebwe'ana hataya, ma taudi 'asi'asilaladi, 'asilalaina 'oina simiya hataya.”

12 Coinega Yesu 'igwaeya, “Nata yanaowa ma 'ami maisa ya'ewediwa, ma yaheguyai 'oimiya, gide 'imi paihowa 'adi madou. 13 Weyahina taugu 'ebenugeta ma 'ebemuliya, nuwana 'ebehegaina ma 'ebelosaloha.”

14 Ta wayaliyaya 'eguma taiyawedi 'omi 'ami 'ale'o wadeulidiya, weyahina 'aiweina huwaina yawasida weyahina wa'ai, ta wete 'asaina 'ana 'ahwa'edao 'oidiyega waluhu. 15 Ma hesi 'asa 'atamanina 'adi tomiyanao, beno 'edewao, ma Tomudulele ma'iyanao, ma tologwaliyao, ma tolohe'amasao, ma dimwa 'adi tohemisao, ta wete to'e'abo'abowao.

16 “Taugu Yesu, ta 'igu anelose yahetune pwaiyawa 'oimiya, ta 'abehega ginaulaedi bewa 'ihepwailedi tohekalesiyao 'oimiya. Taugu Debida 'ina susu 'aigeda, ma taugu wete tomodaba* 'asilalana.”

17 Yaluyaluwa Tabuna ma tohai mewahinena sigwaeya, “Wanaoma”. Ma taiyawedi 'omi gwae bewa wahesagoheya, 'omi wete wagwae, “Wanaoma.” Ma taudi tani'odi 'iyahala sinaoma, ma taiyawedi taudi nuwanuwadi, nata yawasi we'ahina si'ewa, ma sinuma. Geya 'ana maisamo.

Cebelosaloha

18 Comi buki bewa 'ina gwae hemisa 'ana tohesagohao bewa 'ami henuwalagu, 'abehega geya'abwa 'imi gwaeyega waloloheposeyane, 'amuge muyamuyaowedi buki bewa 'alona 'ihepwailediya Yehoba 'iloheposeyane 'oimiya. 19 Ta wete geya'abwa 'aigeda gwae buki bewa 'oinega wa'ewa'ewa yahule, 'amuge Yehoba wete 'ami heguheguyai yawasi 'aiwena 'oinega 'i'ewa yahule, ma wete 'imi 'ebemiya 'asaina 'asi'asilalana 'alona, ta ginaula baibaiwadi bwebwe'adi buki bewa 'oina 'ihepwailediya, 'oimiyega 'i'ewa yahuledi.

20 Gwae bewa 'ana tohepwaila 'igwaeya, “Moisa! Bewa ma yanaowa.” Gide Bada, 'unaoma, 'owa Yesu.

21 Cida Badaina Yesu 'ina 'atemuyamuya ta 'ina helau baibaiwami 'ana tohemisao 'oimiya.

Copyright information for `BDD