Revelation of John 3

MeSalidisa 'idi leta.

Aneloseina totapwalolowedi Salidisa 'oina 'i'ita'itayahidi, 'ina leta 'ulele meSalidisa weyahidi, ma 'ugwae: Wasa bewa 'itauyama loheyaina 'oinega, tauna loheyaina Yehoba Yaluyaluwana sebeni ma wete 'ipwala sebeni 'oina simiyamiya. Tauna bewa 'ina hepwaila 'oimiya 'igwaeya,

“Cimi paihowao yasanapu pwaidiya, ta tetelimi yahesagoheya 'abehega mayawasimi wamiyamiya, ma geya, weyahina yaluyaluwami bo'i si'amasa.

“Coinega 'eno'enowega watoholo ma to'aha 'i'iuna 'oimiya 'imiyamiya wagihemadou, ma sahena mabwaiyana si'ama'amasa. Yasanapuya 'imi paihowao Yehoba matana tupwana geya dumwaludi. Ma mwalo he'itaina sihe'itegomiya ta wahesagoheya, sowasowana wanuwatuhuyahi ma wanuwahila eema wamuliya bwaibwaini. Ma 'eguma geya 'enowega wada toholowa, 'abwa 'oimiya yatauyawa ma yalohe'ate yohogomi gidemusa toyagaha, ta geya wasanapu tolahisa yalatuwa.

“Ma tupwami meSalidisa 'ami 'ale'o geya wabailidi, 'abwa 'omi ba'idagwao tatauya mahemahetena ma'ada 'ale'o wa'ewa'e'ena, weyahina 'omi 'ilobwainegomiya.

“Gidemusa tuwa 'omi taiyawedi wahewaiwai, 'omi wete 'ami 'ale'o wa'ewa'e'edi wa'otedi, ma geya'abwa sanimi yawasi bukina 'oinega yale'wale'wa yahule, ma hesi sanimiyedi 'abwa ya'inanadi Tamagu ta 'ina aneloseyao 'oidiya, 'abehega 'omi 'igu boda.

“Ceguma taiya 'oimiyega matenana, Yaluyaluwa Tabuna 'ina gwae boda hekalesiyao 'oidiya 'ihesagohe.”

MePiladelipiya 'idi leta.

Aneloseina totapwalolowedi Piladelipiya 'oina 'i'ita'itayahidi 'ina leta 'ulele mePiladelipiya weyahidi ma 'ugwae: Tetela bewa 'itauyama tauna bwebwe'ana ma dumwaluna 'oinega, ma wete tauna nimana kihiina mwalo Debida 'ina 'ebeso'eina 'i'abi'abiyahi, ma 'eguma 'ahwa'eda 'iso'e, geya 'eta taiya sawasawahina ma 'igudu, ma wete 'eguma 'igudu, geya 'eta taiya sawasawahina ma 'iso'e.

Tauna bewa 'ihepwaila 'oimiya, 'igwaeya, “Cimi paihowao yasanapu pwaidiya, ma wete yasanasanapu 'imi waiwai tupwana 'imiyamiya, weyahina 'igu he'itao wamuliyediya, ma wete sanigu geya wauhale. Coinega 'ahwa'eda yaso'e pwaiya weyahimi, ta geya 'aigeda taiya sawasawahina ma 'igudu.

“Moisa taudi Tomudulele 'ina bodao si'abowa ta sigwae 'abehega taudi meYudiya, ma geya. Cabwa yaloinaedi ma sinaoma matamiya ma si'etuluha, ma 'ane mabwaiyadi sisanapu 'abehega 'omi ya'atemuya muyaegomiya.

10 “Ma 'abwa tuta mwau 'ilatu bale'uwa, ma tomota mabwaiyadi 'itohodi, ma hesi 'omi mwauina 'oina ya'itayahigemi, weyahina 'igu gwae wahematamataneya, ma weyahigu wa'alama'i'ita.

11 “Cabwa yatauyawa, ma to'aha gide 'oimiya 'imiyamiya, wa'abiyahi momosidi ma geya'abwa taiya maisaina 'oimiyega 'i'ewa'ewa yahule. 12 Ma 'eguma 'oimiyega taiya 'ihewaiwai, yaloinae ma 'ihelogidi Yehoba 'ina Hada He'asisi weyahina, ma geya'abwa wete 'i'ebe'ebesine, ma 'oimiya Yehoba sanina 'abwa yalele, ma wete Yehoba 'ina 'asa sanina yalele, beno Yelusalema hauhaunaina, 'abwa galewega 'isuluma 'igu Yehoba 'oinega. Ma wete 'oimiya sanigu hauhauna yalele.

13 “Ceguma 'oimiyega taiya matenana Yaluyaluwa Tabuna 'ina gwae boda hekalesiyao 'oidiya 'ihesagohe.”

MeLeodisiya 'idi leta.

14 Aneloseina totapwalolowedi Leodisiya 'oina 'i'ita'itayahidi, 'ina leta 'ulele meLeodisiya weyahidi, ma 'ugwae: Tetela bewa 'itauyama Todumwalu 'oinega, tauna Tohepwaila moisa, ma wete tauna Yehoba 'ina paihowao lamuna 'ina hepwaila 'oimiya 'igwaeya,

15 “Cimi paihowao yasanapudiya 'abehega geya yahiyahi nuwana gogai. Nuwanuwagu tupwa 'aigeda 'oina wamiya, 16 ma hesi 'omi tuwa gamwagamwana, geya yahiyahi nuwana gogai 'idi tupwa wamiyamiya, ma 'ane 'ahwaguwega ya'esoha latuwegomi.

17 “Ma 'omi wagwae, ‘Taugu tohewasawasa ta ginaula mabwaiyadi sawasawahigu,’ ma geya wasanapu 'abehega 'omi tuwa towewelohe, ma hesi nuwagalagalaimi, ma wete matagibugibuimi ma bugebugewami. 18 Eeta yahenuwa laguwegomi ma 'oiguwega goula moisa wagimwane ma 'ane wahewasawasa, ma wete 'ale'o wa'ewa'e'edi wagimwanedi, ma wa'otedi. Geya'abwa mabubugewami watautauya. Wete mulamula wagimwane ma matamiya walagu, ma matami 'ilotayahala.

19 “Ma wanuwatuhuyahi 'abehega taiyawedi 'omi ya'atemuya muyaegomi, gwae pa'alinega ma loinega yagihe dumwaluwegomi. Coinega wahewaiwai ma 'imi puiyega wanuwabui.

20 “Ma wa'ita, taugu 'imi 'ahwa'eda 'oina yatotoholo ma yaulaula'e'e. Ma 'eguma taiya 'owa 'enagu 'uhesagohe ma 'ahwa 'uso'e, 'ino hada yaluhu ma 'owa ma taugu tahe'iya'iyagu, ma 'owa ba'idagu ta'ai mahemahetena.

21 “Ma 'eguma 'oimiyega taiya 'ihewaiwai, 'abwa yatagwala 'oina ma ba'idagu 'amiyatoi 'igu wagahata* wasawasa 'oina, gide tuwa taugu yahewaiwaiya, ta Tamagu 'ina wagahata wasawasaina 'oina ba'idagu 'amiya toiya.

22 “Ceguma taiya 'oimiyega matenana Yaluyaluwa Tabuna 'ina gwae boda hekalesiyao 'oidiya 'ihesagohe.”

Copyright information for `BDD