Revelation of John 6

Losipwaedi sebeni.

Eeta lamiina ya'iteya losipwa 'aigeda 'ilihasiya, ma hebaiyedi 'oidiyega 'enana 'aigeda gide gugula yahesagoheya 'igwae, “Cunaoma.” Coinega ya'e'ebubuna, ta 'aigeda hosi* wa'ewa'e'ena 'ilatuma, ma 'ana togeluina ma'ina tupu 'aleha eema 'aliliya, ma wete debana 'ana pasa wasawasa si'ebwaeya. Eeta 'itauya 'i'aleha ta 'ihewaiwaiya.

Ma lamiina losipwa heluwena 'ilihasiya, ma wete hebai heluwena 'enana yahesagoheya, 'igwae, “Cunaoma.” Coinega 'aigeda hosi bwehabwehalina 'ilatuma, ta 'ana togeluina waiwai si'ebwaeya ma 'aleha 'i'eweyama gogo gabulena, ma 'oinega tomota mabwaiyadi siboidimo sihe'upwa hiledi ta si'ehunuwa hiledi, ma wete 'elepa madouna si'ebwaeya.

Ta lamiina wete losipwa hetoina 'ilihasiya, ma wete hebai hetoina 'enana yahesagoheya 'igwae, “Cunaoma.” Coinega ya'e'ebubuna, ma 'aigeda hosi dubadubana 'ilatuma, ta 'ana togeluina ma'ina 'ebe lihe 'e'ahai weyahina. Ma 'aigeda gide tuwa 'enana hebaiyedi 'ehata gamwagamwanidiyega yahesagoheya, 'igwae, “Witi 'ana lihe 'aigeda 'ana maisa 'aigeda kina, ma wete ba'ali* 'ana lihe 'etoi 'ana maisa 'aigeda kina, ma hesi olibe holowina ta waini geya'abwa wa'abi'abitohodi.”

Coinega lamiina wete losipwa 'ehatana 'ilihasiya, ta hebai 'ehatana 'enana yahesagoheya, 'igwae, “Cunaoma.”

Coinega ya'e'ebubuna ma 'aigeda hosi 'ana 'ita tupwana tuwa wa'ewa'e'ena 'ilatuma. Ta 'ana togeluina sanina Camasa, ma wete Bwebweso* 'imuliyeya, ma loina silobeya Yehoba 'oinega, ta 'abehega tomota mabwaiyadi simutudi 'alehega ma gomaleyega ma lohalega ma wete totopwatula 'oidiyega, ta geya 'abehega tomota mabwaiyadi, ma tuwa 'eguma bale'u mabwaiyana 'oina boda tawatahidi 'adi baibaiwa 'ehata, ma 'aigeda boda 'oidiyega mabwaiyadi simutudi, ta boda 'etoimo situpwa.

Ma wete lamiina losipwa henimana 'ilihasiya, ta Yehoba 'ina 'ebepwaoli gabulena 'ana tohepwailao yaluyaluwadi ya'itediya, taudi mwalo bale'uwa Yehoba 'ina gwae 'ana tohepwailao bwebwe'adi, bewa tauna weyahina tomota silo'alehediya ta silohe'amasidiya. 10 Ma yaluyaluwaedi 'enadi madounega sibwaubwau, sigwaeya, “Bada tohewaiwai hedade, 'owa 'ausalau ma todumwalu, to tuta 'oina eema 'ama tolohe'amasao bale'uwa 'uloinaedi 'idi puiyao weyahidi?”

11 Coinega yaluyaluwaedi 'adi 'ale'o wa'ewa'e'edi 'i'ebwaediya, ta 'ihegwaediya ma tuta 'i'iunamo si'aiyawasi, 'ana siga tupwadi wete 'iyadiyao mebale'u silohe'amasidi, gide tuwa mwalo taudi silohe'amasidiya Yehoba 'ina paihowa weyahina, ma 'eguma 'adi hasihasila sawasawahina, 'oinega Yehoba mebale'u tolohe'amasaedi 'iloinaedi.

12 Ma wete lamiina losipwa hesikisina 'ilihasiya ta mwani'ini'i madouna 'ipilipili, ta sinala 'iguguyou, 'ana 'ita gide tuwa walata siyana, ta wete wai'ena 'ana 'ita mabwaiyana bwehabwehalina, bweyaha gide. 13 Ma 'ipwala sibe'uma galewega, gide 'ane 'aiwe 'ihuwa ta yaumai waiwaina 'itowama ta huwanaedi sigubagubala.

14 Ma galewa ya'iteya gide tuwa pepa 'inupiliya ma 'isawala, 'oinega 'oya 'aigeda 'aigeda ta bwanabwanao simiyabala hali tupwa 'oidiya.

15 Ma bale'u 'ana babadao, ma toloinao, ma 'aleha 'adi babadao, ma wasawasao, ma tohewaiwaiyao, ma wete tohanugetao 'idi topaihowao, mabwaiyadi sidena 'oyai, ta duluha ma dimwa 'oidiya si'edahwana. 16 Coinega siwuiwui dimwa ma 'oya 'oidiya, sigwaeya, “Wabe'uma debama, ma 'ane tauna wagahata wasawasaina 'oina 'imiyamiyatoi geya'abwa 'i'ite'itemai, ma wete lamiina geya'abwa 'i'ite'itemai. 17 Weyahina lamiina 'ina gamwasowala 'ana sabwelo madouna 'ilatu pwaima, ma geya 'eta taiya sawasawahina ma 'ihewaiwaisine.”

Copyright information for `BDD