Romans 1

Loyauwedo

Taugu Paulo, Yesu Keliso weyahina yahetopaihowa. Yehoba 'ihesinuwegauwa 'abehega tetelina bwebwe'ana weyahina yahetohepwaila. Tetela bwebwe'ana Yehoba mwalo 'igwae hemisaeya 'ina palopitao 'oidiya, ma sileleya Yehoba 'ina Buki 'oina. Tetelaina beno Yehoba natuna Yesu Keliso he'ote'otetelina. Tauna 'iheloheya masiha Debida 'ina susu 'alonega, ma muliyetega Yehoba yaluyaluwana 'ina waiwaiyega 'amasega 'i'abi hetoholo hileya 'ida Badaina, ta 'i'abi hemasaleheya 'abehega Yesuina Yehoba natuna.

Yesu Kelisoina tauna 'ihelauwegauwa ma 'ihesinuwegauwa 'abehega yahepwaila weyahina 'asa ganamuli mabwaiyadi 'oidiya, eema 'abehega sitagwala 'oina ma saninega sihemisa. Ma 'omi meLoma Yehoba 'ihelau pwaigomiya ta 'ihesinuwegomiya 'abehega weteyage Yesu Keliso 'ina bodaina 'oina wamiyamiya. Tamadai Yehoba ma 'ida Bada Yesu Keliso 'idi helauwega tuwa wamiya daumwala.

Paulo nuwanuwana meLoma 'ibo'enedi

Nugeta, yaloyauwedo Yehoba 'oina Yesu Keliso saninega, weyahina baibaiwami 'omi 'imi hemisa tetelina 'i'edadana 'asa mabwaiyana 'oidiya.

Yehoba 'isanapugauwa, tuta mabwaiyana yanuwanuwa tuhugomi 'igu 'ahwanoi 'oidiya. Yehobaina 'ina paihowa 'oina yaguibiga hedada, Natuna tetelina 'ana hepwaila weyahina. 10 Cigu 'ahwanoi Yehoba 'oina tuta mabwaiyana 'eguma togidega 'ida malamalai, ma yatauyawa yahabo'enegomi, 'eguma bewa gide 'ina nuwatuhu. 11 Weyahina nuwanuwagu ya'itegomi ma ya'abihetegomi eema Yaluyaluwa Tabuna 'ina 'ebwaya 'oinega wahewaiwai. 12 Bewa 'oinega 'omi ma taugu tahe'abi 'abihetena, 'aneyage 'omi 'imi hemisega wa'abihetegau, ma taugu wete 'igu hemisega ya'abihetegomi.

13 Tasigwao, wanuwatuhuyahi tuta baibaiwadi 'oidiya yanuwanuwatuhu madouna togidega ma yahabo'enegomi, ma geya 'ida malamalaiya 'oiguwa, weyahina nuwanuwagu ma 'igu habo'ena 'e'enina 'ida hapwesa. Gide 'ane 'igu habo'enaedi taudi hali tupwa ganamuli 'oidiya bewa sauga 'e'enidi silagulagu. 14 Weyahina 'ilobwainegauwa gide ma boda mabwaiyadi 'oidiya yapaihowa, taudi 'asa baibaiwadi 'adi tomiyao, taudi wete pwatula 'adi tomiya, ma tonuwa sonosonogao ma tohemwagemwageyao. 15 Eeta 'igu nuwatuhu madouna ma meLoma 'omi wete 'oimiya tetela bwebwe'ana yaloguguyae.

16 Tetelaina 'ana loguguya weyahina geya yada debamwadina, weyahina Yehoba 'ina waiwai 'oina 'imiyamiya, eeta 'eguma taiyawedi sihemisa 'i'abihetedi, beno tauma meYudiya 'oima ma muliyetega 'omi tomiya ganamuli 'oimiya. 17 Ta moisa tuwa tetela bewa 'ihe'itegita 'abehega 'ida hemisamo tuwa 'oinega Yehoba 'i'ahwa bwebwe'anegita. Weyahina Yehoba 'ina buki 'ihepwaila, 'igwaeya,

“Todumwalu 'idi hemisega yawasidi siloba.”

Tomota mumugadi galana

18 Yehoba wetenuge 'ina gamwasowala 'ihe'itaeyama galewega taudi mumugadi galadi mabwaiyadi 'oidiya, weyahina 'idi mumuga galana 'oinega mumuga dumwaluna sihegagaleya. 19 Ma Yehoba 'ana nuwatuhu 'i'abi hemasaleheya 'oidiya ta sisanapu pwaiya. 20 Yehoba geya tada 'iteya, mwalo hene bale'u 'ipaihoweya ma 'ana siga nige 'ina waiwai miyamiya hatayana tasanasanapu, beno ginaulaedi 'ipaihowediya 'oidiyega, 'abehega tauna Yehoba. Coinega tutaina mebale'u 'ihe'ewadi geya wete 'idi 'ebe gwaehilamo.

21 Ma sisanapuya tauna tuwa Yehoba, ma geya sida he'asisineya bo sida loyauwedowa 'oina, ma nuwatuhu besobeso 'oina sihewaiwai, 'oinega 'eda'eda guguyou 'atedi 'ilohemaheya. 22 Cabehega siboi si'ahwa'ahwa sonosonogaedi, ta sibuwa. 23 Weyahina Yehoba miyamiya hatayana si'ita guipaileya, ma tauna miyalaena beno 'idi 'ebe hemisao ginaula hagadi silagudiya, leleleidi sitagidiya 'adi 'ita gide tomota bo bwasumo bo hebahebai bo hebai 'awa'awalidi. Ginaulaedi sihemisaediya eeta sitapwatapwalolo 'oidiya.

24 Coinega Yehoba 'oidiya 'itagwala ma 'idi nuwatuhu dahwadahwanidi 'atediya simiyamiya sipaihowadi, eema nage 'oinega mahetediyao wahidiyega si'etala biyabiyaunedi 'eda'eda galana 'oidiyega. 25 Weyahina Yehoba 'ana he'ita moisa siguipaileya, ma 'e'abo'abo 'oinega sihemiyalaeneya, ta Yehoba ginaulaedi 'ipaihowediya 'oidiya si'etala he'asisi, ma hesi topaihowaina silogwahateya, tauna 'ana hepwatu miyamiya hatayana. Emeni.

26 Bewa 'oinega Yehoba 'itagwalediya ma 'idi nuwatuhu dahwanedi sipaihowadi. Cidi wahiwahineyao sipaihowa galagala, geya pui 'ana moisega, beno ma'idi 'ehewahiwahineyao silogwali hilediya. 27 Loheloheyaedi wete geya wahiwahine mahetediyao sida puiya, ma loheloheya daisidimo nuwanuwadi madouna, 'oinega mahetediyao pui 'ebe debamwadina sipaihoweya. Coinega 'eda galanaina 'ana maisa galana siboimo wahidiya silobaloba.

28 Bewa 'oinega Yehoba 'ana nuwatuhu geya nuwadi, eeta Yehoba 'itagwalediya ma nuwatuhu galadi 'ilohemahadi, ma ginaulaedi geya 'adi lobwaina tuwa sipaihowadi.

29 Ta gala mabwaiyana 'ilohemahediya, gide tobwatobwa 'ana henuhenuwa, ma mumuga galagala ma he'ipi'ipi ma lohe'amasa ma he'alagwaegwae ma 'e'abo'abo ma sosomane ma hetalapili, 30 ma taudi 'iyadiyao sigwaegwae galagalaedi, ma taudi Yehoba silolo'alehe, ma todebapa'ala ma tonuwa hanehane ma togagasa ma taudi mumuga galana 'ana to'abi hemadouwao, ta weteyage taudi sinadiyao ta tamadiyao geya sida he'asisiyanediya. 31 Ta moisa geya 'i'iuna mumugadi 'ida bwebwe'ana, 'oinega geya wete 'adi hemisamo, ta geya 'eta wete helau nuwana 'atemuyamuya 'oidiya.

32 Ma hesi tomotaedi Yehoba 'ina loina sisanasanapu, 'abehega 'eguma taiyawedi bewa gide simumuga 'esa, 'amasamo tuwa 'ilobwainediya. Ma tuwa mumuga galaedi sipaipaihowedi, ta 'eguma 'iyadiyao wete sihe'au'aunedi beno si'ahwa bwebwe'anedi.

Copyright information for `BDD