Romans 11

MeIsileli tupwadimo 'abwa simiya bwebwe'ana

1Ta bewa 'igu hesilala, togidega Yehoba 'ina boda meIsileli 'iguipailediya, bo geya? Geya! Weyahina taugu 'aigeda gwama Isileli, susu Beniyamina 'oinega, ma 'ima susu madouna 'ima babadega, sanina Ebalahamo.

2Coinega yasanapuya 'abehega tauma Yehoba 'ina tomotaiyao, mwalo hene 'ihesinuwanemaiya ma 'abehega 'ina bodao, ee 'oinega nata geya 'ilolososomanemai. Ma mwalo heneyage, Ilaitiya meIsileli 'ilomugiyediya Yehoba 'oina, ta 'ina Bukiya 'ileleya, 'igwaeya, 3“Bada yo, 'ino palopitao mabwaiyadi silohe'amasidiya, ma 'ino pwaoli bwasaina si'abihegaleya, ma yaboigumo yatupwa, ma nuwanuwadi bewa tuta wete silohe'amasigau.”

4Ma Yehoba Ilaitiya 'ihegwaeya, “Geya 'abehega 'uboimo 'umiyamiya, beno wete 'igu bodao site sebeni tausani simiyamiya, taudi Ba'ala* 'oinega yahahegagaledi, eeta geya 'oina sida tuluha.”

5Bewa sauga wete gide Yehoba 'ina bodao meYudiya, 'ai'aigedamamo 'ihesinuwemaiya 'ina helauwega, eeta tauma bewa 'atupwa 'amiyamiya. 6Cetolihasaina 'alobeya, geya 'abehega 'ima paihowa 'oidiyega ma hesi Yehoba 'ina helau 'oinega, weyahina 'eguma helau ma'ana maisa, beno geya helau moisa.

7Bewa lamuna 'oinega meIsileli mabwaiyadi 'etolihasaina si'ebesa 'asaeya, ma tauma tupwatupwamamo hesiyage Yehoba 'ina bodao hesihesinuwama 'etolihasaina 'alobeya, weyahina meIsileliyedi mabwaiyadi deba pa'apa'alidi eeta geya siloba.

8Ma Yehoba 'ina Buki wete gide 'ihepwaila 'esa, 'igwaeya,

“Nugeta hene 'ana siga nige bewa Yehoba 'idi nuwatuhu 'i'e'abi buidiya, ta matadi 'igihegibudiya, ma tenadi 'igihetuidiya.”
9Ma Debida wete gide 'ina hepwaila 'igwaeya,

“Sawasawahina 'idi guyai 'oidiyega 'adi loina siloba, ma gide si'wa 'oidiyega sisi'wediya, ma wete gide sa'e 'oidiya sibe'uwa.
10Ta 'ilobwainediya tuwa simata gibugibu, ma 'ane geya sowana to'aha si'ita'ita, ma wete tuta mabwaiyana 'adi 'aha'ahala mwauna 'oidiyega tuluhadi silotayohu hataya.”

Cetolema taudi geya meYudiya weyahidi

11Taudi Yudiyaedi situpa eeta togidega 'adi loina? Cabehega nage sibe'u hataya ma nata geya wete sitohotoholo hila, bo? Nata geya! Cabwa sitoholo hila! Ma hesiyage wanuwatuhuyahi 'abehega taudi sipuiya, eeta 'omi tomiya ganamuli 'etolema walobeya, ma meIsileliyedi nata sihe'ipi'ipiyegomi. 12Ta moisa, 'omi geya meYudiya 'etolemanaina walobeya, weyahina meYudiyaedi si'elobe'uwa, ma 'eguma sitoholo hilama beno 'ebe yaliyaya madouna mabwaiyada 'oida.

13Cigu hegwaegwae bewa 'omi tomiya ganamuli weyahimi. Taugu Yesu Keliso 'ana tohepwaila mabwaiyami 'oimiya, eeta 'igu paihowaina weyahina yagwae hane, 14ma 'omi tomiya ganamuli nata taudi meYudiya sihe'ipi'ipiyegomi, ma 'ane 'idi he'ipi'ipiina weyahina nuwadi sibuidi ma 'etolema siloba Yehoba 'oinega. 15Ma Yehoba meYudiya 'iguipailediya ma 'abehega 'omi tomiya ganamuli 'i'ahwa 'iya'iyaguwegomi, eeta tolahisa 'eguma meYudiyaedi si'auta hilama, beno 'ausala hedade, ma 'ana 'ita nata gide 'abwa taudi 'amasega sitoholo hila.

16Ma tubudiuina Ebalahamo moisa Yehoba 'ina loheya, eeta taudi wetenuge Yehoba 'ina tomotaiyao. Eema 'ebe'ita 'aigeda bewa ya'ebwaegomi. Ceguma 'wateya ma'ehauna wa'ita ma 'ausalana, beno wasanapu pwaiya 'abehega 'e'etahi nata bwebwe'ana. Gide wete 'eguma 'aiwe 'eta lamuna wa'ita ma 'ausalana, beno wete wasanapu pwaiya 'abehega lahalahanaowedi bwebwe'adi.

17Eeta taudi meYudiya gide tuwa Yehoba 'ina 'aiwe lahanao tupwadi silotalasa, ta 'omi 'oimiyega 'ihemiyalaenediya, weyahina 'omi hali 'aiwe lahanao ma 'ihesinuwegomiya, ta 'ina 'aiweina 'oina 'ilagu hepa'igomiya, ma 'ina 'aiweina 'oinega 'ana we'ahega wanumanuma, beno Yehoba 'ina helau walobeya. 18Ma hesiyage 'ina helauina sahena weyahina wagwaegwae hanehane, weyahina laha geya sowasowahina lamu 'iloinae, ma lamu hesiyage sawasawahina laha 'iloinaedi.

19Weyahina 'eguma wanuwahane, ma wagwae, “Yehoba 'ina 'aiwe lahanao 'ilasa pwaidiya, eema tauma 'oimega 'ihemiyalaediya.” 20Beno moisa. Ma hesiyage wanuwatuhuyahi beno lagalagaedi 'ilasediya weyahina geya sida hemisa, ma 'omi 'imi hemisega yawasimi bwebwe'ana walobeya. Eeta 'ami lobwaina Yehoba wamataute ma sahena wanuwanuwa hanehane. 21Nata gide lahalahaedi 'ane Yehoba 'ina 'aiwe moisa 'oinega 'ilasalasa yahulediya, 'i'ewahiladi ma 'ihemiyalaenegomi, ma 'omi 'i'ewa yahulegomi.

22He'ita bewama ta'iteya Yehoba 'ina helau ta 'ina loina pa'ala, weyahina tobe'u 'oidiya 'ina loina pa'alina 'ilagulagu, ma hesi 'omi 'ihelauwegomiya, ma 'eguma 'ina helauina walogwahate, 'omi wete 'ilasa yahulegomi. 23Ta 'eguma meYudiyaedi sinuwabui ma sihemisa hila, nata wete Yehoba 'oina 'ilaguhepa'i hiladi, weyahina Yehoba sowasowahina ma gide 'ipaihowa 'esa.

24Ma 'omi geya meYudiya wanuwatuhuyahi 'abehega mwalo 'omi hali 'aiwe lahanao, ta geya Yehoba 'ina 'aiwe 'oina wada miya, ma 'ina paihowa 'ebe henuwanainaida madouna 'oimiya 'ipaihoweya, weyahina 'ina 'aiwe 'oina 'itubwegomiya, ma meYudiyaedi taudi Yehoba 'ina 'aiwe lahanao moisa sawasawahina wete 'ilagu hepa'ihiladi 'ina 'aiweina 'oina.

MeIsileli 'adi 'abihetena

25Ciyagwao, nuwanuwagu ginaula 'aigeda dahwadahwaina meIsileli weyahidi yahepwaile 'oimiya ma 'ane sahena wanuwanuwa hanehane, ma ginaula bewa wasanapu 'abehega nata meIsileliyedi sidebapa'ala 'ana siga 'omi tomiya ganamuli hesihesinuwami mabwaiyami 'abihetena wa'ewa.

26Ma 'ane meIsileli mabwaiyadi 'abihetena 'abwa siloba. Weyahina Yehoba 'ina buki 'oina 'ihepwaila, 'igwaeya,

“To'abihetenaina, gwama Saiyoni, 'abwa 'ilatuma, ma susu Yakobo 'idi puiyedi 'i'ewayahuledi.
27Ma tutaina 'eguma 'idi puiyedi ya'ewayahuledi, nata gwae hemisa 'ausalana ya'ebwaedi.”
28Ma bewa tutaina moisa meYudiyaedi Yehoba silolo'alehe, weyahina tetela bwebwe'ana siguipaileya, 'oinega 'omi tomiya ganamuli 'abihetena wa'eweya, ma hesiyage wanuwatuyahi 'abehega meYudiyaedi Yehoba 'ihelauwediya, weyahina mwalona tubudiyaowedi Yehoba 'ihesinuwediya 'ina bodao. 29Ma geya sawasawahina Yehobaina mumugana, ma 'ina hesinuwa, nuwana 'ina helau, 'oidiyega 'ibui.

30Ma 'omi geya meYudiya hesiyage mwalo geya Yehoba wada muliyeya, ma bewa tutaina Yehoba 'ina 'atemuyamuya walobeya, weyahina meYudiyaedi Yehoba siguipaileya.

31Wete gide taudi 'abwa Yehoba 'ina 'atemuyamuya siloba, gide 'omi tuta bewa walobeya. 32Eema tologuipaila mabwaiyada bewa gide Yehoba 'imumuga 'esegita ma 'abehega 'ina 'atemuyamuya 'ihe'itegita.

33Ma moisa, Yehoba 'ina loina ta 'ina sanapuwao sihemadou hedada, ta geya 'eta wete taiya 'oidega sawasawahina Yehoba 'i'epatei ma 'ina nuwatuhuwao ta 'ina paihowao 'isanapudi, nata tahiya'asae. 34Cina sanapuina 'imadou hedada, ta geya sawasawahida tahututao ma 'abehega 'eta to'aha nata 'oina tahe'ita, 35nuwana 'eta to'aha weyahina 'ana haga talagu ma 'ihemaisa 'oida.

36Weyahina tauna ginaula mabwaiyana 'adi topaihowa, ma tauna wete 'ina waiwaiyega 'iboi weyahina 'ipaihowediya. Eeta Yehobaina tauna tahepwatu hatae. Emeni.

Copyright information for `BDD