Romans 3

1Ceguma gide, to'aha hede 'ana bwebwe'ana tauda sigwaegwaenegita sigwaeya meYudiya? Ma wetenuge to'aha Ebalahamo 'ina 'ila'ilalaina 'ana bwebwe'ana wahida si'upwa'upwa?

2Ta ginaula bwebwe'adi baibaiwadi 'oida simiyamiya. Ma ginaula nugenugetaina beno Yehoba 'ina gwae 'oida 'ilaguyama.

3Ma togidega, 'eguma tupwadi Yehoba siguipaileya, wanuwatuhuya 'abehega Yehoba wete nata 'iguipailegita, bo geya? 4Nata geya! Weyahina bwagana tauda mabwaiyada to'e'abo'abo, ma Yehoba tuwa 'iboimo dumwadumwaluna. Yehoba tauna weyahina 'ina Buki gide 'ihepwaila 'esa, 'igwaeya

Cabehega 'ina gwaeyega si'ahwamoisae, ma 'ina yatala 'oina 'ihewaiwai.
5Ma 'eguma 'ida mumuga galana 'oinega Yehoba mumugana bwebwe'ana 'imasaleha bwaibwaina, to'aha nata tagwaene? Bo nata tagwae, “Yehoba yo, 'ima mumuga galana weyahina sahena 'uloiloinaemai.” Moisa bewa yahegwaegwae besobeso tuwa gide tupwadi tomota sigwaegwae 'esa.

6Ma wanuwatuhuyahi 'abehega Yehoba tauna toloina dumwadumwaluna, 'oinega bwa'omatana 'ana tuta 'oina nata 'ina loina dumwadumwalunega mabwaiyada 'iloinaegita.

7Coinega tupwadi to'e'abo'abo sigwaegwaenegau, sigwaeya, “Cino loguguya 'oina 'ugwaeya 'abehega 'igu 'abo 'oinega Yehoba mumugana dumwadumwaluna 'i'abihelatuya tomota 'oidiya ta Yehoba sihepwatuweya, ta nata Yehoba geya sowana 'i'ahwa'ahwa galagalaegau. Coinega 'ilobwainemaiya tauma wete 'apaihowa galagala, ma 'ane ginaula bwebwe'adi silatu.” Taudi tomotaedi gwaenigu sigwaegwaene 'ilobwainediya Yehoba 'iloinaedi.

Geya 'eta taiya mumugana bwebwe'ana

9Ma togidega tauda meYudiya 'ida miya 'ibwebwe'ana hedadeya, ta taudi tomiya ganamuli 'idi miya geya bwebwe'ana? Geya! Weyahina yahe'ita pwaigita 'abehega mabwaiyada topui. 10Gide Yehoba 'ina Buki 'ihepwaila, 'igwaeya,

“Geya 'eta taiya mumugana dumwadumwaluna.
11Ma geya 'eta wete taiya Yehoba 'isanapu, bo nuwanuwana ma 'ida sanapu. Tuwa geya uleulena!
12Moisa tuwa, tomota mabwaiyadi sitauya puiya, ta pui 'ana 'eda 'oina silatuwa. Geya 'eta wete taiya 'ina paihowa bwebwe'ana.
13Cahwadi gide galiha so'eso'ena, ma 'oinega 'e'abo'abowedi galadiyedi silatulatuma, Ma wete 'idi gwaeyao galadi gide mwata, nuwanuwadi 'oidiyega tomota silohe 'amasidi.
14Ma tuta mabwaiyana heliya galadi 'ahwadiyega silatulatu.
15Ma he'upwa ta lohe'amasa nuwadi 'i'eweya.
16Ma to tupwa 'oina siha'esa 'idi 'abihegala leleyana 'imiyamiya.
17Geya 'eta nuwadaumwala bo he'ahwa'iya'iyagu sisanapu.
18Ma wete geya Yehoba 'ana matauta 'oidiya 'imiyamiya.”
19Ma tasanapu pwaiya 'abehega Mosese 'ina loinao beno meYudiya 'ada loina 'oinega geya sowana 'eta taiya 'igwaegwae hila tutaina Yehoba 'ina bwa'omatana 'ana tuta 'oina, weyahina tomiya bale'u mabwaiyada togala. 20Yehoba 'ina 'ahwamoisa geya Mosese 'ina loina 'ana guibiga 'oinega tada lobeya, weyahina loina 'ina paihowa beno 'ida pui 'ihehepwailedi.

Ceguma Yesu tahemise Yehoba 'i'ahwa bwebwe'anegita

21Coinega bewa tuta Yehoba 'ada 'ahwabwebwe'ana 'i'abihelatuya, 'abehega geya loina 'oinega, ma hali 'eda'eda 'oinega hesiyage. Ma 'eda'edainaina Mosese 'ina loina ta palopitao sihepwaila pwaiya, 22'abehega Yehoba mabwaiyada 'i'ahwa dumwaluwegita Yesu Keliso 'ana hemisa 'oinega, ma geya sowana 'eta taiya wete wataha 'i'abi'abihelatu tauda meYudiya ma tomiya ganamuli gamwagamwanida. 23Weyahina mabwaiyada togala, ma tamiya bwagabwaga Yehoba 'ina 'asilala 'oinega. 24Ma hesi Yehoba 'ina 'atemuyamuya ma 'ihelauwa 'oida, ta Yesu Keliso 'ina paihowega 'ilihasigita 'ida pui 'oidiyega, ma 'oinega Yehoba 'i'ahwa dumwaluwegita.

25Moisa tuwa, Yehoba natuna 'itagwaleya ma 'abehega 'ina 'amasega 'itoehilegita Yehoba 'oina, ma mahetedai tahe'iya'iyagu, beno 'eguma Yesu tahemisae. Bewa 'oinega Yehoba mumugana bwebwe'ana 'ihe'itegita, weyahina mwalo heneyage mumugada galana geya 'ida hemaisediya, ma tuwa 'i'alama'i'itana 'ana siga Yesu Keliso 'ihewasaeyama, 'isuluma 'oida.

26Eeta tuta bewa 'ina mumuga bwebwe'ana 'ihe'itegita 'abehega tauna todumwalu, weyahina Yesu 'ana tohemisao tauda 'i'ahwa bwebwe'anegita. 27Ma togidega, sowasowahida bewa ginaulina weyahina tagwae hanehane? Geya! Weyahina 'ida hemisa tuwa 'oinega 'i'ahwa'ahwa dumwaluwegita, ma geya loina 'ana hematamatana 'oinega. 28Eeta nuwatuhu bewama 'ana lohegogona 'abehega tauda tomota 'ida hemisega Yehoba nata 'i'ahwa bwebwe'anegita, ma geya loina 'ana hematamatana 'oinega.

29Bo hedeyage Yehoba tauda meYudiyamo 'ida Yehoba, ma hali 'asa geya? Geya taboi damo! Casa mabwaiyadi mahetedao 'ida Yehoba 'aigeda tuwa. Yehoba nata tauda meYudiya ma tomiya ganamuli wete 'i'ahwa dumwaluwegita 'ida hemisega.

31Coinega togidega bewama 'ana sanapu, loinaina 'abehega tabuiyahule ta hemisa tada 'abiyahi, 'awa? Sahena! Ma hesi sawasawahina loina tahe'asisiye ma 'oida 'ihemadou.

Copyright information for `BDD