Romans 4

Ebalahamo 'ida 'ebe'ita

1Coinega to'aha nata tagwaene Ebalahamo weyahina, 'iboi tuwa tubudaina mabwaiyada 'oinega tamasalehama? 2Ebalahamo ginaula bwebwe'adi 'ipaihowediya ta debanega sowasowahina 'igwae hanehane, ma geya 'ida gwae haneya Yehoba matana, ma 'ina hemisamo weyahina Yehoba 'i'ahwa bwebwe'aneya ma geya 'ina paihowa bwebwe'adi weyahina. 3Ma Yehoba 'ina Buki gide 'igwaeya, 'igwae,

“Ebalahamo Yehoba 'ihemisaeya, bewa weyahina Yehoba 'ahwa bwebwe'ana Ebalahamo 'i'ebwaeya.”
4Gide tuwa 'eguma loheya 'ipaihowa ma 'ana maisa 'iloba, beno geya helau, ma hesi 'ina paihowaina huwaina. 5Ma 'eguma taiya 'ina pui 'adi nuwasam weyahina geya 'ida paihowa, ma 'ihemisamo tuwa Yehoba 'oina, tauna tohemisaina 'ana hemisega nata 'ahwa bwebwe'ana Yehoba 'oinega 'iloba.

6Ma Debida wete gide 'igwaeya mwalo, 'abehega taiyewedi Yehoba 'i'ahwa bwebwe'anediya beno geya 'idi paihowa 'oinega, ma hesiyage 'idi hemisega 'i'ahwa bwebwe'anediya. Ta wete 'idi yaliyaya weyahidi 'ihepwaileya, 7'igwaeya,

“Toyaliyaya moisa taudi 'eguma 'idi puiyao Yehoba 'inuwasamudi ma 'ideulidi.
8Ma nata geya wete 'i'ahwa'ahwa galagalaedi.”
9Ta yaliyayaina weyahina Debida 'igwae nugeteya, togidega tauda meYudiya 'wapida si'upweya taudamo weyahida. Geya taudamo. Taudi geya meYudiya mahetedao ta'ewa. Yehoba 'ina Buki 'ihepwaila pwaiya beno,

“Ebalahamo 'ina hemisega 'ahwa bwebwe'ana 'ilobeya.”
10Ma Yehoba Ebalahamo 'i'ahwa dumwaluweya tutaina 'abwa Ebalahamoina geya 'wapina si'upwa. Bewa sanina 'ila'ilala tuwa, ma 'ihe'itegita 'abehega Ebalahamo 'ina hemisega 'ahwadumwalu 'i'ewa nugeteya Yehoba 'oinega, muliyetega 'ila'ilalaina si'upweya 'wapina. Eeta taiyawedi geya 'ila'ilalaina wahidiya ma tuwa sihemisa, beno 'idi hemisaina weyahina nata Yehoba 'i'ahwa dumwaluwedi, ma 'oinega taudi Ebalahamo natunao moisa.

12Ma tauda wete Ebalahamo tamadai 'eguma 'ila'ilalaina ta'eweya 'wapida, ta geya 'abehega 'ila'ilala tuwa weyahina. Ma 'ida hemisa gide tuwa mwalo Ebalahamo 'ina hemisa, tutaina geya 'ila'ilala si'upwa wahina.

Ebalahamo 'ina hemisega gwae hemisa bwebwe'ana 'ilobeya

13Ma Yehoba Ebalahamo 'igwae hemisaeya 'abehega tauna ma'ina susuwao bale'u mabwaiyana 'abwa siloinae. Ta 'ina gwae hemisa bewa geya 'abehega Ebalahamo 'ina guibiga loina weyahina, ma hesi 'ina hemisa weyahina, 'oinega Yehoba 'i'ahwa bwebwe'aneya.

14Moisa tuwa Yehoba 'ina helau 'oida geya 'abehega loina 'ana guibiga 'oinega, ma hesi 'ina gwaehemisa 'oida 'ana hemisa weyahina. Ceguma tagwae 'abehega Yehoba 'ihehelauwegita loina 'ana guibiga weyahina, beno 'ana 'ita gide hemisa ta'ita sinaliya, ma wete Yehoba 'ina gwaehemisa 'oida taheginaula besobesoweya.

15Ma loina 'oinega Yehoba 'ina gamwasowala 'oida 'ilatuwa, weyahina loinaina taligehiya. Ma hesiyage 'eguma Mosese 'ina loinaedi geya 'ilagudi, geya sowana taligehidi.

16Bewa 'oinega tasanapu 'abehega hemisa tuwa 'oinega gwae hemisaina 'ana bwebwe'ana 'abwa taloba. Ma bewa Yehobaina 'ina helau tuwa ma geya 'abehega 'ida paihowa 'ana maisa. Ta gwaehemisaina Ebalahamo tubunao mabwaiyada talobeya, geya 'abehega loina 'ana toguibigao siboidimo, ma weteyage taiyewedi 'idi hemisa gide Ebalahamo 'ina hemisa ee taloba. Ebalahamoina tauna gide mabwaiyada tamadai.

17Gidemusa Yehoba 'ina Buki 'oina 'igwaeya,

“Cowa yahesani pwaigowa 'abehega 'asa mabwaiyadi tamadiu.”
Ta Ebalahamo 'ina hemisa 'ilaguya Yehoba 'ina gwae hemisaina 'oina, tauna Yehobaina sowasowahina to'amasa 'i'abihe toholohiladi, ma weteyage to'aha geya sida 'elomasaleha sowasowahina 'igwae ma si'elomasaleha.
18Ma Ebalahamo 'inuwatuhu yahiya madouna gwae hemisaina 'abehega tauna 'asa mabwaiyadi tamadiu, ma 'abehega tuta 'inaonaoma 'abwa 'ilatu gide, ma bwagana tuta gala hedadena 'ilobeya tuwa 'i'alama'i'itana, weyahina bewa gide Yehoba 'ihegwae 'eseya,

“Cabwa muliyetega tubumwao baibaiwadi silatu.”
19Ebalahamo 'i'iunamo ma 'ana bolime handeledi 'iloba, ta wahina mabwaiyana si'elowe'a, ta 'ihetautaubada seheya, ma mwanenaina Sela wetenuge wahine 'aga'agalina, ma Ebalahamo bewa geya weyahidi 'ida nuwatuhuwa, ma 'ina hemisa beno 'ina 'ebetuhila madouna. 20Cina hemisaina geya 'iguipaile, ma hesiyage Yehoba 'ina gwae hemisa 'i'abiyahi momosiya, ta 'ina hemisaina 'ihewaiwaiya ma 'ihepwatu Yehoba 'oina. 21Weyahina 'isanapuya moisa Yehoba sowasowahina 'ina gwae hemisaedi 'ipaihowadi. 22Bewa 'oinega Ebalahamo 'ina hemisa weyahina Yehoba 'i'ahwa dumwaluweya.

23Ma 'ahwa dumwaluina Yehoba 'ina Bukiya geya 'abehega Ebalahamo 'iboimo weyahina, 24ma tauda weteyage weyahida sileleya, 'ida hemisa Yehoba 'oina talaguya, tauna Bada Yesu Keliso 'amasega 'i'abihetoholo hileya.

25Tauda tuwa 'ida pui weyahina Yesu 'i'amasa, ma Yehoba 'i'abihetoholo hileya, ta beno 'oinega 'ideuligita ma 'i'ahwa dumwaluwegita.

Copyright information for `BDD