Romans 7

Hai 'oinega 'igwae hegehegediya

1Ciyagwao, Mosese 'ina loina wasanapuya loheya yawasina 'ina tautauya weyahina. Tutaina loheyaina 'i'amasa loinaina geya'abwa wete 'oina 'imiyamiya.

2Cebe'ita bewa 'aigeda ta'ita hai weyahina. Mosese 'ina loina 'igwaeya gide, 'abehega 'eguma wahine 'ihai mamwanena simiyamiya ee 'ana siga 'amasa, ma 'eguma mwanenaina 'i'amasa nata geya 'eta wete loina 'oinega 'ilobaloba. 3Ma 'eguma wahineina mwanena 'imiyamiya ma 'ihaibala hali loheya 'oina, beno pui 'ipaihoweya. Ma 'eguma mwanenaina 'i'amasa ma hali loheya 'oina 'ihaibala, beno geya pui, weyahina mwanena nugenugetanaina 'ina loina 'oinega 'igumwala.

4Ciyagwao, he'ita bewa 'ilobwainegomiya, weyahina Keliso 'ilihasigomiya Mosese 'ina loina 'oinega. Weyahina Kelisoina wahina mahetemiu wa'amasa, ta mahetemiu wete watoholo hila 'amasega. Ma tauna totoholo hilamaina beno 'ida Bada 'ehauna, ma 'ane mahetedai Yehoba 'ina paihowa 'oina taguibiga bwaibwaina.

5Weyahina mwalo tauda mumugada gide gogo gabulena mumugana, bwagana Mosese 'ina loina tasanapuya, ma nuwatuhu galadiyedi 'oida sihewaiwaiya ma yahuda mabwaiyadi simumuga galagala, ta 'ana maisa 'amasa 'abwa nata taloba. 6Ma bewa tuta loinaina 'oida 'igumwala, weyahina mwalo loinaina 'oinega gide 'ipaigita ma ta'amasa Keliso mahetedai, 'oinega Kelisoina 'ada paina 'oidega 'ilihasiya, ma bewa tutaina sowasowahida tapaihowa bwaibwaina. Weyahina Yehoba Yaluyaluwana 'ina waiwai 'oida 'imiyamiya, ma hesi Mosese 'ina loina leleleinaina geya 'ina waiwaimo, geya sowasowahina 'i'abi hedumwalugita.

Cida pui weyahidi

7To'aha nata tagwaene Mosese 'ina loinaina weyahina? Cabehega 'ina loinaedi galadi bo geya? Geya galadi. Ma hesi 'eguma geya loinaedi sida latulatu, geya sowana wete pui 'ilatulatu. Ta nuwana 'eguma geya 'eta loina 'igwae gide, “Sahena matalolo”, beno geya sowasowahina wete tasanapu to'aha matalolo. 8Ta loinaina 'oinega 'igu pui 'i'abi hemadouya, ee 'abwa hesi yamatalolo ginaula baibaiwadi weyahidi. Ta 'eguma loina geya, 'igu pui wete geya.

9Taugu wete gide, mwalo mayawasigu yamiyamiya, geya 'eta wete loina 'oiguwa, ma tuta loina 'oiguwa 'ilatuwa, ee pui 'oiguwa 'ihewaiwaiya, 10eeta loinaina 'ilohe'amasigauwa. Loinaina bwebwe'ana ma wete yawasi lamuna, ma hesi yaboi tuwa loinaina geya yaguibiga bwaibwaini. 11Weyahina pui 'i'abowegauwa, eeta loinega 'ilohe'amasigauwa.

12Loinaina tasanapuya 'abehega 'ausalana, ma 'ana lohatotowedi mabwaiyadi wete 'ausaladi, ma dumwaludi, ta mabwaiyadi bwebwe'adi, geya 'eta galana. 13Ma togidega hede ta loinaina 'ausalanaina 'ilohe'amasigauwa? Ma hesi geya! Geya sowasowahina ginaula bwebwe'ana 'ilohe'amasi daidaisigita, ma hesi to'aha galana 'ateguwa loina 'ausalana 'ihe'abeyeya, ma 'oinega 'ilohe'amasigauwa. Coinega tasanapuya 'abehega mumuga galadi 'ateda simiyamiya, ma loina 'oinega tasanasanapu 'abehega gala hedadena.

Yaluyaluwada ma wahida 'idi paihowa

14Tasanapuya 'abehega Mosese 'ina loinaina Yehoba 'oinega 'i'eweya, ma taugu mumuga bale'u 'iloinegauwa eeta yagala. 15Ma hesi geya yada sanapuya to'aha weyahina ginaula galadi yapaipaihowadi, weyahina to'aha gide 'abehega yaguipailedi beno yapaipaihowadi, ma weteyage ginaulaedi nuwanuwagu yapaihowadi ma geya yada paihowediya.

16Ta moisa, Mosese 'ina loinaedi ya'ahwa moisaediya, weyahina galanaina yapaihoweya geya bwebwe'ana 'oiguwa, 17ta geya taugu tuwa 'igu paihowa, ma hesiyage lotohona galana 'ateguwa 'ina paihowa.

18Yasanapuya 'abehega geya 'eta mumuga 'ausalana wahiguwa, weyahina mumuga bwebwe'ana nuwanuwagu, ma hesi geya sowasowahigu yapaihowa. 19Nuwanuwagu madouna ma mumugagu 'ibwebwe'ana, ma 'iyamo geya gide yada 'esa, weyahina galanaina yalolowahi'wate ma tuwa yapaipaihowa.

20Bewa 'oinega tasanapuya 'abehega puiina yapaihoweya geya yaboi tuwa 'oiguwega, ta hesi lotohona galanaina 'ateguwa 'ina paihowa. 21Ginaula bewa 'oidiyega sihe'ita bwaibwainigauwa 'abehega 'eguma to'aha bwebwe'ana nuwanuwagu ma yapaihowa, nata galanaina mane gide tuwa ma yapaihowa.

22Ta yasanapuya 'abehega yaluyaluwagu nuwanuwana ma Yehoba 'ina nuwatuhu yapaihowa, 23ma hesi hali loinao taudi wahiguwedi 'oidiya siloinaegauwa. Tuta mabwaiyana lotohona galana 'ateguwa 'ihehewaiwai hedade ma 'igu nuwatuhu bwebwe'ana 'i'abi'abihewe'a, ma wahigu 'ina paihowa galana 'oinega pai ma 'amasa yalobediya.

24Ta moisa, nuwagalagalaigu! Weyahina geya 'eta taiya sowasowahina ma wahigu 'ina paihowa galana 'oinega 'i'abihetegau. 25Ma hesiyage yaloyauwedo Yehoba 'oina, weyahina 'ida Bada Yesu Keliso 'ilemegauwa. Ta bwagana 'ateguwa yatagwala moisa Yehoba 'ina loina 'oina, ma 'iyamo wahigu nuwanuwana loina galana.

Copyright information for `BDD