Romans 9

Yehoba 'ina bodao meIsileliyedi

1Ciyagwao, geya ya'abo, nuwagu 'igala moisa 'igu susuwao meIsileli weyahidi, ma tuta mabwaiyana 'ategu 'imuyamuya weyahidi, weyahina Keliso geya sida hemisaeya. Cigu gwae bewa Keliso ma Yaluyaluwana Tabuna sisanasanapu 'abehega yagwaegwae moisa. 3Ma weyahidi yanuwanuwatuhu madouna 'eguma togidega ma Yehoba 'ina helauina 'i'ebwaegauwa, beno Yesu Keliso, 'oiguwega 'i'ewa ma 'i'ebwaedi 'igu bodaedi, ma taugu 'ana mwau yaloba, taudi weyahidi. 4Ta moisa 'igu bodaedi beno mwalo Yehoba 'ihesinuwa pwaidiya ta 'i'ahwa natunediya. Cina wasawasa ma 'ina gwae hemisao eema 'ina loinao bwebwe'adi 'i'ebwaediya. Ma wete tapwalolo ta ginaula 'ausaladi 'igwae hemisaeya babada nugenugetadi 'oidiya. Taudi gide Ebalahamo ma Aisake ma Yakobo, eeta muliyetega Ebalahamo 'ina susuina 'oinega Keliso 'ilatuma. Tauna Yehobaina tahepwatuwe tuta mabwaiyana 'oidiya, 'iboi 'ihane hedadeya. Emeni.

6Yehoba 'ina gwaeyedi bewa geya 'ehetete, ma hesiyage huwaina 'i'abihelatuya susu Isileli moisa 'oidiya, ta geya wete susu Isileli mabwaiyadi 'oidiya, ma tuwa hesihesinuwadimo. 7Ta 'ana moisa beno Ebalahamo 'ina susuwao mabwaiyadi Yehoba geya 'ida 'ahwa natunedi, weyahina Yehoba Ebalahamo 'ihegwae pwaiya, 'igwaeya,

“Cino susuwao beno natuina Aisake natunao,”
ma geya wete taiyawedi tasina natunao 'oidiyega.
8Gwae bewa 'ana sanapu 'ihe'ita pwaigita moisa, beno Yehoba natunao geya Ebalahamo 'ina susu 'oinega, ma hesiyage taiyawedi taudi Yehoba 'igwae hemisaediya. 9Weyahina mwalo Yehoba Ebalahamo 'oina 'igwae hemisa, 'igwaeya,

“Cabwa tuta yahesinuwaneya matada 'oina yahilama ma natuu loheyana ya'ebwaego mwaneu Sela 'oinega.”
10Ta gide wete tubumai Aisake 'iheloheya ma Libeka 'ihaiya, ta natudiyao didiluwaluwa 'i'elagatediya, ta 'abwa 'ina tuta 'ahalaina ma Yehoba Libekaina 'ihegwaeya, 'igwaeya,

“Ceguma natumwaowedi 'uhenatunedi, 'alomau 'abwa tolenugetainaina 'iloinae.”
Eeta bewa Yakobo ma Iso* 'oidiyega tasanapu bwaibwainiya 'abehega gwagwamaidiyedi geya 'idi paihowa bwebwe'ana nuwana galana 'oidiyega 'ihesinuwedi, ma hesi 'iboi 'ina gwae hemisa 'oinega. Weyahina Yehoba 'ihesihesinuwa geya tomota 'idi paihowega ma hesi 'iboinamo 'ina nuwatuhuwega.
13Yehoba gide wete 'ihepwaila 'ina Bukiya 'igwaeya,

“Yakobo yahelauweya madouna, geya Iso.”
14Cabwa to'aha hede nata tagwaene Yehoba 'ina paihowa bewa gidemusa, galana bo geya? Geya galana! 15Weyahina Mosese 'ina loina 'oina Yehoba 'igwaeya,

“Ceguma taiya nuwanuwagu yahelauwe nata yahelauwe, ma 'eguma taiya wete ya'atemuyamuyae, nata wete ya'abihete.”
16Ma bewa 'ihe'itegita 'abehega Yehoba 'ina helau geya 'ida latu daitama tauda 'ida nuwatuhuwao nuwana paihowao 'oidiyega, ma hesiyage tauna tuwa 'ina 'atemuyemuyega.

17Ma bewa wete 'aigeda 'ebe'ita Pelo* 'oinega, weyahina mwalo Yehoba 'ina gwae Peloina weyahina, 'igwaeya,

“Cebe loina ya'ebwae pwaigowa 'abehega 'ulo'alehegau, eema 'ane taugu 'igu waiwai 'u'ita, eema 'ane sanigu 'i'edadana bale'u mabwaiyana 'oina.”
18Eeta, 'eguma Yehoba nuwanuwana taiya 'ihelauwe, nata 'ihelauwe tuwa, ma 'eguma nuwanuwana wete taiya 'i'abihedeba pa'ali, nata tuwa 'ideba pa'ala sehe.

Yehoba 'ina gamwasowala ma 'ina 'atemuyamuya

19Nuwana tupwami nuwatuhu bewa weyahina wanuwanuwatuhu 'abehega 'eguma mabwaiyada mumugadaina Yehoba 'ina hesinuwega, to'aha hede weyahina 'ihe'ewegita? 20Ciyagwao, tauda geya 'ilobwainegita ma Yehoba 'oina tagwae hila, eema 'ebe'ita gide towalata'abi, 'aigeda tuta loheyainaina walata 'i'abidiya, ma 'aigeda walataina 'ihegwaeya to'abiina, 'igwaeya, “To'aha weyahina geya 'u'abigau gide 'iyaguina?”

21Ta 'ana dumwalu hesi beno to'abiina 'iboi 'ina 'abi 'iloinae, 'eguma nuwanuwana bale'u 'aigedaina 'oinega walata 'eluwa 'i'abidi, ma 'aigeda 'ana 'ita 'ausalana, ta 'aigedaina geya. Bewa bwebwe'ana!

22Ta Yehoba wete gidemusa 'ina paihowa 'iboi 'iloinae, weyahina tuta mabwaiyana togala 'oidiya 'ihe'alama'i'ita madouna 'abehega 'idi pui weyahina sahena 'ida hemahemaisedi, ma tuwa geya sida hematamataneya, ma 'inuwatuhuwa 'abehega sowasowana tuwa 'iloinaedi, 'ina gamwasowala ta 'ina waiwai matadiyega si'ita. 23Ma nuwanuwana wete 'ina wasawasaedi mwalo 'i'atububudiya tauda 'ihelauwegita weyahida, 'ihe'itae. 24Coinega boda 'eluwa 'oidiyega 'ibwauwegita, tauma boda Yudiya ma 'omi tomiya ganamuli. 25Gidemusa palopita Hoseya 'ina bukiya 'ihepwaila, 'igwaeya,

“Tomotaiyedi taudi geya 'igu bodao taudi nata yabwauwedima 'igu boda 'oina siluhuma, weyahina mwalo taudi geya 'igu helau 'alona sida miya, ma bewa tuta yahelauwediya.
26Mwalo Yehoba 'ihegwaediya, 'igwaeya, ‘Comi geya 'igu bodao’, nata bewa sibuihila ta sibwauwedi, sigwae, ‘Taudi Yehoba miyamiya hatayana natunao.’”
27Aiseya gidemusa wete meIsileli weyahidi 'igwaeya,

“Cabwa, susu Isileli sihenatuna yadayada gide namonamowedi hola lasalasa, ma 'iyamo 'oidiyega nata tupwatupwadimo Yehoba 'i'etolemedi.
28Weyahina Yehoba nuwanuwana gogo gabulena mabwaiyana 'iloina mwamwayauwe.”
29Ma Aiseya wete gide 'ina hepwaila 'igwaeya,

“Yehoba 'iboimo Tohewaiwai, 'oinega 'eguma geya 'eta 'ina boda tupwatupwadi 'i'atemuyamuyaedi, nata mabwaiyada 'ilamanigita, gide 'aneyage Sodoma* ma Gomola*, mabwaiyadi 'imutudiya.”

MeIsileli geya sihemisa

30Bewa 'oinega tasanapu 'abehega taudi tomiya ganamuli geya sitohotoho ma Yehoba 'i'ahwa dumwaluwedi, ma hesi 'idi hemisa tuwa 'oinega 'i'ahwa dumwaluwediya. 31Ma Isileliyedi hesiyage si'ai'aipate ma 'abehega loina 'ana muliya 'oinega Yehoba 'i'ahwa dumwaluwedi, ta si'aipate 'asaya.

32Taudi 'idi nuwatuhu 'abehega 'idi paihowa weyahina Yehoba 'i'ahwa dumwaluwedi, ma geya sihemisa 'oina, eeta beno 'idi pui gidemusa da'ule 'oina sihetupediya. 33Ma Yehoba 'ina Buki 'oina da'ule 'ebe tupaina weyahina 'ihepwaila, 'igwaeya,

“Wa'itayahi bwaibwainigomi, weyahina da'uleina nata Saiyoni 'oina yalagu, ma tomota nata 'oina situpa ma sibe'u, ma 'eguma taiyawedi tauna tuwa da'uleinaina sihemisaeya nata geya'abwa siwe'awe'a.”
Copyright information for `BDD