Titus 2

He'ita dumwaluna weyahina

Ma 'owa he'ita dumwaluna 'uhe'itae. Ma babadaedi 'uhegwaedi sahena sinumanuma yauyaule we'aha galana, ma sahena wete siyaliyaliyaya besobeso, ma hesi Yehoba sihemisa moisa, ma helau ta 'alama'i'ita 'oidiyega simaha.

Cai'aihaleyao wete 'uhegwaedi ma mumugadi ma'idi he'asisi, ta sahena tomota si'ahwa'ahwa galagalaedi, ma wete sahena waini sinumanuma hedade, ta 'ilobwainediya mumuga 'ausalana sihehe'ita wahiwahine hauhaudi 'oidiya, ma 'ane mwanediyao ta natudiyao sihelau bwaibwainidi. Ma 'ane ma'idi he'asisi, ma mumuga bwebwe'ana 'oidiyega 'idi hada si'itayahidi, ma wete mwanediyao sihelauwedi ta 'enadi sihematamatana, ma bewa 'oinega hali tomota Yehoba 'ina gwae sihe'asisiye, ta sahena si'ahwa'ahwa galagalae.

Loheloheya hauhaudi 'uguguyadi ma mumugadi si'itayahidi.

Ta 'owa mumugau mabwaiyana 'oidiyega tomota 'uhe'itadi ma taudi wete simumuga bwebwe'ana. Eeta gwae moisega 'uhe'ita, ma 'ane mumugau ta 'ino he'ita 'ilobwaine. Ma 'ane 'ino he'itao sahena tomota si'ahwa'ahwa 'abo'abowe, ma 'ino gwae bwebwe'adi 'adi hesagoha 'oinega 'a 'alehao sideba mwadina, 'idi 'ahwayali besobeso 'oidiyega.

Topaihowao wete 'uhegwaedi ma 'idi babadao 'idi loina sihe'asisiyedi, ta 'idi paihowega si'abihe yaliyayadi, ma sahena silologwahata, 10 ta sahena yagaha. Ma hesi ma'idi he'asisi moisa taudi 'ada to'abihetena Yehoba tetelina si'abilatuhe 'idi paihowa 'ausalanega.

11 Yehoba 'ina helauina 'ilatu pwaima tomota 'ada 'abihetena weyahina, 12 ta 'ihe'itaegita ma mumuga besobeso ma nuwatuhu galadi talogwahatedi, ma hesi tamiya mumuga bwebwe'adi ma dumwaludi 'oidiya. 13 Bewa tuta ma'ida yaliyaya 'ada to'abihetena Yesu Keliso tahemisae, tauna 'ida Yehoba waiwaina ma ma'ina wasawasa, ta 'ina hapwesa weyahina tayamwayamwa. 14 Tauna 'itagwaleya weyahida, ta 'i'amasa sabi 'abihetegita 'ida pui mabwaiyana 'oidiyega, ta 'i'abihe 'ehaugita, ta 'iboi 'ina boda 'oina 'ilagugita, ta 'ane 'ina paihowa bwebwe'adi 'oidiya taguibiga. 15 He'ita bewa 'uhe'itadi tomota 'oidiya, ma loina dumwaluna 'oinega 'ulohatotodi ma simumuga bwaibwaina. Ma sahena 'eta taiya 'igwae sinaligo.

Copyright information for `BDD