1 Corinthians 1

Hu'mamofihi ai ka'alo Yesu Kilisitohi aposolo lolo hilane luto nele'mo eto hu'ehina bo Poluita nani'ni ya'ma lalalutifu Soseteni hiti moneka nohutoti'a Koliti hepatoga Hu'mamofihi naga'i lenalitoga fayaha nasana ya'ma koyoto nolepu'ibe. Lenali Yesu Kilisito lenele'mo bati higo Hu'mau bona'i minalabe luto elesa molo lepi'ehina. Lenali hiti to noto notomagi hiti Sipi Bo Yesu Kilisitohi gi'a kumu keheli li pili ke'ahana bona'i enali hiti moneko elesa molo lepi'ehina. Yesu ai enali sipi bo'ani hiti lali sipi boti hiti nohinagihe.

Afotifu Hu'mamofihi aitogati to Sipi Boti Yesu Kilisitohi aitogati lenehe'mose'na to fuluna'a lenalitoga mino moloto mineno.

Koliti bonatoga mono'mofihi amuya'a huto hu'ehina'mu foke ka lu'ehina

Hu'mau ai Yesu Kilisito kumu yabe luto lenehe'mose'na lenele'mo hetofa hu lepolo'ehina'mu nani lenali kumu luto keheliloto kana'amu kana'amu Hu'mamofihi foke ka lulata nohube. Ai Hu'mau ka keta mehuse lu huto hulatana to kehelise'na fato fato nasanatu lenele'mo hetofa hu'ehigo mono'mofihi mina'a babu luto li'ahana'a ya'ma ni'ibe. Kilisitohi kaga'auba komopatinigu ule'ale huto fuluna'a huto hu'ehina. Ya'mu lenali fa'mene Sipi Boti Yesu Kilisito alihi metoga huto hilina'mu geba hite nehite Hu'mamofihi kamofihi legeya'a mone lenebe meligise lenalitoga ahuto hu baga i'ehina yabe. Ai ya'ma Sipi Boti Yesu Kilisito henetilina kanalo foipanatini meminenogo to lufusatini amuya malago minalabe luto kaba hu lepoloba lepoloba nohinogo kanatini su halibe. Hu'mamofihi pana'a Yesu Kilisito lali Sipi Boti ya'ma aitoga i ke'malabe luto elesa molo lepilina yana'mu ai hetofa hu lepalalina'a akeheli'ohune.

Koliti bona'i enali mono kumu lite loko luku hi'ahana

10 Nalalu'nigitabe. Nani Sipi Boti Yesu Kilisitohi gi'alo yabe luto lu hokolo hu lepito ya'ma lilugi, kehelilo. Lenali kaga fato fato'i nelite loko mehilo mono ka'mu nekehelite lenegekesa hiti komopatini le'mo moneko hite minalo. 11 Na'o bogiyo. Nani folagahatinigu kenasabo bise ka huto nohina ya'ma Koloehi bona'amagi lago keheli'ohuna ya'ma lu nolepube. 12 Ya hu'ehina'mu ka'a ma luto nolube. Lenalitogati luga'amagi lali Poluhi naga'i nohune lite lilata nehabe. Ya lite nelago luga luga'amagi lali Apolosihi naga'i nohune lite lilata nehabe. To luga'amagi lali Pitaha naga'i nohune lite lilata nehabe. To luga'amagi lali Kilisitohi naga'i nohune lite lilata nehabe. 13 Yamofihi hena hena hu'ehibe? Enali Kilisitohi loko hi'ahago pana'alobomagihi hiti loko hi epele'ahana ni'ifihe? To Poluita, nani lenali kumu yabe luto malipu yafalo fili'ohufihe? To Poluita nani nigi'niuba ho hauta holago mono nagami'i fele'ahafihe? Ya huto meni'ibe.

14 Nani lama'naka mono nagami'i mefolo lepolo'ohunamo ni'inagihe. Ya hu'ehina'mu komopa'nigu bati nohube. Bo loemo Kilisipoko Gaiyasiko hiti etalisigo folo etoto'ohunamo ni'ibe. 15 Lenali ya lite li lalabe luto: Ai gi'auba ho hauta lahago mono nagami'i folo'ohutamo ni'ibe. Lenali ya'ma lu lalabe luto nolube. 16 To mone ma luto nokehelube. Setefanohi bona'a enali hiti folo epolo'ohuna luga'a enali kumu mekehelube. 17 Kilisitou ai naga'a mono nagami'i folo epalalane luto noho melifi'ehibe. Ai ka'a lamana'a lu huto huto hu epilane luto lu neto'ehinamo ni'ibe. To ana huto Kilisitou ai melugu bona'magi nelana ka lu epilane luto noho melifi'ehibe. To hena'mube? Ya'ma nelana kagauba Kilisitou malipu yafalo fili'ehina kagamofihi amuya'a limi lalibe luto yabe.

Kilisito ai Hu'mamofihi felisa to kehelise'na'a ni'ibe

18 Kilisitohi kaga'a amuya'a amuya'a hiti ni'igo yana'mu ma kehelilo. Malipu yafalo fili'ehina kaga'a ya'ma kegeiyo bona'magi fililana kapogu melelata nehana nekehelite negi nasana yabe lite nelanaya to lali'i kapo lamana'agu nobuta bona'magita kehelutogo Hu'mamofitogati amuya'a kaga ni'ibe luto keheli'ohune. 19 Yanana'mu mono bukugu Hu'mau lu'ehina ka mone ma luto fayahi koyo'ehinamo ni'ibe:

  • Nani enali kehelise'nati
  • bati hu'ehibe lite
  • nelana bona'magihi
  • kaga'ani ho laga hinogo
  • limilina'mu yabe.
  • To kehelise'nati ni'ibe lite
  • neminana bona'magihi
  • kehelise'na'ani yamofihi
  • keheli he'miluna'mu yabe.

20 Ya'mu kehelise'nati ni'ibe lite neminana bona'i hiya'a hite minalabe? To mono kamofihi keheli akeheli nohune lilata nehana bona'i hiya'a hite minalabe? To yatai kanamofihi hapa'amu kaga foya lilana bona'i hiya'a hite minalabe? Hu'mau ai'a bona'magi kehelise'na'ani fa'mene kaga ni'ibe luto keheli'ehina yabe.

21 Ya'mana hapa'a ma ni'ibe. Hu'mau kehelise'na'a amuya huto nohigo bona'i enali'ani kehelilata nehana yanatu Hu'mamofihi hapa'a bu galune lite alune'mu bati mehi'ahana. Ya'mu Hu'mau keheligo bati higo Kilisito fili'ehina ka'a lu epise'na ya'ma bona'magi kehelite negi nasana yabe lite nelana'a ya'ma bona'i luga'a lu epugo kehelite aitoga agoya hu emilune lite fifa neigo Hu'mau enubuto bilata nohibe. 22 Yuta naga'magi enali ya'ma ka kehelilune lite topa hose nasana hulenogo bu galune lite amuya nehabe. Giliki bona'i ana hite enali ananamofihi hapa'a kehelilune'mu nelite sa sa nehite kupomo'i fite minelata nehabe. Ya nehanaya lali ya'ma Kilisitohi malipu yafalo he'ahanamofihi kaga lunogo Yuta bona'magi enali keheligo keta hulata nohibe. To Giliki bona'i enali kehelite negi ka yabe lite lilata nehabe. 24 Ya nehanaya lali Hu'mau lele'mo'ehina bona'magita Yuta bona'i nohuta Giliki bona'i hiti nohuta laliya Kilisito kumu nokeheluta ya'ma Hu'mamofihi felisa to kehelise'na'a ni'ibe luto nokehelune. 25 Bona'magi enali Hu'mamofihi foya'mu Kilisito malipu yafalo fili'ehina ya'ma negi nasana ni'ibe lite nelago ana Hu'mamofihi negi nasanauba bona'magihi kehelise'na'ani be ligilata nohibe. To Hu'mamofihi foya'mu amuya'a meni'ibe lite nelago ya'ma Hu'mamofihi amuya meni'ina nasanauba bona'magihi amuya'ani be ligilata nohibe.

26 Nalalu'nigitabe. Hu'mau lali hena legita bona'i elesa molo lepi'ehinamo ni'ibe? Beto hite kehelilo. Asaga bona'magihi lenali kumu hetofa kehelise'na'ani hiti keheli fe lite mine'ahana'a babu lite nehabe lite nelafiye? O'e ya menelabe. To amuya bona'i lenalitoga babu lite nehabe lite nelafi? Ya menelabe. To ana huto lenigi hite nehana'amagihi lenalitogati babu lite nehabe lite nelafi? Ya menelabe. 27 Ya nehanaya bona'magihi enubulo kehelise'na'ani bati mehina'a lali Hu'mau lele'mo'ehina yabe. To bona'magihi enubulo amuyati menina'a lali Hu'mau lele'mo'ehina yabe. Hena'mube? Enali kehelise'nati bati hu'ehibe lite to amuya hiti nohune lite lilata nehanamagi enubuya'ani hulata hilabe luto yabe. 28 To bona'magihi enubulo limite nehana'a ya'ma Hu'mau elesa molo epilata nohibe. Hena'mube? Bona'magihi enubulo enikibina lolo hite mina'ahana'a hiti to fa'menena'a hiti enali Hu'mau lukesa'ani sigilata hilibe luto enele'mo laba hilina'mu yabe. 29 To ya higo melugu bona'i moneuba Hu'mamofihi bulo gufa'a limo titi lalibe luto ya suhi hu'ehina ni'ibe. 30 Ya hu'ehinaya Hu'mau lali Yesu Kilisitotoga lele'mo hepi'ehina yabe. Kilisitou ai ya'ma lali Hu'mamofihi ka'a keheli bebe salutamofihi hapa'a minalibe luto yabe. To ai Hu'mamofihi gobisalo mino fu luto minalutamofihi hapa'a minalibe luto, to foipanati li he'mi letelenogo komopati gulu gulu linogo minalutamofihi hapa'a minalibe luto yabe. To ai Kilisitou lali'i foipanaguti gulu ho letalibe luto yabe. 31 Ya'mu kaga mone mono bukugu ma lite fayahi keye'ahana ya'ma ule'ale hilibe:Lenali fokehi lilune'mu nehana bona'magi Sipi Botiuba hu lepolo'ehina'amofihi fokeha'a lilo.

Copyright information for `BEF