1 Corinthians 11

1Nani Kilisitou ito bu'ehina giyakagu ito mege'i mololata nohube. Lenali ana suhi hite nani nigiyakagu ite nemege'i malalo.

Ana'magi kakili'ani bilanamofihi ka'a

2Lenali yamofihi lolo huto moloto hu'ohunamo ka keheli su he'ehite nani lu yege ho'ohuna kaga kehelilete yamofihi ka'a mege'i melete neminabe. Yamofi kumu nokehelugo laga'ni nebesilata nohibe. 3To kaga mone linogo'ni kehelilabe, kehelilo. Bo ya'ma ana'magihi afo'anigita nehabe, to Kilisito ya'ma bomagita afotinifu nohinagi to Hu'ma ya'ma Kilisitohi afo'afu nohibe. 4Bo moneuba ai lataha'alo kakili'i bi'ohuto Hu'mamofitoga ka lilinafi to Hu'mamofihi ka lu huto huto hilinafi ai Kilisitohi le'mo laba hilina nasana lolo hilube'mu hibe. 5To a'i moneuba kakili'i mebise Hu'mamofitoga ka lilinafi to Hu'mamofihi mono ka lu huto hilinafi ya'ma baha'amofihi le'mo laba hilina nasana lolo hilube'mu hibe. Ya hilinamofihi ya'ma ana'i luga'amagihi oka'ani laga hi su hete neminana ana'magihi tegi lolo hilube'mu hibe. 6Ya hu'ehina'mu a'i moneuba mono nonugu tito lataha'alo ana'ina ifi toloto ya mehu'ehinogomo ya'ma lataha'alo oka'a laga hi su hete le'mo hupamone hi etalo. To a'i moneuba oka'ni he'mi netenogo nubuya'ni hilibe lilina a'uba kakili'i li biloto mineno. 7To bomagi mono ka lilana kanalo lataha'anilo ana'ina lite ifi telete minalana bati mehilina'mu yabe. Hena'mube? Enali ya'ma Hu'mamofihi nasana hiti to Hu'mamofihi sekele mamu'a lolo hi'ahabe. To ana'i enali ya'ma bomagihi sekele mamu'a nehabe. 8Hu'mau ai bo ya'ma a'mofitogati lito lolo mehu'ehinagi a'i ya'ma bomofitogati lito lolo hu'ehina yabe. 9To Hu'mau bomo ya'ma lihakamofi kumu yabe luto le'mo huto mehu'ehibe. A'i ya'ma bomofi kumu yabe luto le'mo huto hu'ehina yabe. Ya'ma ana'i enali ya'ma bomofihi sekele mamu'a nehabe. 10Yamofihi mono ka'a lite nehago agelo bona'magi bu gete neminabe. Ana'i enali bomagihi kaba hise'na'animofihi keya'a mone ya'ma lataha'anilo kakili'i lite ifi telete minalana yamofihi bati hilube'mu hibe. 11Ya huto ni'inaya bona'i ya'ma ana'magihi kaba nehanaya to ana'i ya'ma bomagihi kaba nehana yamofihi Sipi Bomofihi bulo ya'ma boana'i fato fato'mofihi minalana yamofihi laga mehilina'mu yabe. 12Yata'a ana'i ya'ma bomofitogati lito lolo hu'ehinamo ni'ibe to yatai kana bomagi ana'magitogati huto huto bona'i i futili huto nominone. To bona'i hiti ana'i hiti silaga'i yamofihi Hu'mamofitogati huto hu'ehina nasana ni'ibe.

13Lenalitini kehelite bu go bati hilo. A'i moneuba lataha'alo ana'ina bona'i li gehesa hilanaga ifi metose Hu'mamofitoga loka halina yamofihi bati hilina ni'ifihe? 14To bo moneuba oka'a yatamalo ni'inogo minalinauba yamofihi hapa komopatitu kehelinogo bati mehilube'mu hibe. Yamofihi hapa'a koyapa'i mono ka mekehelise minana kanagu akeheli'ahanamo ni'ibe. 15To ana'magihi lataha'anilo oka yatamalo ana'ina ifi te'ahana sekele mamu'a Hu'mau epi'ehina'a legi huto ni'ibe. Ana'magihi oka'ani yatamalo minana'mu lite ya'ma keheligo fokehi lilata nohibe. 16Moneuba ya'ma kaga keheli he'milube'mu nohuto ma luto kehelino. Fato suhi yamofihi lali hiti Hu'mamofihi naga'a luga'a hiti mone lito menohune.

Yupala nose'nalo li nupa hise'na

17Ana'ina mone kumu keheli sibina hulata nohuna yamofi kumu lenofokehi meluse lenegekesa lito lu lepilugi kehelilo. Lenali mono kalo li nupa hilete komopatini li mehepise loko hilata nehite mono kauba lenele'mo bati mehilibe. 18To mono kagu li nupa nehago lenali komopatini loko hulata nohibe lite lu nimigo lama'na ka nelafihe luto mone kegi'a kehelube. 19To loko hi'ahanauba hiya bona'magi Hu'mamofihi bulo mono ka'mu amuya melelata nehana le'mo huto hulata nohibe? 20To lenali Sipi Bomofihi yupala nose'na nalune'mu li nupa hite minete nose'na nelata nehana ya'ma Sipi Bomofihi nose'na meni'ibe. 21Lenali nose'na lelitete no bati mehise lenalitini mele'isi eto eto hite nelago bona'i luga'a kau'namu filite minelata nehabe. To bona'i luga'amagi bai nagamiko nete nete komopa'ani enegekesa sibi saba hulata nohibe. 22Lenali nohatini meni'igo ya suhi lolo hilata nehafihe? Lenali nose'na nalune litemo nohatiniluga minete nalo. Lenali Hu'mamofihi bona'a enali kumu keheligo enumuhi meni'ina bona'i enali keheli sibina enubuya hina suhi lolo hilata nehabe. Ya nehana nasana'mu henabe luto lu lepilube. Lenofokehi lilufihe? O'e lenofokehi melilube.

23Lenofokehi melilube luto henabe nolube? Koyapa'i lu lepi'ohunagi Sipi Bo Yesuhi ya'ma mi'mi hu'ehina sinipogu 24beleti nose'na liloto Hu'mamofihi foke ka luto gofa hoto noepito lu'ehina: Ya'ma nani nugufa'ni lenali kumu luto nolepube. Nani kumu keheli nimite ya hite nete minalo. 25To nose'na nelago bai nagami kohi ana suhi huto lito ma luto lu'ehina: Ya'ma konugu Hu'mamofihi mu tifise'namofihi ka'a kosaba'namofihi golaha'ni malalunamo ni'ibe. Nalana'amu nalana'amu ya'ma nani kumu keheli nimite ya hite nete minalo. 26Asaga yupahi lenali ya'ma beleti nose'na hiti bai nagami'i hiti nalana'amu nalana'amu Sipi Bo molo'ehinagi ai fili'ehina ka'a lu huto huto hite mine lite bite nehinogo ai i behe huto limilina'mu yabe.

27Yamofihi bona'i luga'amagi enali Sipi Bomofihi beleti nose'na hiti bai nagami'i hiti li sibi sibi hite nalana ya'ma Sipi Bomofihi gufa'a hiti golaha'a hiti li sibi hinogo foipana huto hilina'mu yabe. 28Yamofihi beleti nose'na hiti bai nagami'i hiti nalune'mu nehitemo kohe tete komopatinigu kaga ni'ilina sa sa hilete nalo. 29To bo moneuba Sipi Bomofihi gufa'amofihi hapa'a keheli fe meluse fa'mene nalina yamofihi foipana huto hilube'mu higo Hu'mau nona'a guna malalibe. 30Ya hu'ehina'mu lenalitogati luga'amagi yupala nose'namu keheli fe meluse fa'mene nelenogo kana'amu kana'amu amuya'ani meni'ina to epesise'na huto hulata nohibe. To luga'a fililata nehabe. 31Lali hapati'mu sa sa huto lu huto huloto minotita ya suhi huto Sipi Bouba yanamofihi nona'a melimitita'mu yabe. 32Ino bano minaluta yamofihi Sipi Bouba lali hapati li huto huto osahi limilube'mu hibe. Lenali mono ka mekehelise bona'i hiti mino sibi hite nehite sibina hi lalabe luto ya suhi hu letolata nohibe.

33Ya'mu nalalu'nigita, lenali yupala nose'na nalune lite nehitemo li nupa hite minete bona'i luga'amagi kumu enegeba hite nehinogo o neheti su helenogo hapi fite nalo. 34Moneuba ai nose'namu kau'na sipi henogomo noha'aluga minoto kohe toto neno. Li gehesa hite li sibi sibi hi'ehinogo lenalitoga foipana huto hu laligi. To kaga luga'a nani'ni nobuto le'mo fe lilube.

Copyright information for `BEF