1 Corinthians 16

Yesu naga'amagihi efahi li nupa hilabe luto lu epi'ehina

To yatai lenali Hu'mamofihi bona'magi Yelusale hepato nehana kumu yabe lite moni efahi li nupa hilabe luto lu lepilugi kehelilo. Galesia hepatoga mono bona'magihi lu epi'ohuna suhi hite hilo. Lenali efahi nelina suhi hite ana legegeto kehelite fuli yupa yupapo salele napagu ya'ma luga'a fuku lite le'mo eto eto hite melete minalo. Fa'mene nehinogo buto nehe netinogo'ni efahi li nupa hilune'mu ligitagahi hi lalagi yatai li nupa hilo. Lenalitoga binogo'ni bona'i mone'a enele'mo eto hilana bomagihi fayaha nasana epiloto enoho lifinogo'ni, li nupa hi'ehilana efahi ya'ma Yelusale hepatoga lelite bilabe. To lenali kehelinogo bati hinogomo nani hiti moneka bilune.

Polu enalitoga bilube'mu nohuto ka'a lu malago bu'ehina

Nani Masetonia hepatogati bilube'mu nohunaya anaga buto'ni kana'a nesi'a minoto lenalitoga bilube'mu hube. Lenalitoga buto kana'a nesi'a minomo netinogo ko'mofihi kana'a su halina ni'ifihe? To kapoga nele'mo bati hilana ya'ma yagafi yagafi biluna'mu yabe. Nani ya'ma yatai kana yamofihi fa'mene kapoga nobuto lenali'i bu lenogomo biluna yamofihi bati mehilube'mu hibe. Ya hu'ehina'mu Sipi Botiuba kehelinogo lenalitoga buto kana nesi'a minototi bilube luto nolube.

Nani ya'ma Efeso hepatoga nohugo Yuta bona'magihi sipi nose'na nalana yupahi, gi'a Petikosu nelana, ana fuli su halina'mu yabe. Ya'maga Sipi Bomofihi ka'amofihi kapo'a bili etoto foya'ni huto higo nolugo legeya'a holata nohibe. To ka lamana'amofi kumu fatehe bo'a babu lite nehabe.

10 Timotiu lenalitoga buto henetilenogo be tiginogo gufa'a gabu meginogo bati huto minalibe. To nani Sipi Bomofihi foya lilata nohuna ana suhi huto lilata nohibe. 11 Ai neheya kola nohina'mu lenali ai kumu kehelinogo melimino. Nani hiti nigibo nagabo luga'a hiti geba huto nohutagihe. Lenali legeso hite kaba hi etete ho lifinogo fulu fulu huto kapoga oba oba huto nanitoga o henetilibe luto geba nohube.

12 To lalalutifihi Apolosihi ka'a lilugi, lalalutigihi Kilisitohi bo luga'a enali hiti lenalitoga bilibe ekesa lito ho lifi'ohunamo ai yatai bilina'a babahi mehibe. Yata'isigo ni'igopa kana'a monelugu bilina kapo'a hokolo hilenogo lenalitoga bilube'mu hibe.

Polu keke'i lu epoloto fayahi koyo su ho'ehina

13 Lenali kaba hite minelete Hu'mamofihi ka kehelilatanamofi kumu ule'ale hite minalo. Ya nehite koli mehise gimi bomofihi hapa'a lite amuya melete minalo. 14 To lili'na nasana silaga'i lilune'mu nehitemo komopatini ai emigo ai emigo hite lolo hilabe.

15 To nalalu'nigitabe, mone lu lepilugi kehelilo. Lenali Setefanasi to lalameha'a enali kumu ya'ma lite keheli'ahabe: Enali Akaiya hepatogati kohe tete Hu'mamofihi ka kehelilete komopa'ani li gelehe hite Kilisitotoga keheli emi'ahana. To Hu'mamofihi bona'a enalitoga kele kele foya minalune lite lilete lilata nehabe. 16 Ya'ma lenali ya suhi nehana bona'i hiti to enali hiti Hu'mamofihi foya lite nehana bona'i luga'a hiti enemege'i malalo.

17 Koliti bona'magi lenali kumu keke'i lu epoloto nohunaga Setefanasi hiti Fotunatasi to Akaikasi enali nanitoga elago komopa'nigu nokehelugo bati nohibe luto negelo nobube. 18 Ya huloto'ni nani hiti lenali hiti asaga'i enali'i bu go lu mala huto nohutogo lipagu legelo bi'ohuta. Lenali bona'i ya hana'a enali kumu kehelinogo bati hino.

19 Esia metoga Hu'mamofihi bona'amagi enali lenali kumu keke'i neli lepalago nolube. To Akuila to liha'a Pilisila etali nonugu mono kumu li nupa hilata nehana bona'magi enali Sipi Bomofi kumu yabe lite lenali kumu keke'i neli lepalago nolube. 20 Lalalutigita lenali kumu nehafihe lite asaga bona'magi li'ahana. Lenalitini moneko moneko'i soso hi epelete minalo.

21 Nani Poluita fayahi koyolata osahi nehe'mose bona'nimofihi yanuguti lito nani'ni keketini nolu lepoloto fayahi ya'ma nayaha'nitu koyo su nohobe.

22 Moneuba Sipi Bomofihi mehi meemilina ya'ma Hu'mau gumi'i molo etelenogo yabalugu limilibe.

Nani Giliki kaguti: Malana ta, noluto lali kaluguti Sipi Botio kai obo, luto nolube.
23 Sipi Boti Yesu lehe'mose'na lenalitoga mino moloto mineno. 24 Komopa'niuba Yesu Kilisito kumu yabe luto lenalitoga minolata nohibe.

Copyright information for `BEF