1 Corinthians 2

Polu Kilisitohi he'ahanamofihi ka'a beto hu epi'ehina

1Nalalu'nigita nani lenalitoga neheti'ohunamo ya'ma Hu'mamofihi suguna ka'a lu lepilube luto ya'ma kehelise'na'ani bati hu'ehina bona'magihi kaga lilata nehana supo huto laga hina ka lu melepi'ohube. 2O'e. Nani ma luto keheli amuya mololoto bu'ohunamo ni'ibe. Nani lenalitoga buto nohuto'ni kaga luga'a melu'ohuna yagi Yesu Kilisito ai kumu hiti to malipu yafalo he'ahana yamofihi ka'asigo beto hu lepilube luto keheli'ohunamo ni'ibe. 3To lenalitoga foiya bito nehetilube'mu nohuto laga lepesifi melepesifi luto mino'ohuna ya'ma amuya'ni meni'igo nefelele'i bigo afoya ito mino'ohunamo ni'ibe. 4Ya huto nohuto Hu'mamofihi kaga lu'ohuna lenegekesa lilube luto metoga bona'magi kehelise'na'ani ni'ina kagaguti lenimi molose ka lu melepi'ohube. Hu'mamofihi amuya'auba to Sikalafu'uba nani'i kaga'ni le'mo hetofa hu'ehigo legeya'a lolo hulata hu'ehibe. 5To ya higo lenali Hu'mamofi kumu keheli amuya malalana yanauba bona'magi keheli fe lilata nehana yamofihi meni'ibe. O'e, Hu'mamofihi amuyalo lenifita ilabe luto ya hu'ohunamo ni'ibe.

Hu'mamofihi suguna ka'a Sikalafu'uba lu huto hulata nohibe

6To ya huto ni'inaya nani ka keheli bati mehuse liluta ni'ifihe? O'e. Nani lama'naka Hu'mamofihi kagu hofa tete mine'ahana bona'amagi ya'ma keheliya ito kagaguti lu lepilata nohube. To ya nohutaya ya'ma metoga enigihiti bona'i fililete fa'menena lolo hilanamagi keheli fe lite kaga lilata nehana ya suhi huto liluna'a meni'ibe. 7O'e, nani keheli bati huto lulata nohuna'a Hu'mau koyapa'i komopa'agu suguna huto keheli molo'ehina yamofihi lu huto hulata nohube. Keheli molo'ehina ka'a ya'ma bona'magita lali Hu'mamofihi fana meha'agu minalune luto koyapa'i ana'ina li huto mehina yupahi Hu'mau le'mo keta mehuse huto molo leto'ehina. 8Metoga enigihiti bona'magi enali anamofihi keheli molo'ehina kagamofihi hapa'a mekeheli'ahabe. Kehelitita yamofihi lali Sipi Bomofihi fana mehenamofihi afo'afihi ya'ma malipu yafalo mehatita'mu yabe. 9Ya hu'ehina'mu kaga mone ma lite mono bukugu fayahi keye'ahanamo ni'ibe:

  • Bona'magi bu mege'ahana
  • to enegekesatu mekeheli'ahana nasana,
  • to bona'magihi komopa'anigu
  • mekeheli'ahana nasana,
  • ya'ma Hu'mamofihi
  • komopa'ani emi'ehilana bonatoga
  • le'mo huto hilina'mu yabe.

10Ya nasana'amu Hu'mau ai Sikalafu'a ho lifigo oto lu huto hu limilata nohibe. Ana Sikalafu'uba silaga bona'magihi komopa'anigu to Hu'mamofihi komopa'agu fala kito ni'ina'a hiti kehelilata nohinagi ya'ma lu hokolo hu leto'ehibe. 11Hiya bouba ya'ma lalu'afihi komopa'amofihi hapa'a keheli'ehibe? Komopa'amofihi afo'afu ai'asigo kehelilina'mu yabe. Ana huto Hu'mamofihi komopa'amofihi hapa'a ya'ma Hu'mamofihi Sikalafu'uba moneko ai'a kehelilina'mu yabe. 12To lali ma melugu bona'magihi sikalafu'i meli'ohutamo ni'ibe. Lali Hu'mau mono ka molo leto'ehina yamofihi keheli fe lilune luto Hu'mamofihi Sikalafu'a li'ohutamo ni'ibe.

13To ya higo lali'i bona'i luga'a Hu'mamofihi Meha'a li'ahanamagihi ai ka'a lu keheli huto lu epiluta nohuto lali bona'magi keheli'ahana ka lu epiluta meni'ibe. Lali Hu'mamofihi Sikalafu'uba lu limilina ka'asigo lulata nohune. 14Bona'i luga'a Hu'mamofihi Sikalafu'a hiti menehilana bona'i enali ya'ma Hu'mamofihi Sikalafu'mofihi kaga'a mone mekehelilana'mu yabe. Enali hena hite kehelilabe? Meni'ibe. Sikalafu'i hiti nehilana bona'magi kehelilana'a huto ni'inaya, Sikalafu'i hiti menehilana bona'magi kehelinogo fa'mene kaga legi lolo hilube'mu hibe. 15Lali hetofa Sikalafu'i hiti nohiluna bonago nasana asaga'i fa'mene bu go fe lilana'a ni'inaya bo moneuba enali hapa hapa'ani lu huto mehilube'mu higo keheli bati menehabe. 16Ya hu'ehina'mu kaga ma lite keye'ahanamo yamofihi lamana'a ni'ibe:

  • Sipi Bomofihi komopa'agu kaga ni'ina
  • yamofihi bo mone
  • ki'afu kehelilina ni'ibe?
  • Kaga'ago noligo
  • ya'ma hiya bouba le'mo bati higo
  • lu'ehina ni'ibe?
  • Mone meni'ibe.

Mone meni'inaya lali ya'ma Kilisitohi kehelise'na'a lu huto hu letago nominone.

Copyright information for `BEF