1 Corinthians 7

Bo alobomagihi enali ka

Lenali fayahi keyete nenimite ma lite noloka he'ahanamofihi lu huto hilugi kehelilo. Bo moneuba liha'a melise minalube luto lilina yamofihi bati huto ni'ibe. To ya hu'ehinaya kaga mone ni'igi kehelilo, moko lise'nauba enimi'i mololatana nasana babu luto ni'inago ya nasanauba enemeto enemeto hite, lenali ana'i lilete lihatini hiti minalana yamofihi bati huto ni'ibe. To ana'i enali ana hite bahatinilo bite bahatini hiti minalanamofihi bati huto ni'ibe. To bo kaiya kugufaka mone kegi'amofihi lihaka o'e melu etobo. To ana huto a'maka kugufaka mone kegi'a bahakamofihi o'e melu etobo. A'i, kai kugufakamofihi kaga'a kaitogati meni'ibe. Bahakamofihi nasana ni'ibe. To bomaka kai kugufakamofihi ka'a ya'ma kai'na meni'ibe. Lihakamofihi nasana ni'ibe. Bo alobole letali letugufamofihi lite amanapa lolo mehiliyo. Fa'mene Hu'mamofitoga nunumu hite malalu'ibe'mu keta mehuse hite kanatiti kanatiti lu kehelilete kana'a melelete lila'ina yamofihi bati hilube'mu hibe. Malala'ina kana'a su holenogomo aku'i li hepite malaliyo. Malala'ina kana'a be liginogomo yamofihi Satau ai enimi'i molo hinogo foipa hi lalibe luto nolube.

Bo alobo hite minalabe luto lu memolo lepolobe, fa'mene keheli lepito nolube. Nani komopa'niuba ma luto nolibe: Nani nohuna suhi hite kofuta minalanamoya. Ya hu'ehina'mu Hu'mamofihi amuya'auba fato fato suhi huto lele'mo huto hu'ehina yamofihi kapo'a fato fato suhi huto ya suhi ma suhi huto ni'ibe.

Yafa'ana'i hiti to neheya kola hiti to keto ana'i hiti enali ka'ani ya'ma ma luto nolube. Enali nani suhi lite bolo mebise ana'i melise mineme bilana yamofihi bati hilube'mu hibe. Ya hilanamoya moko lise lenegekesa yamofihi bo alobo topa helatana lenegekesa kehelilanamo, yanamofihi logo'auba lenele'mo sibina hu laligi bati hite bo alobo lolo hite minalo.

10 Bo alobo lenali kaga lilugi kehelilo. Yamofihi nani ka'nisigo meni'ibe. Sipi Bomofihi bagaguti kaga hiti nolube. Lenali ana'magi bahatini mehe'mi epalalo. 11 To bahatini he'mi epelete yamofihi bolo mebise fa'mene minalo. To bahatini hiti aku'i li hepite minalo. To lenali bomagi lenali lihatini mehe'mi epalalo.

12 Boana'i luga'amagihi kaga lilugi, kehelinogo Sipi Bouba kaga luto keheliloto nolibe lite mekehelilo. Nabaga le'mo babahi higo nolube. Kilisitotoga komopa'a molo emi'ehina bo mone'mofihi liha'auba mono ka mekehelise a'i minalina ai baha'a hiti minalu'ibe luto nelinogo baha'auba ho lifi mehe'milina'mu yabe. 13 To Kilisitotoga komopa'a molo emito minalina a'i mone'mofihi baha'auba mono ka mekehelise minalina ya'ma liha'a hiti koguna huto minalu'ibe luto nekehelinogo liha'auba mehe'mi etalibe. 14 Yana'mu bati huto minala'ina'mu yabe. Hu'mamofihi ka mekehelise bona'i enalitoga liha'animagihi Hu'mamofihi lusa yauba enalitoga hiti buto nolibe. To mono ka mekehelise ana'i enalitoga ya'ma baha'animagihi lusa yauba enalitoga hiti buto nolibe. Ya nohigo yagapana'animagi Hu'mamofihi lusa'ani hiti lolo hite neminabe. Enalitoga lusa meminatita yagapana'ani ya'ma Hu'mamofihi ka'a mekehelise bona'i suhi hite lolo hite minatita'mu yabe. 15 Mono ka mekeheli'ehilina boubafi to mono ka mekehelilina a'ubafi baha'afi to liha'afi he'mi etoto bilube luto nelinogomo o'e melilo. Hu'mamofihi ka keheli'ehilinauba o'e meluto naga ito li pili kaluta'a meni'ibe. Hu'ma koguna ite hepite minalabe luto elesa molo'ehinamo ni'ibe. 16 Ya ni'ina'mu a'i kai bahaka hiti hepite minala'ina yamofihi Hu'mamofihi kapogu bahaka le'moto alapihe le'moto mealane? Ya'ma keheli'ahapi, ya? To bo kai lihaka hiti epite minala'ina ya'ma lihaka Hu'mamofihi kapogu le'moto alapihe le'moto mealane? Ya'ma keheli'ahapi, ya? Ya'mu lenali mele'isi mehe'miliyo luto nolube.

Hu'ma suhi hite minalabe luto lu leto'ehina ana suhi huto minalune

17 Lenali lenemeto lenemeto hite Sipi Bomofihi suhi lolo hite minete lite hilabe luto lu lepolo'ehina to Hu'mau elesa molo emina yupahi lolo huto moloto minolata nohina yanamofihi mono kagagu minalo. Nani noto noto Yesuhi naga'amagihi ya'ma kaga lu epito lu laga hulata nohube. 18 Bona'i luga'amagi Hu'mamofihi keya'a enugufa laga hi epele'ahago Sipi Bouba elesa molo epinogo o henetilanamagi ana huto ana keya'i ya'ma Yuta bona'i enali li mehe'milabe. To bona'i luga'amagi enugufalo Hu'mamofihi keya'i meni'ilinamagihi Sipi Bouba elesa molo epinogo o henetilanamagi ana keya'a kumu ya'ma fegutoga bona'i enali buka metilabe. 19 Enugufa laga hite minalana to enugufa laga mehise minalana enali'i nasana fa'menena meni'ibe. Hu'mamofihi bagaguti kaga'a kehelite lite minalana nasana yamofihi lamana'a ni'ibe. 20 Bona'magita lolo hite melete nehago Hu'mau elesa molo epi'ehina yamofihi komopa'aguko minalo. 21 Kai kele kele pana'i lolo huto nohatogo Hu'mau elesa molo kimi'ehina yana'mu kegekesa loe lae mehinogo ana'asiloko minobo. To kele kele pana'i lolo huto minoto foya lilata nohataguti gulu ho ketalune lite nelinogomo o'e melubo. 22 Kai kele kele yagapana'i nohatogo Sipi Bouba elesa molo kimi'ehina'a kai Sipi Bouba foipanaguti pa so ketoto gulu ho keto'ehina bomo nohata kehelibo. To kai ya'ma fa'mene nohatogo Sipi Bouba elesa molo kimi'ehina'a kai Kilisitohi kele kele yagapana'a lolo huto nohata kehelibo. 23 Yesu ai'a lenali'i mina fi'ehinamo ni'ibe. Ya hu'ehina'mu metoga bona'i hapa'animofihi kele kele'i lolo mehise Kilisitohi kele kele'i hi etete minalo. 24 Nigibo nalalu'nigita. Lenali lenemeto lenemeto hite ya'ma koyapa'i lite melete nehago Hu'mau elesa molo lepi'ehina analoko yatai kana Hu'mamofitoga hepite minalo.

Bo meli'ehina'a hiti keto a'i hiti ka'atiti

25 To bolo mebi'ahana ana'mu to liha'ani meli'ahana bo'mu ya'ma Sipi Bomofihi bagaguti kaga meli'ohutaya Sipi Bouba komopa'a nimito nele'mo lamana nohina yana'mu ka'ni nifita ilata nohuna bomofita ya'ma nolube.

26 Yatai kana'a ya'ma keta huse nasanamofihi komopa'agu nohutogo lenali fa'mene minalana bati hilibe. 27 To lihaka nohifi mehe'mi etobo luto keheli'ohube. To ana'i melise nohapi ana'mofi kumu sa sa mehubo luto keheli'ohube. 28 To a'i lilata yamofihi sibina mehilube'mu hibe. To fa'mene nohilina a'i moneuba baha'alo bilinamofihi sibina mehilina'mu yabe. Anabole neminanamagi nasana'muko keke'i lite minalana, ya suhi lenalitoga huto hu lalibe luto negekesa nokeheluto ya'ma nolube.

29 Nalalu'nigita, kaga ya'ma lu lepiluna kehelilo. Hu'mau molo'ehina kana asu halube'mu hibe. To kana'a hupamone hu'ehinago liha'ani hiti nehana'amagi bati hite liha'ani menina bo tegi hite Hu'mamofihi foya'a amuya melete minalo. 30 To yibi hafili hite neminana'amagi minete lite hilanamofihi yibi hafili mehu tegina lolo hinogo minalo. To lenegelo bilata nehana lenali minete lite hilana yauba lenegelo mebi tegina lolo hinogo minalo. To fe'nohi mina fite neminana'amagi fe'nohatini memino tegina lolo hinogo minalo. 31 To ma melugumofihi yogo fe'nohi molose'na lite ete hilata nehana yamofihi ya mehuse suhi hinogo minalo. Hena'mube? Me'mofihi ya'ma fayaha'a hiti ni'igo bu goto kehelito nominotaya fenene hilube'mu nohigo ya'ma kaga nolube.

32 Lenali ya'ma fa'menena'mu yamofihi lenegekesa yigiba yigiba hite keta huse'namu minalabe luto keheli'ohuto nolube. Bo kofuta nehana'amagi Sipi Bomofihi foya'muko kehelite minalune'mu habe. Minete Sipi Bouba kehelinogo bati hilibe lite lilenogo lilune'mu habe. 33 Liha'ani hiti nehanamagi metoga nasana'muko kehelilune'mu habe. Ya nehinogo liha'animagi kehelinogo bati hilibe litego lilune'mu habe. 34 Ya nehite enegekesa loemo nekehelite neminabe. To ana suko hite yafana'i panala'i enali Sipi Bomofihi lili'namuko kehelite minalune'mu habe. Ya nehite komopa'ani enugufa'ani Sipi Bomofitoga molo emilune linogo kehelilune'mu habe. To baha'a hiti ana'i enali metoga nasana'muko kehelilune'mu habe. Ya hilete baha'animagi keheli laga hilabe lite ya hilune'mu habe.

35 Lenali bati hite minalabe luto kaga ya'ma lu nolepube. Lenali kapo fi hekini nologopa, lenali negi menese komopatini li nupa hite melelenogo Sipi Bomofitoga asagato minete agoya hi emite minalabe luto nolube.

36 To bo moneuba ai pa'a ya'ma bolo bilina legege hulenogomo ya'ma kaba huto le'mo mololoto nohinogo komopa'agu laga'a besinogo kosele'i henogomo baha'alo ho lifilube'mu nohutomo, ho lifilina ya'ma sibina mehilube'mu hibe. 37 Ya hilinamoya bo moneuba komopa'atu ma luto keheli amuya malalube'mu hibe: Pa'ni ya'ma fa'mene minalibe luto kehelinogo pa'a minalibe, keta mebesinogomo lu huto huto lu laga hinogo bati hilube'mu hibe. 38 Ya hu'ehina bo moneuba ai pa'a baha'a lilibe luto keheli emilina ya'ma bati hilube'mu hibe. To moneuba pa'a ho melifise le'mo mololoto minalina yamofihi bati huto mino lito tilube'mu hibe.

39 A'i moneubafi moneuba baha'auba moloto hilina, hilina'a huto mino lito buto minalinagihe. Baha'a fililenogo ya'ma bo moneto bilube lutomo bilibe. Ya hu'ehinaya sibi saba huto mino lito bilina'a meni'ibe. Sipi Bomofitoga komopa'a emilina bolo bilina'mu yabe. 40 Negekesa keheluna ana a'i bolo mebuse fa'mene minalina ya'ma gelo bito minalube'mu hibe. Ya suhi huto kaga ni'inaya negekesa keheluna Hu'mamofihi Sikalafu'i nanitoga nohigo nolube.

Copyright information for `BEF