1 Corinthians 9

Aposolo bona'magi foya hapi fi'ahanamofihi ka'a

1Nani kumu henabe lite nekehelibe? Mone lulata bomofihi koko pana'a nohibe lite nelafihe? Ya menohube. Nani Hu'mamofihi koko pana'a nohube. Nani kumu ya'ma aposolo bo menohibe lite nelafihe? Nani lusi aposolo bo nohube. Nani ya'ma Sipi Bo Yesu bu mego'ohufihe? Bu go'ohube. Foya'nimofihi legeya'a Sipi Bomofihi nehe'mose'nagu huto hulata nohina yamofihi lenali ya'ma ya suhi menehafihe? Nehabe. 2To bona'i luga'amagi kumu aposolo lolo mehibe linogo lenali nani kumu aposolo bo nohibe lite nekehelibe. Aposolo foya'nimofihi legeya'a Sipi Bomofihi lusalo huto hu'ehina'amofihi lenali ya'ma nehabe.

3Hapa'nimu lilata nehana enali kaga ya'ma lu gelehe ito lu epilata nohube. 4Luga'amagi enali lalitogati nani foya'ni li'ohunaloti nose'na yafi nagami'i menalibe lite lu laga hi netalafihe? Bati mehilibe. 5Aposolo luga'a enali to Sipi Bomofihi gonamu tamu'a hiti to Pita enali ana'i yagapana'ani hiti mono foyalo bilata nehago nose'na epilata nehabe. To lali ana suko huto lihati hiti mono foya lilutamoya nose'nati menimilana yamofihi bati hilifihe? Bati mehilibe. 6To nani hiti Banabasi hiti le'alisigo le'eyatu foya lilata nohutoti'a nose'nati'a lilata nohu'ibe. Enali suhi huto le'ayatu lili'na melise naluta lu laga hu le'ete'ahana yamofihi bati huto ni'ifiye? Mehu'ehibe. 7Kibina bo enali luba hilana nasana to nose'na'ani enali'ani efaha'anitu mina filata nehafi? Menehabe. To moneuba foya lito li huto huto hekele'ehinogo lito menalina ni'ifihe? O'e. To moneuba bulumaka yaga kaba huto amiha'ani menalifihe? Nalibe. Ya'mu lenali nose'na le'emilo, luto nolube.

8To kaga luto nolunamofihi ya'ma metoga bona'magihi kaga nolube. Ya hu'ehinaya mono bukugu kaga hiti anagu huto nohibe. 9Moseu keya ka lu'ehina kaga ma luto lu'ehinamo ni'ibe:Bulumaka moneuba foya noli epoloto kifi nalube'mu nohinogomo o'e melilo. To Hu'mau kaga ya'ma lu'ehina bulumaka enali kumuko melu'ehibe. 10Bona'magita lalimo hiti lu'ehinamo ni'ibe. Foya lilata nehana enali legeya'a huto higo nalune lite keheli'ehite hekelelata nehana ya bati hulata nohibe. 11To nani Banabasi hiti le'ali ya'ma lenalitoga komopatinimofihi nasana legeya'a hekololata nohu'ina yanamofihi mina'a lenalitogati le'agufamofihi nasana lilu'ina'mu keheligo keta nohifihe? 12Luga'a enali lenalitogati nose'na fe'nohi lilata nehana ya nasanauba bati hu'ehinamo ni'inaya lama'naka le'ali hiti ana suhi huto linogoti bati hilinamoya le'ali hapi huto foya li'ohu'inagati ema meli'ohu'inamo ni'ibe. Kilisitohi ka lamana'amofihi kapo fi hekini lo eto lalu'ifihe luto lenalitogati nose'na fe'nohi lilabe lite li'ahanamo ya'ma he'miloto ketana lito humofa'na hulata nohu'ibe. 13Sipi mono nonugu foya nelina'amagi enali mono nonugutiko ite neana nose'na luga'a nelata nehabe. To logo'nogo hite kuguhi koyo emilata nehana bona'i logo'nogo hite nose'na laita hite nelata nehabe. Ya nehana'a ya'ma lenali menekehelibe. 14To ai Sipi Bomofihi ka'a leli'ali bona'i lali ana suhi huto ka lamana'a keheli'ahanaloti lugufamofihi nose'na lilabe luto lu lepolo'ehinamo ni'ibe.

15Ya hu'ehinaya nani'ni ya'ma kapogu menobube. To lenali ya'ma ana suhi li netalabe luto keheli'ohuto fayahi ya'ma mekoyobe. To bo moneuba ya'ma nani suhi huto Hu'mamofihi ka lu nolepito mina'a melise negelo bilata nohuna li sibina hu lalibe luto yamofi kumu kehelugo keta nohinago fililata nasanauba nanitoga lilifihe? luto yana'mu kehelugo keta mehuse nohibe. 16Ka lamana'a lu huto hulata nohube. Yana'mu lusi bo nohube luto liluna yamofihi bati mehilina'mu yabe. Lili'na'amofihi nani nugupisalo molo'ehinamo ni'ibe. Ka lamana'a lu yege mehotita akae, bati mehina suhi huto minotita'mu yabe. 17Foya ya'ma nani'ni negekesa kehelito li huto huto lutita yamofihi minomo buto mina'a lutita'mu yabe. Nani'ni negekesa kehelito meli'ohunamo ni'inago yamofi kumu ma luto ni'ibe. Hu'mau ana foya nugupilo molo netago lilata nohube. 18Ya hu'ehina'mu mina'a lilata nohunamofihi ma luto ni'ibe. Nani mono foyalo nobuto ka lamana'a mina'ani meni'ina bona'i lu epilata nohube. Ya nohuto ka lamana'a lulatanamofihi mina'a lugufamofihi nose'na'a lilatana'mu li'ahana ya'ma he'milata nohube. Nani negelo bise'namofihi ya'ma mina'a nolube.

19Nani asaga bona'magihi kele kele bo'ani menohube. Aku'i bona'i yege yege'i ya'ma Kilisitotoga enele'mo malalube luto fa'mene kele kele'ani lolo huto nohube. 20Yuta bona'i Kilisitotoga enele'mo malalube luto Yuta bo enalitoga minoto, Yuta bona'magihi suhi lolo hu'ohuna. To nani'nimu Moseu keya ka lu'ehina kagamofihi kele kele'i hu etoto ni'igopa keya kalo kele kele'i hi etelata nehana bona'i ya'ma Kilisitotoga enele'mo malalube luto enalitoga mino moloto keya ka lu'ehina kamofihi kele kele pana'a suhi lolo hu'ohuna. 21To fegutoga bona'i enali Moseu keya ka lu'ehina ka mekeheli'ahana bona'i Kilisitotoga enele'mo malalube luto fegutoga bona'magi enalitoga mino moloto keya ka mekehelise bo suhi huto lolo huto mino'ohuna. Ya'ma Hu'mamofihi bulo ya'ma ai'a lu'ehina ka'a mege'i memalalube luto melilube, nani'ni Kilisitou lu'ehina ka'a mege'i moloto keheliya i'ohube. 22To bona'i mone'a komopa'anigu Hu'mamofihi kagagu amuya'ani menina Kilisitotoga enele'mo malalube luto nani amuya'ni menina bo suhi huto lolo huto mino'ohuna. Nani ya huto fato fato bona'i enehe'malube luto bona'i fato fato bona'i enalitoga minoto fato fato suhi lolo hu'ohunamo ni'ibe.

23Silaga nasana yamofihi fa'mene ka lamana'a huto holito bilibe luto lolo hulata hu'ohube. To Hu'mau lusa nogi epoloto nani hiti lusa gi netalibe luto lulata nohube. 24Lenali ma lite menekehelifiye? Yokolo'na lolata hepato ya'ma yagapana'magi enali yege yege'i hololu lilata nehana nasana ya'ma moneko'uba kohe toto hololu luba luba huto henetito mina'a lilata nohibe. Lenali ana hite Hu'mamofitoga bite sekele mamuti lilune lite hololu lilo. 25Yagapana'i yokolo'na hilana enali enugufa amuya malalune lite hapi fite fato fato legege hite elata nehabe. Lilune'mu nehite enali sekele mamu nasana fa'menena'mu ya suhi hilata hi'ahana yabe, lali ya'ma sekele mamu'a minoba minoba nasana'mu ya suhi hilune. 26Nani'ni hiti ya'ma hololu lulata nohuna yamofihi keya'a hiti nasana bu go'ohuto fotogo huto hololu lulata nohube. Nani foya li'ohunamofihi nani ho fetaga mehube. 27Nani bona'magihi mono ka lu epi epi huto nohuto nani'ni fa'menena lolo hu lalube luto nugufa'ni lelito limito moloto kaba'a hu etoto nominobe.

Copyright information for `BEF