1 Peter 4

Hu'mamofihi bagaguti kasigo kehelito minalune

Kilisito ai gufa'amo keke'i luse'namofihi gupisalo ti'ehina ni'inagi lenali ana suhi lolo hite lusa lite amuya lilo. Ya nehite ya'ma kehelilo. Moneubafi moneubafi ai gufa'amo keke'i luse'namofihi gupisalo tinogo nohilinauba foipa nasana li lalibe luto ekesa moloto minalibe luto lilune. To yatai kanagu lenugufamofihi enumu fililatana yamofihi melise Hu'mamofihi bagaguti kaga'a kehelite ma melugu mineme bite minalabe. Afetoga ema kanagu Hu'mamofihi mekeheli'ahana bona'magi enali laga'a kehelite ana'ina lilata nehana suhi hite lenali mine'ahana yabe. Ya'mu mine'ahana yauba kosele'i melepoho'ehina. Lenali mokolo hise nasana hiti ana'mu lenegekesa yigi yigi hite minete ekesa nagami'i nelete negi ne'ahana yabe. Ya nehite nagami'i nose'namofihi lenegelo nebite ya'mu li nupa hite minete silaga'namu lenegelo nebite laga mehina suhi hite lenegelo bi'ahana yabe. Lugefa bu gete lipite ibe ligi abe ligi hite mine'ahanamo ni'ibe, yamofihi he'milune ya nasana li'ahana lite nehago kana'a yatama lite mine'ahanamo ni'ibe. Aku'i molo emite ya suhi mehilo. To yatai ya'ma Hu'mamofihi mekeheli'ahana bona'i enali foipanamofihi komopa'agu sibi hapa'a fato fato'i napa hite lilete nehago to lenali enalitoga mehepise fa'mene neminago enali bu gete topa hete lenali kumu libe pigi bibe hite minelata nehabe. Ya nehanaya lenali ya'ma beto hilo. Enali enubu hiti nehananamagi hiti fili'ahana bona'i hiti alihi Hu'mau enele'mo nupa huto ka foya lilina kanagu aitoga hapa'ani lu hokolo hilana'mu yabe. Yana'mu Kilisitou buto fili'ahana'amagihi ka lamana'a lu huto huto lu epi'ehinamo ni'ibe. Henabe lutobe? Enali'ya filise bona'magi asaga'i koyapa melugu minete enubu hiti mine'ehite ya hi'ahanamofihi hapa'animu Hu'mau kehelito guna moloto kaga'animu loko hu epolo'ehina yanamagi to enemeha'ani Hu'mamofihi kapolo nebite minoba minoba minolatana nasana mone lilabe luto lu epi'ehinamo ni'ibe.

Hu'mau guna moloto lepi'ehina'amofihi kaba hu bati hilo

Ana'ina silaga'na su halina kana'a anasi tupa nohibe. Ya'mu lenali komopatini to lenugufa kaba hite keheli bati hite Hu'mamofitoga kaga luto loka halune lite babahi hite minalo. Ya nehite lenemehi ai eminogo ai eminogo hite minalo. Ya'ma hilana'auba silaga'na be ligi'ehina nasana ni'ibe. Komopa'ani epilatana yanauba foipana li'ahana asaga'i enebe ligilata nohibe. Lenali kosele'i melepehenogo bonoho bona'i ya suhi hite kehelite enebe tigite nohatinigu enele'mo melenogo tite minalabe. 10 Lenali Hu'mamofihi ka'amofihi kehelite lenele'mo bati huse'namofihi amuya fato fato'mofihi guna molo lepolo'ehinamo yanatu foya'a lelite nebinogo bona'i luga'amagihi enele'mo bati hilana yanauba Hu'mamofitogati amuya'a lepilenogo yanatu'i ana hi epalalabe. 11 Luga'a enali mono ka lu huto hilanamagi Hu'mamofihi keheli lamana hilete lu epilabe. To luga'a enali bona'i enele'mo bati hilanamagihi ya'ma Hu'mau amuya epilenogo yanatu'i lolo hi epalalabe. Lenali ya suhi ma suhi lolo nehinogo Hu'mamofihi fayahuba bati huto minalibe lite kehelite ya hilabe. Yesu Kilisito ai kumu yabe luto fayaha'auba hu lamana hilibe. Yamofihi sekele mamu'a hiti fana mehena amuya'a hiti aitoga minalina'mu ya'ma minomo tito buto mino bai toto minalibe. Ma'naka.

Yesu ai kumu luto lenagabu ginogo minete lenipagu fuluna li huto hilo

12 Nigibo nalalu'nigitabe. Lenali komopa'ni lepi'ohuna lenalitoga lubana li huto hite mele'ahana'a ni'ina baga'a hiti huto hu'ehinamofihi nasana yamofi kumu lenali kosaba'i huto hu nolimibe lite lenali topa hete meminalo. 13 Koyapa'i Kilisito sipi keke'i luse'namofihi gupisalo ti'ehina ya'ma lenali ana hite Kilisito kumu leniginaga fi'ehina yamofihi komopa'agu mine melete minete komopatini bati hinogo minalo. Ya hite nehinogo lenegelo bise'na'a hiti fana tose'na'a li huto hu lepinogo ana suhi huto komopatinigu ana'ina kosaba nohinogo lenegelo bite minalabe. 14 Lenali Kilisitohi gi'a kehelite minana'mu yabe lite libe kofa hibe hite mumusopa i lepelenogomo kehelinogo yauba amuya'a hiti'na lolo hite lenegelo bite minalo. Ana'ina ya hite lite li lepilenogomo Hu'mamofihi Meha'a silikeha'a hiti nohinauba lenalitoga limito minalinamofihi hapa'a huto nohibe lite lilabe. 15 Lenalitogati bo moneubafi moneuba ho filise'nafi to gumina huse'nafi to kegeiyo huse'nafi to hipa hipa huse'nafi to bona'magihi nasana'mu lubu gilipe ape nohutana'mufi ka foya li epelenogo naga nonugu keke'i lu laligihe. 16 To mone kegi'a moneuba ai Kilisitohi bona'a nehana'mu yabe luto naga'i emilenogomo ya'ma ya hu'ehina'mu kehelinogo buya'a hiti lolo mehilibe. To Kilisitohi gi'a kehelito minoto Hu'mamofihi foke ka lu emilibe.

17 Nekehelifiye? Hu'mau ai'a bona'magihi hapa hapa'animu loko huto guna molo epalalina kana'a tupa nohibe. To bona'a lalitoga hapi fito lilube'mu hibe. Ya hu'ehina lalitoga kohe toto napa huto lilina hena hilibe? Hena huto oto ka lamana'a keheli he'mi'ahanamagihi hena hena hu epalalina ni'ibe? 18 Yana'mu mono bukugu kaga mone fayahi keye'ahanamo ma luto ni'ibe:

  • Bo lamana'a
  • enali foipana lilata nehana kanagu
  • enele'mo bati hite enubuto binogo
  • minalana'a keta higo ni'inaya,
  • ya hu'ehina
  • mono ka keheli he'mite minete
  • foipana lolo hilata nehana
  • enali hena hilana ni'ibe?

19 To ya hu'ehina Hu'mau lu kehelinogo bati hulenogomo keke'i luse'na'animofihi gupisalo tilana bona'i enali komopa'ani'ya le'mo huto hulata bo Hu'mau ai'a ligo amuya mololata bomofihi kaga'amu fifa ite kaba huse'nagu mine lite tite lamana hite minalabe.

Copyright information for `BEF