1 Thessalonians 3

Lenali kumu yabe luto keke'i luto minoto lito hu'ohuna menetago nani'nisigo Atenisi hepatoga mino'ohuna. To Hu'mamofihi koko pana'a lalalutifu, Timotihi ho lufugo he'mi netoto lenalitoga bilibe luto lu'ohuna. Kilisitohi ka lamana'a lulata nohina bouba monolugu lenele'mo babahi hilibe luto to lenele'mo amuya hilibe luto, to ya'ma kalana'i melenogo lenali Yesuhi kapo'amofihi he'mi lalabe luto ya'mu ho lifi'ohube. Lenali ya'ma ya lite kehelilo. Luba hose'nauba lugupisalo tilube'mu higo Hu'mau ya'ma lu laga mehuse nohuto ananamotu lele'mo amuya hilina'mu yabe. Ya'ma lenali akeheli'ahanamo ni'ibe. Ya huto ni'igo lali lenali hiti nominoto kalana'i molo letalune'mu nehabe luto kohe toto lu lepi'ohuta ni'ibe. To yatai anana ahuto hu'ehinaya lenali akeheli'ahabe. Ya hulago limi'i mololata bo, Satau ai lenimi'i mololago Yesuhi kapo'a he'mi'ahafi mehe'mi'ahafi to lali foyamofihi legeya'a ho helili nohifi huto nohifi yamofihi hapa'a kehelilube luto lenali kumu niginaga fise nokehelito minoto lito huna menetago Timotihi ho lufugo bu'ehina.

To yatai Timotiu lenalitogati i behe huto oto kaga'a beto hu'ehibe. Kilisitotoga keheli amuya mele'ahanamofihi to komopatini epilata nehana yamofihi lamana ka lu limi'ehibe. To lenali ya'ma lali kumu laga'a kehelilata nehanamo to lali lenali'i bu lenagalune luto kehelilata nohutamo ya'ma lenali ana suhi hite lali bu lenagalune lite kehelilata nehanamo ni'ibe. Yamofihi ka'a alu su ho'ehigo komopatigu bati huto nohune. Lalalutigita, komopatigu lagabu'namofihi komopa'agu to keke'i luse'na yamofihi komopa'agu nohuto lenali Kilisitohi keheli ule'ale hi'ahana ka'a keheliloto komopatigu bati huto babahi hibe. Yatai lenali Sipi Bomofitoga amuya melete nehago lali kehelito komopatini bati hinogo nominone. Lali lenali kumu hiya huto Hu'mamofihi fokehi lilune? Lenali kumu yabe luto Hu'mamofihi gobisalo komopatigu sabiyana lolo nohigo legelo nobune. 10 Lali buto bu lenagalune luto to lenogobisalo minototi mono ka luga'a mino lito bu'ehina yamofihi lu lepilune luto utehi etehi babu luto lito Hu'mamofitoga amuya moloto lulata nohune.

11 Afotifu, Hu'mau ai'a to Sipi Boti Yesu etali kapo hokolo hi letele'inogo lenalitoga foiya biluta ni'ibe. 12 To Sipi Bouba lenele'mo higo ai komopa'a eminogo ai komopa'a eminogo hite mineno. To lali komopati lenalitoga molo'ohuta suhi hite komopatini silaga bonatoga malalana yauba napa huto hofa tenogo hite minalabe luto Hu'mamofihi loka nohone. 13 To Sipi Botiuba komopatini le'mo hetofa hulenogo Sipi Boti Yesu hiti to ai le'mo'ehina bona'a asaga'i hiti nehetilina yupahi lenali ya'ma Hu'ma afotifihi gobisalo minete komopatini bati hinogo hetofa lenemehi hiti minalabe.

Copyright information for `BEF