1 Timothy 2

Hu'mamofitoga kaga liluta ka'a

Kaga ya'ma lu epilane luto kohe toto tito nani amuya moloto kegekesa lito nolube. Enali ana'ina'mu buka buka tite Hu'mamofihi loka henogo bona'i luga'a asagatoga minoto fi hetofa hu epalalibe lite Hu'mamofihi foke ka li emilo, luto lu epibo. To enali legeso hite fulu hite mono kagu bati hite minelenogo bona'magi kehelinogo bati hilibe lite enikibina bona'i to silaga'i kaba bona'ani kumu Hu'mau fi hetofa hu epalalibe lite aitoga bite nunumu lilabe. Ya luto lu epibo. Ya hilana nasanauba bati hilube'mu hibe. To lubuto bilata Bo, Hu'mau ai ya nehana'mu keheligo bati nohibe. Ai ya'ma bona'i asagatoga enubuto bilube luto to ya'ma hetofa ka'a lilabe luto kehelilata nohibe. Hu'ma ai moneko'i nohibe. To Hu'mau hiti lali hiti nekisaga luga luga nohunogo bo moneko'i Yesu Kilisito folagahatigu bo lolo nohibe. Ai lele'mo moneko nohibe. Ai'a ya'ma lali bona'i asaga'i foipanati'mu pa salube luto filito gufa'aloti lalimo mina fito lele'mo'ehina yabe. Hu'mau molo'ehina kana huto higo ai ya huto fili'ehina yabe. To hena'mube? Hu'mau yege yege bona'i enubuto bilina ipagu nohina'a kehelilune luto yabe. Ya'ma kaga lu hokolo hilane luto Hu'mau aposolo bo nele'mo malago nohube. Fegutoga bona'i enalitoga buto ka lamana lu epilago enali keheli ule'ale huse ka'amofihi hapa'a giyaka lite minalabe luto ana foya'mu nele'mo eto hu'ehina. Ya'ma ka faga hiti menolube. Lama'naka luto nolube.

Ya higo noto noto bona'i enali enita bigo luba sabo mehise minete bona'i komopa'ani gulu gulu linogo minete enayahi li saga hite Hu'mamofitoga lite fokehi lilabe luto nolube.

To ana'i enalitoga nolube. Enali kakili'ani li lamana hite bilete libe fitobe hite humofa'na hilenogo yanauba bati hilube'mu hibe. To bomagihi enumu fililibe lite kehelite mine'ahana yauba oka'ani sekele mamu'ani enugufalo pesesu'ani goli efahi hiti, to gu kata'ani ya'ma mina'a sipi'a i hepilune'mu nehana, o'e luto lu laga nohube. 10 Mono kumu kehelite minalune lite lilana ana'i enali minete lite melete hilanamagi hetofa foya'a lite boana'i enehe'mete minete bati hilenogo ya'ma bati hilube'mu hibe. 11 Ana'i enali enugufa lelite metise legeso hite minete enegekesa keheli bebe sete minete kaga kehelilabe. 12 Ana'magi kaga enelepilune lite ana foya lilanafi o'e luto'ni lu laga nohu epolobe. Enali bomagihi kaba hite enebe ligi'ahananamo meni'igo enali ka melise legeso hite minete kaga kehelilabe. 13 Hena'mube? Bomo Atahi ya'ma yata'a huto hu'ehina ni'ibe. To a'mo Ebahi ai alihi huto hu'ehinamo ni'ibe. 14 To Atahi ya'ma Satau mi'i malago keheli emi'ehina meni'ibe. Ebahi aitoga mi'i malago keheli emito o'e luto meligo foipana huto hu'ehina ni'ibe. 15 Ya hu'ehinamo ni'inaya ana'i ya'ma enali mono kamofihi keheli ule'ale hite Hu'mamofihi enemehi emite komopa'ani gulu gulu linogo minete ya suhi ma suhi hilanamofihi sibina hu lalune lite enugufa'ani kaba hite limi melete minalana yanauba yagapana'i ketalune'mu nehago Hu'mau enubuto bilina'mu yabe.

Copyright information for `BEF