1 Timothy 3

Mono foyalo kaba bona'i neminanamofihi ka'a

Bo moneubafi moneuba babafi minalube luto lilina ai bati lili'na lilube'mu hibe. Yamofihi ka legeya'a lamana'a bati huto ni'ibe. To babafi lolo hilina foipa meminenogo minoto a'i moneko'i li'ehilina bouba minalina'mu yabe. Ya suhi ma suhi hilutaya sibina hu lalube luto gufa'a kaba huto minalibe. Legeso huto besana kapogu minalina'mu yabe. Ana bouba bonoho bona'i elenogomo mehi epito enebe tigito enele'mo malalibe. Mono bukugu kaga lilata foya yamofihi fato bona'i lu enelepilina keheli bebe soto le'mo fotogo huto lilibe. Amuya nagami'i silaga'i noloto negi nalina bo meminalibe. To negi nagami'i noloto lu baga luto luba li huto mehilibe. Ai legeso huto minoto le'mo baba ito to efaha foyalo komopa'a memalalibe. Ai'a liha'a hiti yagapana'amo hiti legeso huto mino bati huto kaba hu epoloto enegekesa lito enele'mo bati hinogo enali kaga'a kehelite minete agoya hi emilabe. Yalo bo moneuba ai'a liha'a yagapana'a bati huto kaba mehu epalalina aiya Hu'mamofihi bona'a ana suhi huto kaba mehu epalalina'mu yabe. Ai babafi meminalibe. Ana bouba babafi bo hilube luto yuhufasi komopa'a li gelehe huto Hu'mamofihi mege'i ma'asi nomalana bouba ai babafi lolo mehilibe. Hena'mube? Aiya Satau koyapa'i hu'ehina suhi luto gufa'a lelito tinogo Hu'mau ka foyagu le'mo moloto logo hepa'mofihi nasana lolo hu lalibe, luto yabe. To fegutoga bona'i Hu'mamofihi ka mekeheli'ahanamagi enali ana bomofihi hapa'a kehelite hetofa bo nohibe lite lilata nehana yamofihi ai babafi lolo hilibe. Hena'mube? Hapa'a bati menohibe lite nekehelina bomo ai Satahi fi taga hu etolenogo kelefu'agu holenogo ai kumu fakupa ka linogo buya hu lalibe luto yabe.

Mono kaba bo kaga lilata nehanamofihi ka'a

Mono lili'nalo bomagi enali ana suko hite fulunagu minete hetofa foya lilata nehabe. Enali enabagaguti ka foipa'amofihi ibe laga hibe hite le'mo sibi sibi mehise ka lamana'a lite minalabe. Bai nagami'i neba neba mehise nehana. To efaha fe'no lilatana'mu komopa'ani emite enegekesa yigi yigi mehilana'mu yabe. Enali komopa'anigu gulu gulu linogo Hu'mamofihi ka lamana'a lu hokolo hu'ehina ka'a keheli amuya melete yamofihi li pili kete minalabe. 10 Kai ya'ma bona'i bati hilafi luto kohe toto hapa'ani babeyafa huto fi taga hu epoloto bu enegenogo bati hinogo mono foya epilenogo mono lili'nalo bo lolo hilabe. 11 Ana suhi hite, enali liha'animagi hapa'ani bati huto ni'inogo fulu hite minalabe. Enali megeka melise minalabe. To ana ana'magi negi nagami neba neba hilana meni'ibe. To enali hapa'ani asaga'i hetofa hite minalabe. Mone gumina lise'na to faga lise'na ya hilana meni'ibe. Enali hapa'ani'mu kaba hilabe lite melete yanauba legeya'a lamana'a lolo hilibe. 12 Mono lili'nalo bona'i enali ana'i moneko li'ehilana bo minalabe. To enali liha'ani hiti yagapana'ani hiti bati hite kaba hi epelelata hinogo minalabe. 13 Ya nehite mono foya linogo bati hinogo komopa'anilo hetofa legeya'a yamofihi enalitoga minalina'mu yabe. Fato bona'magi enali kumu kehelite enofokehi lilabe. To ana huto Yesu Kilisito aitoga bite hepi'ahana ka koli mehise amuya melete enegekesaguti ka lu hokolo hilana'mu yabe.

Mono kamofihi suguna ka

14 Nani nohataga mele'isi bilube luto keheli'ohuna ni'inaya ya'ma fayahi koyoto nokimito'ni nasana moneuba naga inogo minenogo'nimo kai ma luto kehelilane luto fayahi ya'ma koyoto nokumube. Henabe lutobe? Enali Hu'mamofihi naga'magi hetofana hite minalabe luto fayahi koyo kiminogo leka soto lu epilane luto yabe. Ya'ma Hu'mamofihi naga'magi enali nohi lapusa'a legi hite lolo hinogo ai'a ka lamana'a amuya melete le'mo saga hite minalana kehelilane luto yabe. 16 Lali mono'mofihi suguna ka fala kito mino'ehina yamofihi legeya'a Yesuhi hapa'amu lite lu huto hilata nehana yamofihi koli'a hiti nasana ni'ibe. Kilisito kumu ma luto nokehelune. Ai ya'ma lali lugufa lolo huto li huto hu'ehina. To Sikalafu'uba ai hapa'a li huto higo fu ligo mino'ehina keheli'ohune. To agelo bona'magi ai'i be ge'ahana. To noto noto bona'i folagaha'anigu ai'a ka'a lu yege hago enali keheli su he'ahanamo ni'ibe. Melugu bona'magi ai kumu kehelite amuya mele'ahana. To kokulumamofihi fana meha'alo Hu'mau le'moto ti'ehina yabe.

Copyright information for `BEF