1 Timothy 4

Faga mono kalo bona'i huto hilana'mu

Hu'mamofihi Sikalafu'uba ya nasana ka'a lu hokolo huto ma luto lulata nohibe. Kana minomo tito aliha'a bona'i lug'a enali mono kamofihi li pili ke'ahanamo ya'ma he'milete keheli negi nagi nete laga mehina felemagihi enali kaga'ani mege'i malalabe. To ana foipa felemagihi faga faga kagagu bite i hepite kehelilana'mu yabe. To faga fagalo bona'i enali laga mehina hapa'ani to kaga'animofihi legeya'a meni'ina komopa'ani logouba lo fili su ho'ehina legi huto neminana bona'magi enali ya'ma ka lu epilata nehana, faga yabe. Ana'i melise gofuta minalo lite lu epilata nehabe. To nose'na mone'a menese mo silo lite lu epilana'mu yabe. Ana faga faga nelana yabe. Hu'mamofi kumu kehelite amuya melete minalana bona'magi ai ka'a lamana'a keheliya ilana bona'magi enali nose'namofihi foke ka lite nalabe luto Hu'mau li huto hu'ehinamo ni'ibe. Hu'mamofitogati nasana silaga'na ahuto hu'ehina to lamana'ago huto hu'ehinamo ni'ibe. Ya hu'ehina'mu luto nose'nalo foke ka luto lusa gito nolata nohune yamofihi mo sise'na meni'ibe. To alobole i ke'mete minalana'a ana huto Hu'mamofitogati huto hu'ehina'mu luto nasanalo foke ka luto nohune yamofihi he'mise'na meni'ibe. Hu'mau ai'a kaga'amu yabe luto to foke ka luto lulata nohuta'mu yabe luto luga gi'ehinamofihi nasana ni'inaya, o'e luto lu'ehina nasana meni'ibe.

Yesu Kilisitohi lili'nalo bona'a bati huto minolata ka

Keheli amuya mololata nohuta kaga'a to mono kaga lamana'a ya'mu luto buto i hepi'ohuta yanauba komopakamofihi legeya'a lolo huto ni'inogo kai ya'ma Yesuhu naga'a minanamagihi ya'ma lu nokumuna kaga lu epilane. Ya'ma lu epito enele'mo lamana hilata ya'ma Yesu Kilisitohi hetofa lili'nalo bona'a minalane. Koyapa bona'magi kilihe ka li mele'ahana ya kagaguti Hu'mamofihi kaga'a meni'ibe. Ya'ma kilihe kamofihi kemegesa hu emibo. Kai ya'ma monolugu buto keheli ule'ale huto minomo buto minalube luto komopaka le'mo amuya mololata Hu'mamofihi hapa'alo mege'i moloto minobo. Lugufa le'mo babahi huse foya yamofihi lamana'a nesi'asi ni'inaya mono kaga'mu asaga'i komopati le'mo babahi hulatanamofihi yatai kana'alo alihi kana'alo Hu'mamofitogati amuya lemehi fi hetofa hu letalina ni'inaya yamofihi legeya'a lamana'a ni'ibe. Yamofihi kaga'a lusiga lutomo ni'ibe. To ana kagalo asaga bona'i keheli amuya melete bebe sete komopa'ani emite minalabe. 10 Ya hu'ehina'mu Hu'ma amuya bo ai kumu fifa ilata nohuta'mu yabe luto eniginaga fise foya lugupisalo tilago foya keta'a hiti lilata nohune. Hu'mau ai'a asaga noto noto bona'i enubuto bilata bo nohinaya enalitogati keheli amuya nomoloto'a lamana ka lubuto bilata nohibe.

11 Ka asaga'i lu nokumuna yamofihi lu epitogo keheliya ilabe. 12 Enali ya'ma pana'i kosaba bo nohane li lilagi. Yamofihi bona'magi enali ka'mu keheli sibina hi lalabe. Kai amuya moloto minetogo hapaka fu linogo Hu'mamofihi keheli ule'ale hilata to komopaka fana toto minenogo Kilisitohi kemehi emilata to mono ka lilatamofihi keheliya ilana bona'magi ya'ma kapogu bilune'mu hana enelepibo. 13 Mono bukugu fayahi ge'ahanana bona'magihi enubulo leka soto lu epilata foya to mono ka hapa'a lu huto hulata foya to mono ka lu yege holata foya ya'ma Hu'mamofihi mono foyalo komopaka hetofa huto emilatagihe. Ya huto mino lito buto minetogo nani mone hiti nehetilube. 14 Kohe toto ya'ma ka lu huto huto bona'i kaga'ani kai kumu li'ahanalo ya'ma mono olopa bona'i luga'a enali enayahi latahakalo melete lusa negi ketago hetofa Sikalafu'uba mono'mofihi amuya'a fi hele hu keto'ehinamofihi lamana'a sibi hu laligi mino hetofa huto kaba huto minobo. 15 Asaga bona'magitoga mono ka luto moloto hu'ahata napa humo nobina yamofihi bu genogo laga epesilibe luto nani lu nokumuna kaga ya'ma komopakagu molo hetofa huto lito minalane. 16 Kaika hapaka kaba huto to mono ka lu epilata kaga amuya'a hiti kaba huto kaga nokumuna amuya moloto lito minalane. Ya hilata ya'ma kai kaka kehelilata nehana bona'i to kaika hiti mino bati hinogo Hu'mau lenubuto bilibe.

Copyright information for `BEF