1 Timothy 5

Mono ka keheli'ahana bona'i kaba hu epololata ka'a

Oyafa kaga lu emilube luto noluto ka emekito mone melubo. Afo'nigabe luto le'mo ketipa ito lu emitogo kehelilibe. Neheya kola bona'i ya'ma nogonamu tamu'ni yabe luto noluto ya suhi hu epolo lito buto minalane. Litana'i enali kumu ito'nigitabe luto ya'ma kaba hu epoloto ya suhi ma suhi hu epolo lito buto minalane. To yafana'i neta bona'nimagita yabe luto ya suhi holito nobuto yamofihi kaika kegekesa komopaka kaba hu bati hubo.

To keto ana'i enali'anigo minete megusa hite nehinogo enele'mo lamana huto fi hetofa hu epalalane. Keto a'i mone'mofihi yagapana'i tata'agi hiti enali kohe tete mono kamofihi foya'alo mege'i melete le'mo lamana hilabe. Ya nehinogo yamofihi ema afeha'alo ito'anigi afo'anigi kaba hi epele'ahanamofihi nona'a ana suhi hite epite to agoya hi epalabe. Ya nehinogo Hu'mau bu noenogoto gelo bilina'mu yabe. Keto ana'i lamana'a ya'ma yagapana'a menehinogomo enali'anigo minete Hu'mamofitoga enemehi melete kana'amu kana'amu ute etehi Hu'mamofihi kaga lite buka tite lehe'malibe lite fifa ilata nehabe. To keto a'i moneuba gufalo laga besise'namu mokonamofihi fe'noto minenogomo ya'ma ai kumu lilatagihe. Bu hiti nohifihe luto melubo. Ai meha'a fili'ehina suhi huto nohibe, luto lilane. Kaga ya'ma molo'ohunana lu laga huto lu epigo keto ana'magihi foipana'ani meminalina'a higo bona'i luga'amagi enali kumu sibi kaga'asigo melilabe. Luga'amagi enali bona'ani kaba lamana'a hi epelete enemehi meepilana yamofihi ka lamana'amofihi kapoguti ali he'mite to mono ka ya'ma mekehelise bona'i melugu bona'i enalitogati mine tegi hite ana foipana'aniuba enebe ligi'ehilina'mu minalabe. Ya higo keto a'mofihi bona'amagi kaba hu etalana'mu yabe.

To bona'a menehana keto ana'i kumu ma lilatagihe. Keto ana'i moneubafi moneuba bo moneko'i hiti mino'ehina a'i mino lito buto foya kana 60 yabe li he'mi'ehilinauba mono foya liloto lenalitoga minalube luto lilube'mu nohinogo gi'a fayahi pepagu keye mele'ehinogo Hu'mamofihi naga'magi kaba hi etalabe. 10 Ai ya suhi huto lito moloto hu'ehina nasana bona'magi enali keheli'ahanamo ni'ifihe? Yagapana'a ketoto bati huto kaba hu epoloto komopa'a epi'ehinamo ni'ifihe? To aitoga bonoho bona'i e'ahago kaba hu bati hu epolo'ehinafihe? To ai'a limito minoto Hu'mamofihi yagapana'a luga'a enele'mo bati hu'ehinamo ni'ifihe? Ai bona'i ketanauba sibina hu epolo'ehina'amagihi enele'mo bati hu'ehinamo ni'ifihe? To bona'i mehi epito ya suhi ma suhi hu epolo'ehinamo hapa'a loka mika hu etetogo ana suko huto ni'inogomo gi'a fayahi pepagu kayalane.

11 Keto ana'i enali yuhufa ana'magi ya'ma ligiti fayahi kayalane lite nelinogo o'e luto mekoyobo. Bolo aku'i bilana nasana'mu epesilenogo kohe tete bite Kilisitotoga i hepise'na he'mite i gelehe hite koyapa kapogu bilata nehabe. 12 Ya hilete ya'ma enali'ani hapi fite mono kumu lu laga huse kamofihi keheli he'mite minenogo foipana'ani huto hinogo fakupa ka enalitoga minalina'mu yabe. 13 Ya hilete ya'ma nonugu fato fato'na tila limila hite futu'a kaga lite minelata nehana to ya'asigo meni'ibe. Enali notu humofa'na hite fa'mene kagamo lite faga faga lite bona'magihi foyagu ukimi akimi hilata nehabe. 14 Ya nehana'mu nani ma luto nolube. Keto ana'i kosaba'i enali baha'anilo bite minete yagapana'ani eneketete enali'ani noha'ani foya'ani bati hite kaba hite le'mo bati hite minalabe. Ya hite nehinogo lali fatehatimagi enabagalo ilenogo lali kumu ka sibina'a mone melilabe. 15 Yatai keto ana'i luga'amagi enali i behe hite ka lamana'amofihi kapo ti he'mite Sataha mege'i nemalabe. 16 To keheli amuya moloto nohilina a'i mone'mofihi kogunaguti keto a'i mone nehilanamagihi ai enehe'moto komopa'a epito kaba hu epoloto minalibe. Ya nohinogo Hu'mamofihi naga'amagihi enugupisalo metilibe. Hu'mamofihi naga'amagi enali keto ana'i enali'anigo nehana'a yamagihi enehe'mete fi hele hi epalalabe.

17 To mono ka enelepise kaba bona'i olopanamagi enali hetofa foya linogo ya bati hulenogomo mina'a mineme tite lilabe. Mono ka lu enelepilata lu yege holata lamana foya lilata nehanamofihi enali'aniya foya amuya melete lilana ya'ma lilana'mu yabe nolube. 18 Mina'a lilanamofihi ya'mu luto mono bukugu fayahi ya'ma lite keye'ahanamo ni'ibe:Bulumaka yaga moneuba foya lelito nobuto nose'na nalube luto nelinogomo bagalo fi sala mekalo. Fa'mene nalina'mu yabe. To kaga mone hiti ma lite keye'ahanamo ni'ibe:Bona'i mone'amagitoga bite foya lilana bona'magi ana bona'i mina'a lilana'mu yabe. 19 To bo moneuba olopa mono bomofihi fisa ito nelinogomo nogo'alo melibo. Bona'i loebefi loebe monebefi enali kaga'ani linogo keheliloto ka foya li etalane. 20 Bo moneuba foipana linogomo luga'amagi enali kehelilete enelesa linogo foipana li lalibe luto bona'magihi enogobisalo lu huto huto le'mo bebe salane.

21 Nani Hu'mamofihi to Yesu Kilisitohi etogobisalo to Hu'mau enele'mo eto hulago ai maha'aluga hetofa agelomagihi enogobisalo ya'ma luto lu molo noketobe. Lu laga huto lipoti nokimito kaga lu nokumuna keheliya ito kaba hitogo limito mekeno. Bona'i luga'a enali kumu kehelitogo tila limila nehinogo ya suhi ma suhi mehu epolobo. Asaga bona'i moneko kemehi epibo. 22 Bona'i luga'a enali kumu mono foya lilabe luto li aku metose lataha'anilo kayahi moloto lusa gi epalane. Enali foipanauba kai kugupisalo ti laligi kaika komopaka kegekesa kaba hitogo komopaka gulu gulu linogo minalane.

23 To kaika ya'ma kipagu filata to kebesilata nohina'mu ya'ma nagamiko menose bai nagami'i hiti nesi'a hekito noletogo kipagu bati hilina'mu yabe. Ya'ma kaika'mu ya nolube.

24 To enali'ani'mu kaga ma luto minomo buto nolube. Bona'i luga'amagihi foipana'ani huto hulatana ni'ibe. To enali foipana'aniuba kohe toto nobigo Hu'mau foipana'animu kehelito ita bise'namofihi nona'a epilina'mu yabe. To bona'i luga'amagihi foipana'ani fala kito ni'igo aliha kanagu huto hilube'mu hibe. Hu'mau enali hiti nona'a epilibe. 25 Ana suhi huto lamana'a bona'i luga'amagihi enehe'mose'na'ani to hetofa foya'ani hiti ahuto hulata nohibe. Mone'a suguna'i fala kito foya nolina mino lito buto ya'ma bu megalutamo ni'ibe. Aliha'a huto hu etalina'mu yabe. Yana'mu yata'a geba hutoka to enali hapa'ani keheli fe luloto yalo lataha'anilo kayahi moloto Hu'mamofihi lili'nalo enele'mo malalane.

Copyright information for `BEF