2 Corinthians 10

Polu ai'a foya'a le'mo amuya molo'ehina

Poluita nani ya'ma Kilisitohi fuluna'a hiti lehe'mose nasana'a hiti kumu luto lenegekesa lito lu lepilugi kehelilo. Kehelite nani kumu ya'ma lite lilata nehabe. Lalitoga oto minoto ai'a amuya'a hiti bo menohinaya kaga'a nagami'a hiti lu lepilata hu'ehina. Ya huloto buto minoto golagaguti kaga lu lepilata nohibe. Lenali ya nelabe. Nigibo nalalu'nigita, lenalitoga buto minoto melugu bona'magihi komopa'anitu kehelite lilata nehanamofihi suhi huto foya'a lito nominabe lite nani kumu lilata nehana bona'i nogolagaguti kaga lu epilube luto lilunamofihi babahi huto lipoti lu epilunamoya lenali luga'amagita ana suhi huto nogolagaguti lu lepi lalugi nohoka mehilo. Lali fa'mene bona'i ma metoga minoto humofa'na hu'ohutamo ni'inaya Hu'mamofihi kaga kumu yabe luto luba hulata nohuta yamofihi metoga bona'magihi tafa komopa'anitu kenasabo bilata nehana ya huto meni'ibe. Mono kamofihi luba'agu foya lilata nohutamofihi metogati gimi mage'i huto nohuto meni'ibe. Ya'ma Hu'mamofihi amuya'a hiti nohuto yanatu fatehe bona'magihi fa'mene kaga'animofihi bihu gegisa'a tele bilata nohune. To enali amuya moloto li pigi binogo ni'igo, Hu'mamofihi hapa'a keheliya ise'namofihi kapo'a hekini lalune'mu ana'ina lite enita bise kaga'ani li nohe'mune. To Kilisitohi agoya hu emiluta'asigo huto hilibe luto kehelito fato fato'mofihi naga'i emito nohune. Lenali nani ka'ni keheli fe nelanamofihi ya'ma babahi huse helenogo bona'a luga'a ka pelesa ilata nehanamagihi osahi enahalune luto enegeba huto nohune.

Nani hapa'ni lenogobisalo huto nohinamofihi legeya'a bu galo. Lenalitogati bo moneubafi moneuba ai'amu kehelito Kilisitohi yagapana'a lolo hilinauba ai'amu ma luto kehelibe. Ai moneko'i Kilisitohi bona'a menohibe. Lali hiti ana huto asaga Kilisitohi yagapana'ago nohune. Sipi Bomofihi foya'amu kehelito amuya'a limilata nohinamofihi lenele'mo laba husemofihi ni'igopa lenele'mo lukesa fi lepalalube luto ni'inaya nani ana amuya'amu luto nugufa lelito tito kaga lu lepilunamofihi nubuya mehilina'mu yabe. To fayaha nasana yama koyoto nolepuna yamofi kumu lenelesa lusemofihi ka'a koyoto nolepuna'mu ya'ma lenegekesa mekehelilo. 10 Nani kumu ya'ma lite lilata nehabe: Fayaha nasana'mu kaga'a koli'a hiti to amuya'a hiti koyolata nohinaya logobisalo ya'ma amuya bo menohibe. To futu'a kaga lulata nohinamofihi ya'ma nagami'a hiti lulata nohibe lite lilata nehabe. 11 Bona'i ya hi'ahana'amagi enali ma lite kehelilabe: Nani foto'i nohuto ka fayahi koyoto lepilata nohuta ananamofihi legeya'a moneko legegeto folagahatinigu nohuto li huto huto melenogo'ni bu galube'mu hube.

12 Bona'i enugufa lelite titi hite neminana bona'i enalitoga lali i hepito legege hilune luto enali suhi huto nohune luto nolupiye? O'e. Bona'i ya hi'ahana'a enali hapa'ani ka keheli melete sibigopa ka lilata nehabe. Enali enegekesa'anilo kehelite ai bu gago ai bu gago hite hapa'ani li gehe nelibe. 13 To laliya Hu'mau melimi'ehina foya sokapo kumu lugufati li ho tiluta meni'ibe. Ai'a limi'ehina foya sokapo hiti lili'na hiti ya'ma'asigo liluta ni'ibe. To ana amuya'a hiti lili'na'a hiti limi'ehinana mone lenalitoga liluta luto lu limi'ehina yabe. 14 Lali foya'amofihi legegeto huto lulata nohune. Foyamofihi kupa'alo yamofihi lama'naka lenalitoga ni'inamo ni'inaya yabe. Hiya hutobe? Lali kohe toto ya'ma lenalitoga nehetito lali labagaguti Kilisitohi ka lamana'a yata'a hapi hite keheli'ahanamo ni'ibe. 15 Lali bona'i luga'amagihi enali foyagu laga'a keheli'ahana suhi huto moloto lali li'ohutamo ni'ibe luto lugufa lelito tise kaga lulata mone mehune. Keheli ule'ale huse'natini yamofito yahi lilenogo lali lenalitoga buto foyamofihi kupa'a Hu'mau molo leto'ehina'a ya'ma le'mo hofa talune luto ya'mu komopatigu lebesi'ehinamo ni'igo kehelito nominone. 16 Ya hulototi lenemegesaga ni'ina hepatoga bona'magihi enalitoga ka lamana'a lu huto huto lu epiloto bo mone'mofihi foya kupa'agu lali'i li huto hu'ohutamofihi lugufa lelito tilatanamofihi kaga luse'a mone lu meemilune.

17 Mono bukugu kaga mone ma luto ni'inamo ni'ibe:Moneuba lelito titi huto kaga lilube'mu nohina bouba ai Sipi Bouba li huto hu'ehina'mu keheli emito Sipi Bomofihi gi'a liyafa huse ka lilibe. 18 Moneuba ai'a gufa'a lelito tito nolinogomo ya'ma fa'menena lolo nohibe. Sipi Bouba ana bomofihi gi'a le'mo ho tigo lamana'a lolo hu'ehibe luto lilune.

Copyright information for `BEF