2 Corinthians 11

Polu to faga aposolo bona'magi

Kaga nesi'a mone lu nolepinogo'ni negi ka lolo nohinogo kosele kasele'i meleneheno. Fa'mene ya'ma legeso hite kehelilo. Nani lenali kumu yabe luto Hu'mau siko hulata nohina'mu yabe luto amuya mololata nohube. Lenali bo alobo suhi meko'ehina pa'i bala bulu tigo mino'ehina ana legi hite nehite bo monekomofito bilabe luto nani keya'i molo lepolo'ohuna ya'ma Kilisito nohibe. Yamofihi ya'ma osifa'uba mi'i mololata nohinamofihi hapa'a keheli fe lite minete Ebahi ya'ma faga kagaloti mi'i molo eto'ehina, ana kagaloti lenalitoga bona'i luga'amagi enimi'i molo lepalalana'mu kehelilata nehana golo golo gilenogo babahi Kilisito kumuko kehelilata nehanamofihi he'mi lalabe luto nekehelugo keta nohigo nolube. Lenalitoga bona'i moneuba henetito Yesuhi hapa'a lali lu lepilata nohutamo ya suhi huto ni'igopa meha'a fato fato'mofihi mone lu lepi'ehinamofihi to koyapa'i lalitogati li'ehinamo ni'igopa fato fato'mofihi kosaba kaga lu lepi'ehinamo ya'ma to ka lamana'a lalitogati keheli'ahanamo ni'igopa mono ka fato fato'mofihi lu nolepigo o'e lite melise fa'mene keheli emilata nehanamofihi bati huto ni'ifihe? O'e, yana'mu komopa'nigu keta nohigo nolube.

Nani'nimu kehelugo nanitoga ana'ina ya suhi ma suhi sa sa huloto aposolomagihi bo sipi enonogo melete enigigusa'aluga nominona legita lolo mehibe. Nani nabagaguti kaga lu lepilata nohuna nesi'a amuya memolo'ohunamo ni'inaya to Hu'mamofihi ka hapa'a keheli bati hu'ohuna yabe. To yamofihi hapa'a fato fato suhi huto lu hokolo huto lenubulo li moloto lu lepilata nohune.

To lenali lenele'mo hofa talube luto nani'ni imo limito minoto Hu'mamofihi ka lamana'a lu lepi'ohunalo mina'a mone liluna'a mehu'ohuna yamofihi sibina hu'ehifi bati hu'ehibe? Lenalitoga mono foya nolito lenehe'malube'mu nohube luto to Hu'mamofihi naga'i luga'agati yogo fe'nohi lilata hu'ohuta ya'ma enali nasana'ani gumina lise suhi huto lolo hu'ohuna ni'ifihe? To lenalitoga nohuto ana'ina mone kumu sa huto buto mone lu melepi'ohunamo ni'ibe. Nani'ni sa sa huto humofa'na nohugo Masetonia hepatogati nalalu'nigi nehetite ana'ina nimite li nabaga melelata hi'ahana. To lenalitoga ya'ma fa'mene nohuto keta'a hiti nasana mone ligo mefi lepolo'ohunamo ni'ibe. To mino lito tito aku'i ligo mefi lepalalube luto nolube. 10 Kilisitohi ka lamana'a komopa'nigu ni'igo lama'naka nolube. Ana suhi hulata nohuna nugufa le'mo napa huto hu tegi huto noluna kapo henana'mu Akaiya kapotiniguti mone fi hekini melalana'mu yabe. 11 Ya'ma yamofihi hena'mu nolube? Komopa'ni melepise ya hulata nohufihe, ya suhi huto meni'ibe. Komopa'ni lepi'ohunamofihi Hu'mau moneko bu go'ehibe.

12 Lenalitogati mina'a melito aku'i kohe toto nasana lilata nohuta ya suhi huto minalube'mu hube. To yamofihi fa'mene'mu ni'igopa bona'i luga'amagihi Polu foya lilina yamofihi babeyafalo minalune lite lilata nehana enugufa lelite ti lalabe luto yamofihi lukesa'ani li sigilata nohune. 13 Bona'i ya hana'amagihi aposolo faga fagamofihi to mono ka foyamofihi faga faga'a lite minete, Kilisitohi aposolo'a lali'i babeyafa'a lolo hilata nehabe. 14 Ya nehite yamofihi nasana'a fato fato'mofihi mone li'ahabe luto lilupihe? Ya luto meni'ibe. Satau ai hiti ya'ma agelo bona'a fi fana tete enali babeyafa'a lolo hulata nohibe. 15 To Satahi foya'a lilata nehana bona'i enali ana hite lamana'amofihi kele kele'i hi emilata hi'ahana babeyafalo enali'ani babahi hite lolo hite minete nehago topa mehalune. Enali minete sibi foya'a lilata nehana yamofihi mone legeya'a lilune'mu habe.

Polu aposolo foya lito gabu'i gi'ehinamofihi ka'a

16 Kaga lu'ohunamo aku'i lilube. Nani kumu negi bo lolo nohibe lite kehelite mehilo. Sibi yamofihi nani kumu ma lite nekehelitemo keheli nimilenogo nugufa nesi'a le'mo napa huka huto lilube. 17 Nani kaga ma luto liluna ya'ma Sipi Bouba lu'ehina supo huto lilugopa fa'mene nugufa lelito tito ka'a hapi fi'ohube luto sibigopa negi kaga lilube'mu hube. 18 Bona'i silaga'magita lugufamofihi nasana'mu le'mo napa hite kaga lilata nehanagihe, nani ana huto fa'mene babeyafa huto lilube. 19 Akae. Lenali ana'inamofihi lenali ana'ina hapa'amu kehelilata nohuta bona'i nohune lite li'ahanamo ni'inaya luga'amagi negi nagi ka lenelepilago keta mehuse hite keheli'ahanamo nehabe. 20 To koko yagapanatini lenele'mo malalune'mu nehite, to nose'natini lenebesilite nalune'mu nehite, to fi taga hi lepelete nehite, to enigihiti bo lolo hi lepalalune'mu nehite, to lenogolaga lenabaga i gofa halune'mu nehinogo yana'mu lenali kele'na ka meepekise keheli epilata nehabe. 21 Lali ya'ma ananamofihi suhi amuya memolotogo lenali koli nehabe lite nelafihe? Lali lenalitoga agoya huto mino'ohune. Yana'mu lubuyati hilifihe ya?

Mone'amagi ana'ina ya suhi ma suhi hite haha luloto ya'ma li'ohune lite nehinogo nani hiti negi bona'magihi suhi huto nelesa melinogo lilunagihe.
22 Enali'ani'mu Yuta bo nohune lite lilata nelago, nani hiti ana huto Yuta bomo nohube. Enali'ani'mu Isilaeli bona'i Hu'mau lele'mo ho ti'ehina'a nohune lite lilata nelago, nani ana huto lulata nohube. Enali aku'i ana hite enali'ani'mu Abalahahi tata'agita nohune lite lilata nehago nani analo enemege'i moloto lulata nohube. 23 Enali'ani Kilisitohi kele kele bo'a nohune lite nelago nani ya'ma sibigopa negi nagi ka lilube. Nani enebe ligito Kilisitohi koko bo'a fato fato'mofihi nohube. Nani foyamofihi keke'i luse nohuna ya'ma fato fato suhi huto ni'ibe. To mono ka'mu luto naga nonugu tilata nohuna to segi osatu nehelago nagabu'i gilata hu'ehina. Babu yupahi nani filise'na hu'ohunamofihi fato fato legegeto tito ni'ibe. 24 Yuta bona'i enali kana nayahi mone kegi'a su hago osatu nehe'ahana 39 higo nehe'ahabe. 25 Kana loebe monebe Lomu bona'magi segihi osatu nehe'ahanamo ni'ibe. Kana moneko yupahi efa osatu nehelago filise'na hu'ohunamo ni'ibe. To kana loebe monebe higo boti ya'ma li gofa higo nagamilugu limise'na hu'ohunamo ni'ibe. To kana moneko yupahi nagamilugu hege nagami'i gupisalo minoba minoba nohugo ikahi tiloto limilago, yege tiloto limilago hu'ehina yabe. 26 To kana babu luto yatama kapo buba buba humofa'na huto nohugo ko'uba nagami'uba hago filise suhi huto mino'ohuna yanamofihi gupisalo tito mino'ohunamo ni'ibe. To lubalo gumina bona'magi kofohi nemalago buto kapo molo'ohunamo ni'ibe. Yuta bona'i nani hepato bona'magi to fegutoga bona'magi nohose'na hite nehago folagaha'anigu mino baga ito mino'ohunamo ni'ibe. Sipi hepatoga buto bona'magi li gehesa hite nahalune'mu nehago mino baga ito mino'ohunamo ni'ibe. To fa'mene ka me'i ni'ina metoga hiti foya yupa kopa humofa'na huto filise'na huto mino'ohunamo ni'ibe. Hege nagamilugu ya'ma folose supofihi legegeto to mono ka faga hiti lilata nehana bona'nimagihi folagaha'anigu mino baga ito bula ola nohunamo ni'ibe. 27 Hitupa foya lito nugufa nagabu'i gigo humofa'na huto nubu'i ko bati mehuse humofa'na huto kau'namu filito yafi nagami kumu nebesigo yasi'mu filito mino'ohunamo ni'ibe. Gukete'mu to nebelusa'mu sa sa huto mino'ohunamo ni'ibe. 28 To yanamofiko mone meni'ibe. Kana'amu kana'amu komopa'nigu nagabu gigo nogo noto hepatoga buto Sipi Bomofihi bona'magihi asaga'i kaba hu epololata foya'mu kehelugo keta nebesigo minolata nohube. 29 Luga'amagi Hu'mamofihi kagu amuya memalago nani keke'i lu epoloto nohube. To luga'amagi enali Hu'mamofihi kagu ho kete limi'ahanamagihi komopa'anigu keta nohigo kehelito nominobe.

30 To nani nasana mono kumu nugufa le'mo hofa talube luto noluto'nimo amuya memolo'ohuna yana'mugopa le'mo napa huto linogo'ni bati hilube'mu hibe. 31 Sipi Bo Yesuhi afo'afu Hu'ma ai'a ya'ma nani kumu bati huto nokehelibe lama'naka luto'nimofihi keheli'ehibe. Ai gi'a li saga huto fokehi luba luba hulata hiluna'mu yabe. 32 Nani Tamasiko hepatoga nohugo gihiti bo Aletasi gamaniuba naga nonugu nele'mo malalube'mu nohuto lito nohi hepato gegisa'amofihi kasinugu kofohi mele'ahana. 33 Ya nehago nigibo nalalu'nigi enali sipi sepekele'nagu li gu ilete bihu gegisa hokolo hu'ehinaguti fitu fe he'migo leke ho limito fegutoga folo'ohuna yabe.

Copyright information for `BEF