2 Corinthians 12

Polu komopa'amofihi bamu'i ego'ehina ka'a

Nugufa le'mo hofa taluta ka'a kosaba'i yamofi mone le'mo bati mehilinaya fa'mene yamofihi lilube. Komopa'ni li gelehe higo ana'ina bamu'i bu go'ohuta to Sipi Bouba lu belegepa ito lu'ehina yamofihi yata'isi beto huto lenelepilugi kehelilo. Nani Kilisitohi bona'a mone'i keheli'ohube. Nani ya'ma nasana mone bu go'ohuna kana'a kufu 14 nobigo bo mone ai'a ya'ma Sipi Bouba fa'mene le'moto tito kokuluma ifo muya gupisalo ni'inagu ya'ma ti'ehina. Nani gufa'a hiti ni'ifi to gufa'a gololo tilago ni'ifi luto ya'ma keheli bati mehube. Hu'mau ai'a ya'ma keheli'ehibe. To ana bo ai Sipi Bouba fa'mene le'moto tito ya'ma Palatisi gi nohota foyagu tito ka'a lu bagaguti meluse to metoga bona'magita lu huto mehilabe luto ya'ma keheli'ehina. Nani ana bo ya'ma keheli'ohube. To gufa'a hiti ni'igo ti'ehifi to gololo tiloto kokulumagu ti'ehifi yamofihi nani mekeheli'ohube. Hu'mau aigo keheli'ehibe. Ana bomofi kumu luto gi'a le'mo hofa toto lilube luto ya'ma nani'ni hapa'ni le'mo hetofa huto melilube'mu hube. Nani'nimu lilube luto yamofihi lapa mebi'ohuna yamofi kumu ya'ma lu hetofa huto liluna'mu yabe. Nugufa le'mo hofa taluna ka'a lilube luto lutita lama'naka luto lutitamo ni'inaya negi nagi bo meminotita'mu yabe. Ya hu'ehinaya, nani kumu kehelinogo ti lalibe luto yamofihi mone melilube'mu lube. Ana'ina'mu lugo to lolo huto moloto nohugo lenalitini bu gete akehelilata nehana ana legegeto huto minalina'mu yabe.

Sipi Bomofitogati ana'ina kosaba'i bu goto moloto hu'ohunamofitoga komopa'ni ti lalibe luto nugufa meme'agu ema ufeha'a hiti nasana monetu fi'ehinamofihi Satahi kele kele pana'a moneuba ai komopa'nitu kehelinogo ti lalibe luto nayaha'ni nalapihe luto lu'ehinamo ni'ibe. Ya hinogo he'mi neto lalibe luto Sipi Bomofitoga kana loebe monebe yupahi loka ho'ohunamo ni'ibe. Buka tugo ka'a ma luto lu nimi'ehina: Nani felisa'niuba kai amuya memalalata'mu yamofihi babu luto kimito kele'mo bati hulata nohibe. Nani kehe'mose nani'niuba kaitoga i bilito buto ni'inogo ana'ina mone kumu buka tilata'a meni'ibe luto lu nimi'ehina. Ya hu'ehina'mu Kilisitohi amuya'auba nani'i nele'mo amuya malalibe luto lapa mebi'ohuna yana'muko le'mo hofa toto noluto'ni negelo'ni bilata nohunagihe. 10 To Kilisito kumu yabe luto amuya memalaluna ni'ifihe? To nele'mobe hokobe hi netalana ni'ifihe? Keke'i luse'namofihi gupisalo minaluna ni'ifihe? To bauna fise'na to kalana'i melese'namofihi gupisalo minalunamo ni'ifihe? O'yo. Fa'mene yana'mu komopa'nigu keheli sibina mehu'ohube. Nani lapa mebi'ohunalo ya'ma ai'a amuya'a nimilago amuya mololata nohunagihe.

Polu Koliti bona'i keke'i lu epolo'ehina

11 Ya'ma nani kumu lulata nohuna ka negi nagi ka lu'ohunamofihi lenali kehelite melete hi'ahana yanauba nele'mo topa nohago nolube. Lenalitini nele'mo hofa tenogo bati hilinagi. Nani fayahi afo'afita fa'mene bo nohunaya enali enegekesa sipi bo nohune lite keheli'ahana lenalitoga bite nehana'amagi nebe meligi'ahana yabe. 12 Nani lenalitoga foya bati huto lugo topa hose suhi to ana'ina kosaba'i bu go bati huse nasana kosele'i meho'ehina'a hiti huto hulata nohina yanauba aposolo bomofihi hapa'ni li huto hulata hu'ehina. 13 To lenali henana'mufi sa sa hilete Hu'mamofihi naga'amagihi li gehesa luga'a lenali babeyafalo meni'ibe. Nani lenalitoga moneko nasana huto mehu'ohunana ni'ibe. Nose'natini to ana'inatini lenebesilito kalana'i memolo lepolo'ohunamo ni'ibe. Ya huloto lenele'mo sibina luse'na yamofihi lenali keheli sibina hite hi'ehilanamo yana'mu foipana'ni he'milo luto lenoloka halufihe, ya?

14 Nani lenalitoga loe yupahi bu'ohunamo ni'ibe. To yatai ya'ma aku'i bilube luto le'mo bati nohube. Binogo'ni kohe toto buto nugufamofihi nose'na'a hiti fe'noha'a hiti efaha'a hiti mone lenoloka mehaluna'mu yabe. Lenali yogo fe'nohatini'mu ni'igopa lenali kumu yabe luto amuya mololata nohube. Yagapana'i kitili'amagi ito'anigi afo'anigi enele'mo nupa hilana'a mehabe. Enali ito'anigi afo'anigi lelite tite nose'na enabagagu bilana'amuko keheli bati hite minelata nehabe. Nani afotinifihi suhi huto nohuto ya'ma lu nolepube. 15 Ya suhi huto nani lenali kumu yabe luto yogo fe'noha'ni minoto lito hulata nasana'ni li he'milube luto keta mehuse huto nohube. To nani ya huto komopa'ni lenelepilata nohunogo lenali komopatinitu nani kumu lenemehi melelata nehanamofihi inomo limito minalifihe?

16 Bona'i luga'amagi nani kumu ya'ma lite lilata nehabe: Ai'a nasana'a li be sililata'a mone menilinaya ai suguna'i huto bona'magihi fi taga hu letoloto limi'i mololoto ana'inatini be sili'ehilina ni'ifihe lilata nehabe. 17 To nani hiya huto ya hu'ohuna ni'ibe? Lu nimilo. Nani yagapana naga'ni lenalitoga enoho lufugo bite ana'ina mone bite li'ahafihe? O'e. 18 Taitasi ya'ma bilifihe luto lu eto'ohuna to lalalutifu mone ho lufugo moneka bi'aha'igo yamofihi Taitasiu buto lenalitogati ana'ina mone lenebesili'ehifihe? O'e, le'ali komopati'a li hepiloto kapo monekolugu ito moneka nobu'ibe.

19 Kaga oto lulata nohuna yamofihi lenali keheligo ka'ni ya'ma lenele'mo hetofa huse kaga noluna lolo nohifihe? Ya suhi meni'ibe. Nani Kilisito hiti nohuto'ni Hu'mamofihi bulo kaga lulata nohube. To nigibo nalalu'nigita, lamana'a nani kumu yabe luto melube. Mono kagu lenele'mo hetofa hilube luto lulata nohube. 20 Nani lenalitoga buto bu lenagaluna lenali kumu kehelinogo bati mehilifihe luto, to lenali nani kumu ana hite kehelinogo bati mehilifihe luto nokehelugo keta nonebesibe. To lenalitoga kenasabo bise'na to siko huse'na, to ibe fitobe nasana, to molomo titi hilata'na, to libe pigi bibe nasana, huli tali ka mege ka lulata, bona'i enugufa lelite tite, li sibi sibi hilata nasana yamofihi ni'inogo buto nehetito bu go lalube luto nokehelugo keta nonebesibe. 21 Lenalitogati luga'amagi ema afeha'aga komopatini kolo tago, moko lise'na to mokolo'namu enegekesa yigi yigi hi'ahana'a ya suhi ma suhi huto komopatini li gelehe mehise ya suhi hite nehinogo lenalitoga buto nehetiluna yamofihi lenogobisalo Hu'ma'niuba nele'mo laba hilenogo lenali foipanatini'mu nipa'nigu ekesa ho lalibe luto nokehelito keta nonebesigo ya hulata nohube.

Copyright information for `BEF