2 Corinthians 13

Lipoti molo epoloto koyo epi'ehina

Ya'ma lenalitoga aku'i binogo kana'a loebe monebe hilina'mu yabe. Mono bukugu kaga ma luto ni'ina:Ka foya lilana kanagu bo moneuba foipana hulenogo bo loebefi loebe monebefi bu gelete lu huto hilenogo lama'naka litemo ni'ibe.Lenalitoga bu nehetilenogo ana kaga'a keheliloto ka'a lilube'mu hube. Afeha'aga ema foipanatini hiti mine'ahana'a to luga'a lenali hiti lalitoga alihi kana buna yupahi lipoti lepito lu'ohunamo ananamofihi nugufa'a foto'i nohuto aku'i ya'ma nolube. Alihi aku'i buto lenubuto mebiluna'mu yabe. Kilisitou ya'ma kaga lu nimigo lulata nohunamofihi hapa'amu lenali sa sa nehana ya'ma bu go fe lilabe luto Kilisitou ai'a lenalitoga foya lilata nohina yamofihi agoya'a hiti meni'igo folagahatinigu amuya'a hiti lilata nohibe. Koyapa'i lama'naka luto ai legeso huto nohigo malipu yafalo he'ahanamo ni'ibe. Yatai ya'ma afo'afihi Hu'mamofihi amuya'a lito ho tito minomo buto nohibe. Lali ana huto ai hu'ehina suhi huto legeso huto nohutaya aitoga i hepiloto Hu'mamofihi amuyalo buto lifita ito minolata nohuta yamofihi hapa'a lenalitoga li huto hu lepiluna'mu yabe.

Lenali ya'ma lama'na ka mono kagu nehafi menehafi komopatinimofihi fi taga hi etete bu geletetini yamofihi hapa'a lu huto hilo. To Yesu Kilisitohi ya'ma komopatinigu le'mo malago nominanamofihi hapa'a akeheli'ahafi ya? To komopatinigu menominogomo lenali ka'a keheli fetaga hi'ahafi, kehelilo. To nani ya'ma ka'a keheli fetaga hu'ohuna'a meni'ibe. Ya suhi hite bu nagalabe luto fifa ilata nohube. Hu'mau keheli'ehinogo foipanatini li huto mehilabe luto nani Hu'mamofitoga loka hoto nominobe. Lenali bu negenogo mono bo lamana'a lolo huto minalube luto meni'ibe. Lenali Hu'mamofihi ka keheliya ilana yanauba huto hu lamana hilibe luto lulata nohube. To nani fa'mene bo mono kalugu minaluta'a ya bati hibe. To nugufauba mono bo nohuna lolo hilinamofihi fa'menena ni'ibe. Lali ya'ma'amagita hena hena huto ka lamana'amofihi luba li emilune? Fa'mene fi hetofa hu etalune luto amuya moloto legeya'a huto hilina'mu nominone. Lali bona'magihi enubulo amuyati'mu sa sa nohutogo lenali mono kagu amuyatini hiti minalana ya'ma lipagu lagati lebesilina'mu yabe bati hilune'mu hune. Ya nehinogo komopatinigu fi fana talibe luto Hu'mamofitoga kaga luto nohune. 10 Nani lenalitoga buto keke'i luse'na lepi lalube luto fato'i nohuto lipoti kaga lu huto huto fayahi ya'ma koyoto nolepube. Sipi Bouba amuya nimi'ehina nasanaloti lenali'i lenefelu haluna'a meni'ibe. Lenali lenufusatini le'mo amuya malalibe luto lu nimi'ehinamo ni'ibe.

11 To nalalu'nimagita, kaga lu su hoto ma luto lilube. Lenali lenipagu keheli bati hite minalo. To lipoti lu lepito kaga ya'ma noluna kehelite komopatini le'mo hetofa hite le'mo lamana hilanagihe. Ya nehite lenalitini komopatini le'mo moneko hilete fulunagu minalo. Ya hilenogo Hu'mamofihi mehi lepise'na to fulunamofihi afo'afu lenalitoga minalina'mu yabe. 12 Lenali ai be tinogo ai be tinogo hite minete, ai soso hu etenogo ai soso hu etenogo hite koguna ite minalo. To Hu'mamofihi bona'i malo nehana asaga'magi keketini li lepelelata nehabe.

13 Sipi Bo Yesu Kilisito lehe'mose'na yauba to Hu'mau mehi limilata nohina yanauba Hu'mamofihi Sikalafu'uba lenele'mo hepilata nohina'a yanauba lenalitoga mino lito buto mineno.

Copyright information for `BEF