2 Corinthians 3

Lu mu tifise'namofihi ka'a kosaba'namofihi foya'a lilata nohune

Lali ligiti li ho tilune luto ka'a yamofihi aku'i hapi fi'ohutamo ya'ma ni'ifihe? To bona'i luga'amagi enigi'ani li ho tilata nehana suhi huto lenalitoga fayahi melenogo bilibe luto lali hapatimofihi fayahi mone koyoto lenelepilupihe? To lenali ligiti li ho tite fayahi keyenogo lito buto fato bonatoga epilupihe? Ya suhi huto meni'ibe. Nani foya'nimofihi fayaha'a lenali ya'ma nehabe. To fayahi koyolata nasana ya'ma komopatigu fayahi koyolago bona'i asagatoga bu gelete leka sete kehelilatana ya'ma ni'ibe. Lali lenalitoga foya lilago lenali Kilisitohi fayahi koyolatana'a lolo hilago ya suhi huto hapa'a huto huto ni'ibe. To fayahi koyolata nasana ya'ma nagamitu mekoyo'ehibe. Amuya moloto minoba minoba bo Hu'mamofihi Sikalafu'uba fayahi koyo'ehina ya'ma fa'mene lapelegusa efato meni'ibe. Komopatiniguya fayahi koyo malago ni'ibe.

Lali ligiti li ho tilune luto meni'ibe. Lali Kilisito kumu yabe luto Hu'mamofihi amuya'alo minoto ai gi'a li ho tiluta ni'ina'mu nani ya'ma nokoyobe. Foyatimofihi legeya'a mone lalitigati huto hulata nohibe luto ya hu tegi ka luto keheliloto kehelise'nati amuya moloto mone meminabe. Ana'ina lolo hutogo bati hulata nohina ya'ma Hu'mamofitogati yamofihi ni'ibe. Hu'mau ai'a ya'ma lele'mo bati higo lu mu tifise'namofihi ka'a kosaba'namofihi foya'a ya'ma lilata nohune. Lu laga hi'ahana ka fayahi keye'ahana ya'ma keheliya ise'namofihi foya ni'igopa Sikalafu'i li emilata foya'a ni'ibe. Lu laga hi'ahana ka fayahi keye'ahana yauba lemehati filise'na li huto hu limilata nohibe. To Sikalafu'uba minoba minoba huto lemehiti minolata nasana ya'ma li huto hu limilata nohibe.

To Moseu keya ka lu'ehina ka tafa komopati sibina husemofihi li huto huse nasana ya'ma lapelegusa efato fayahi koyo'ehina ya nasanauba ni'igopa Hu'mamofihi fana meha'a huto hu'ehinabe. To ana keya ka lu'ehina kamofihi fana meha'a ya'ma minoto su meho'ehina Mosehi gobisalo fana mehi yanauba sipi ni'igo Isilaeli bona'magi enali analo henetite bu okaba'a silifi'auba enubu hago okaba'a bu go bati mehi'ahanamo ni'ibe. Mono ka tafa'amofihi fana meha'a ya suhi huto mino'ehinamo ni'inaya Sikalafu'uba mono ka kosaba'i yatai li huto hu limilata nohina yamofihi fana meha'a le'mo inomo tinogo sipi'a minalibe. Komopati li sibina hulatamofihi lolo huse'na yamofihi lu mu tifise'namofihi ka fana meha'a ya'ma imo limito ni'ibe. To foipana meni'igo minolatana mone'a yamofihi foya'a fana meha'a ya'ma mone'a tito ni'ibe. 10 To tafa'a lu mu tifise kamofihi fana meha'a ya'ma fenene hu'ehibe. To lu mu tifise kaga kosaba'namofihi fana meha'auba napa'a huto be ligito minoba minoba hilana'mu yabe. 11 Ana'ina minomo buto su halinamofihi fana meha'a ya'ma napa huka huto hu'ehinamo ni'ilinaya ana'ina mino lito buto mino foto'i molose'na yamofihi fana meha'a minomo tito sipi'a mino'ehina.

12 Lifita ilata nohuta nasana ya suhi huto ni'inaya mono ka keta mehuse huto lu aku toto lu yege hoto epilata nohune. 13 Ya nohuto Mosehi suhi huto menohune. Ai Isilaeli bona'magi ya'ma fana meha'a besa besa loto mino'ehina yamofihi su halube'mu nohigo ete bu ge lalabe luto golaga bagalo gu'motu ifi to etago minolata hu'ehina. To lali Hu'mamofihi kosaba ka molo'ehinamofihi fana talina'amu fala mekiluta nohune. 14 To enali komopa'ani fi hekini lago mineme bite nehago Hu'ma lu mu tifise'namofihi kaga tafa'a yauba aku'i ifi tago enali kaga leka sete keheli bati mehi'ahanamo ni'ibe. To ifi tete sa gi'ahana ya'ma fa'mene mone gulu mefalina'mu yabe. Kilisito moneko'uba gulu foto li he'milata bo nohinagihe. 15 Isilaeli bona'i enali yatai kana ya'ma Mosehi fayapofihi ka'a leka selata nehite kehelise'na'ani ifi tago menekehelibe. 16 To komopa'ani li gelehe hite Sipi Bomofitoga minenogo ai ifi tete sa gi'ahana ya'ma gulu fo epalalina'mu yabe. 17 To Sipi Bo yabe luto noluna ya'ma Sikalafu'mofi kumu nolube. To Sipi Bomofihi Sikalafu'uba minolata nohinaga ana'ina moneuba naga'i letalina'a meni'ibe. 18 Lali ya'ma logobisati aitoga ifi toto sa megi'ehinogo Sipi Bomofihi fana meha'a gapo gapo'i legitanagu bu galata suhi huto Sipi Bomofihi fana meha'a bu goto nohutogo ai fana meha'auba fi fana to letoto lele'mo gelehe higo Sipi Bomofihi suhi lolo huto nohuta yabe. Ya'ma Sipi Bomofihi Meha'a ai ya hu letalata nohibe.

Copyright information for `BEF