2 Corinthians 7

Nemehi lepi'ohuna nalalu'nigitabe. Hu'mau ya'ma ka lali kumu lu molo'ehina yabe. Ya'mu lali komopati to lugufati le'mo sibina hulata nasana asaga'i li he'milototi komopati gulu gulu linogo Hu'mamofitoga koli'a hiti minalune.

Polu komopa'ni li gelehe hana'mu gelo bi'ehina

Lenali komopatini lalitoga malalo. Lali lenalitoga li sibina mehu lepolo'ohune. To bo mone'i le'mo sibina mehu etone. To lenipagu fito ana'inatini mone li sibina mehu'ohune. Nani ka ya'ma lenifisa ilube luto lu melepolo'ohube. Nani koyapa'i lu lepi'ohuna ka mone aku'i yatai lu lepilube. Lali lenali hiti moneka minoto lito fililuta ni'ifi fa'mene minaluta ni'ifi ana suhi huto mino lito buto minalune. Komopa'ni lenalitoga mino'ehinamo minalube'mu hibe luto alu lepi'ohunamo ni'ibe. Lenali Hu'mamofitoga ule'ale hite neminana komopa'nitu keheli'ohuto lenofokehi nolube. Lenali komopa'ni le'mo fulu nehago keke'i luse'namofihi gupisalo nominoto'ni bati huto minoto negelo'ni sipi nobube.

Masetonia kapogu oto neheti'ohuta mone'a labasu mebune. Ya nohigo kalana'i melete lugufamofihi luba'a hilata to komopatimofihi lelesa luse'na yanauba luga luga huto huloto lele'mo loe lae huto mino'ohutamo ni'ibe. Ya huto nohutogo megusa yagapana'magihi komopa'ani le'mo bati hulata bo Hu'mau ai ya'ma Taitasi le'mo gelehe hilago oto le'mo amuya molo leto'ehina. Ya huloto i gelehe huto o'ehinauba ya'ma anasi lele'mo bati hu'ehinamo meni'ibe. Lenali aimo le'mo bati hi'ahana ka'a ya'ma lelito ago kehelilototi komopati ketipa igo nohune. To nani'i bu nagalune lite kehelite minelata hi'ahana to foipa nasana huto hu'ehina'mu leniginaga figo mineme bite neminana to nani kumu yabe lite fi hetofa hi netete amuya melelata nehana'a ya'ma ka'ni lu nimilago yata'isi komopa'nigu keheli bati huto kehelugo tigo nohube.

Nani koyapa'i fayahi mone koyo lepito leka sete kehelite komopatini keta hu'ehina yana'mu yatai komopa'nigu kehelugo keta mehibe. Fayahi luto koyo'ohuna kanamofihi ya'ma kana'a hupamone'isi komopatinigu keheli sibina nehago keheliloto'ni lama'naka komopa'ni keheli sibina hu'ohunamo ni'ibe. To yatai ya'ma komopa'ni bati nohigo nolube. Komopatini sibina hu'ehina ya'ma yamofi kumu lenipagu keta hulatanamofihi komopatini i gelehe hana'mu luto nipagu lama'naka keheli bati nohube. Lenali leniginaga fi'ehina ya'ma Hu'mau keheligo lamana nasana lolo hulago keheli'ehinamo ni'ibe. Ya higo nani kaga'ni lenele'mo sibina mehu'ehibe. 10 Hu'mamofihi kamu'i liginaga filata nohinanamofihi le'mo gelehe hulata nasana li huto hinogo Hu'mau lubuto binogo minalune. Yamofihi liginaga fise nasana yamofiha'a li huto hilina aliha'a ya nasana'mu kehelinogo mone sibina mehilube'mu hibe. To mono'i mekehelise bona'i ginaga fise'na yauba negi nagi nasana li huto nohigo filite bilata nehabe. 11 Bu galo. Ginaga fise'na ya'ma lapa mebi'ehibe. Yamofihi lenalitoga legeya'a nesi'a huto mehu'ehibe. Legeya'a sipi'a ahuto hu'ehibe. Hu'mamofihi kagalugu lenele'mo babahi huse'na to hapatini bati huto le'mo huto huse'na to foipa nasana fitu fose he'milata huse'na sipi'a to Hu'mamofihi ita bise'na lenelesa luse'na to nani kumu keheliya ite amuya molose'na, to foipanamofihi mone kegi'a epilata'na ya'ma nasana ya hina'a li huto hu'ehina ya'ma lenalitoga nona'a huto hulago lenali foipana memino'ehinamofihi hapa'a huto nohibe.

12 Ya hu'ehina'mu koyapa'i fayaha nasana ma luto koyo lepi'ohuna yamofihi foipana'a lilata bomofihi ai kumu luto meni'ibe. To foipa nasana lolo huto molo eto'ehina bomofihi ai kumu hiti luto meni'ibe. Kaga'a lu lepugo Hu'mamofihi bulo lenali lalitoga malalanamofihi hapa'a huto hilibe luto yamofi kumu koyoto lepi'ohunamo ni'ibe. 13 To lenali ana hilete komopati le'mo kefa i'ahanamo ni'ibe.

To komopatigo le'mo hetofa hi'ahana yamofi kumu luto meni'ibe. Lenali Taitasihi komopa'a le'mo fulu hago ai komopa'agu gelo bito nohigo anamofihi ka'a ya'ma kehelito laga'a nominone.
14 Nani koyapa'i lenele'mo hofa toto lenali kumu nofokeha kaga'ni ya'ma Taitasihi lu emi'ohunamo ni'ibe. To lenali kumu ka lu emi'ohuna yamofihi legeya'a ya'ma huto hu su ho'ehinamo ni'ibe. Nani ka'ni ya'ma faga hiti mone lu melepi'ohunamo ni'ibe. Ana huto lenigitini le'mo ho tito Taitasihi lu emi'ohunamofihi ya'ma legeya'a alolo hu'ehinamo ni'ibe. 15 Taitasiu ai lenalitoga bulago koli'a hiti keheli emite to keke'i li etete lenipagu melete be tigilete he'me'ahana to ka'a keheli emi'ahana yana'mu kehelito meha'a lenalitoga molo'ehina ya'ma napa ho lito bulata nohibe. 16 Nani lenali kumu keheluna ana'inatini fotogo hutogo ni'igo nugufa'ni sibina mehinogo bati huto minalube'mu hube. Ya'ma komopa'nigu bati nohigo nokehelito lu nolepube.

Copyright information for `BEF