2 Thessalonians 3

Lali kumu amuya melete Hu'mamofitoga nunumu lilo

Lalalutigita, ka mone lu su hoto lu lepilugi kehelilo. Sipi Bomofihi ka'a mele'isi pulu tito bilibe luto to ana kaga'amofihi lenalitoga huto hu'ehinamofihi ana suko huto huto ho lito bilibe luto ya'ma lali kumu lite Hu'mamofitoga loka heno. To komopa'ani laga mehina bona'i foipana'ani hiti bona'magi enayanuguti lele'mo he'milibe lite Hu'mamofitoga nunumu hilo. Yanana'mu enali bona'i luga'amagi hetofa kaga'a kehelite mage'i memele'ahana ni'ibe.

Sipi Bouba ekesa loe lae menohinaya ai mino kaba huse nohinagi lenele'mo amuya hu'ehinogo ya'ma foipa bouba lenele'mo sibina hu lalibe luto lenali'i kaba huto haka molo lepalalibe. Lenali lu noleputa kaga kehelite nemina suhi lite minoba minoba hilana legekesa ya'ma kehelito loegu menokehelune. Sipi Bouba lenali kumu yabe luto komopatigu lele'mo fulu nohinagihe.

Sipi Bouba komopatini le'mo babahi hinogo Hu'mamofitoga lenemehi emilata minalabe, luto nolune. To Kilisitou lenele'mo amuya hinogo kosele'i mehose ule'ale hite minalabe, luto lali nolune.

Foya lite minalanamofihi ka'a

Lalalutigita, Sipi Boti Yesu Kilisitou kaga'agu ya'ma lili'na ka'a lu nolepune. Kilisitohi bona'i luga'a lali ka lu lepi'ohutana he'mite neminete to lili'na melise fuli neminete nehanogo, enali hiti humofa'na hite meminalo. Laliya lenalitoga buta yupahi ya'ma kapo bili lepoloto foya'a lilata hu'ohutamo ya'ma akeheli'ahabe. Lenali ana suhi hite lemege'i malalo. Lali lenalitoga ya'ma fa'mene menominotamo ni'ibe. Lenalitogati nose'na mina'a meni'ina fa'mene noto noto mebu'ohutamo ni'ibe. Naga ito li sipi tuloto mino'ohugo kosele lenoho lalibe luto kana'amu kana'amu utehi etehi liginaga fise foya nolito keke'i lu'ohuta. To lenalitogati nose'na bati huto lutita'mu yabe luto ni'inaya hapa'a lenelepito lali ligiyakagugo ite foya ma huto lilata hu'ohutamo ni'ibe. 10 Lenalitoga nohuto ya'ma luto lu lepilata hu'ohuta ni'ibe. Mone foya melise kegeiyo hilina bouba nose'na mo sito minalina ni'ibe.

11 To ya'ma lenalitogati ka mone olago ya'ma luto keheli'ohune. Lenali folagahatinigu bona'i luga'amagi enali'ani foya'ani he'milete amanapa hilete nehite bona'i mone'amagihi foyagu ukimi akimi hite humofa'na nehanamo ni'ibe. 12 Bona'i ya hana'amagihi enali'i Sipi Bo Yesu Kilisitohi kagagu enegekesa lito ma luto lipoti nolu epolone. Enali laga hina hite eto eto hite minenogo foya'ani linogo legeya'a huto hinogo enali'anigati nalabe.

13 Lalalutigita, lenali ana'ina lamana'amu foya'a lilatana ya'ma kosele'i meleneheno. 14 Ya'ma fayahanagu ka'a koyoto noleputa ya'ma moneuba pelesa ito he'minogo ai hapa'amu kehelite yamofihi he'mi etenogo ai'ago minoto buya'amu filino. 15 Yamofihi fatehatini yabe luto melune. Lalalutifu yabe luto ekesa lite lipoti lu emite le'mo bebe salabe luto nolune.

Su nohanamofihi ka'a

16 Sipi Boti ai'a fuluna afo'afu ya'ma asaga yupahi fato fato suhi luto fuluna'a li huto hu lepeleno. Sipi Bouba lenali asagatoga minomo buto mineno.

17 Nani Poluita nayaha'nitu fayahi ma nokoyobe. Nehafihe? Nani'ni nigi'ni yabe luto ya'ma koyo'ohube. Nani silaga kana'a nani'ni su halina fayahi ya huto huto koyolata nohube. Nani hapa'ni ya ni'ibe.

18 Sipi Boti Yesu Kilisitohi ai lenehe'mose'na'a lenali asagatoga mino moloto mineno.

Copyright information for `BEF