2 Timothy 1

Poluita, nani Yesu Kilisitotoga buto i hepito amuya moloto lenemehi emite minalabe luto lu limi'ehina ya'ma kagamo lu huto hilube luto Hu'mamofihi kaga'agu ya'ma Yesu Kilisitohi koko pana'a nele'mo'ehinogo aposolo bo lolo huto nohunamofita.

Timotio, nemehi nokumuna pana'nimaka, nani ma fayahi koyoto nokumube. Afotifu Hu'mau to Sipi Boti Yesu Kilisito ai lehe'mose'na to ginaga fi limise'na to fuluna'a hiti li huto hu keteno.

Hu'mamofitoga fokehi hoto le'mo hetofa hu eto'ehina ka

Nigiko nagako bona'magi komopa'ani bati hu'ehigo i emi a emi hite Hu'mamofihi mege'i melete mine'ahana. To nani enali yagapana'ani nohuna bo ana suko huto Hu'mamofihi kele kele'i hu noetoto komopa'ni keta mehuse nohuna ya'ma kana'amu utehi etehi kai kumu kehelito minoto Hu'mamofitoga lulata nohube. Kaitoga bilube'mu nohugo nani kumu yibi hafili hu'ahata ya'ma keheli'ohuto buto bu kegenogo'ni komopa'nigu negelo bilube luto kehelilata nohube. Kilisitotoga keheli amuya mololatanamofihi legeya'a ya'ma kaitoga kehelito nominobe. To kakalikafugo Loisi to itokafugo Yunisi etali kohe tete keheli ule'ale neha'igo kai ana huto keheli ule'ale nohane luto nani hiti keheliya i'ohube. Anana'mu keheliloto'ni lu'ohuna ka'a ya'ma aku'i kehelilane Nani koyapa'i nayahi latahakalo molo'ohugo lusa negi ketago Hu'mamofihi mono ka'amofihi amuya fi hele hu keto'ehinamofihi ya'ma kaba hu bati huto amuya moloto minomo tito minetogo logo libi suhi huto lolo hino. Ya nohitogo yanamofi kumu ma luto kehelibo. Hu'mau Sikalafu'a lalitoga ho lifi limi'ehina ai lelesati lulata nohina nasana meni'ibe Sikalafu'uba komopatigu limito ai'a amuya'a hiti to ginaga fise'na'a hiti limilata nohinagi to legekesa hokolo hu letalinamofihi limilata nohibe.

Ya'mu'i Sipi Botimofihi ka lamana'a lu huto hilata'mu kubuya mehino. Ya huto ai kumu yabe luto naga nonugu nohugi yamofihi nani kumu kubuya mehino. Hu'mau ai amuyana'a kimilenogo ka lamana'amu yabe kalana'i mele ketenogo kai hiti ananamofihi gupisa'alo fa'mene minobo. Hu'mau ai'a bona'a lolo huto mino eto huto minalune luto lubuto biloto elesa molo limi'ehina. Ya higo minoto lito hu'ohuta ya'ma lamana foyafi lamana hapatifi ni'igo yana'mu lubuto bi'ehinamo ni'ifihe? O'e, ya huto meni'ibe. Ai'a komopa'atu kehelito lehe'mose'na'atu fi hetofa hu leto'ehina. Ai koyapa'i me'i le'mo huto mehu'ohuto'a Yesu Kilisitohi naga'i lolo hilabe luto lu limi'ehinamo ni'ibe. 10 Legeya'a halinagu yamofihi ya'ma kana'alo lubuto bilatanamofihi afo'afu Yesu Kilisito limilago ana nasana ho filito amuya moloto mino kosaba huse nasana mefilise'na yamofihi ka lamana'atu yatai li huto hu leto'ehina.

11 Nani yanamofi kumu ya'ma ka lamana'a lu huto huto bo lolo hilane luto, Hu'mau ana foya'mu aposolo bo to ka lu enelepise bo nele'mo ho ti'ehinamo ni'ibe. 12 To nani keke'i luse'na kehelilatana yamofihi nugupisalo tilata nohina yana'mu nubuya'ni menohibe. Nani nokehelugo amuya molo'ohuna bo ya'ma keheli'ohube. To negekesa loegu mekehelise ya'ma luto keheli fe nolube. Hu'mau amuya afo'afu nohinaya komopa'ni emi'ohuna. Ya'mu kaba hu netoto nobibe. To nani emi'ohunana ya'ma kaba huto buto kana'a molo'ehina huto hilina'mu yabe. 13 To kaga lamanamofihi legeya'a lu kelepi'ohunamo nani babeyafalo lolo hu'ohuna ya'ma analo li pili koto lito minoto Yesu Kilisitotoga buto komopaka molo emita'mu yabe luto keheligo bati hulata nohibe. To keheli ule'ale huse'na to mehi epise'na hiti yamofihi komopa'agu minobo. 14 To hetofa nasana Hu'mau kimi'ehina asaga'i kaba huto lito to ai'a hetofa Sikalafu'i komopatigu nominanauba kele'mo amuya hinogo ya'mana kaba hu bati huto minobo.

15 Esia metoga bona'i Hu'mamofihi naga'i luga'amagi malo e'ahanamagi enali asaga'i nani kumu enekesa mekehelite aku ahe'mi nete su he'ahabe. Figelasigi hiti to Hemogenegi hiti etali ana hite he'mi nete'aha'inamofihi akeheli'ahane. 16 To Sipi Bouba ai Onesifolu ai lalameha'a ginaga fi epino. Hena'mube? Nani ma naga nonugu mino'ohunalo ai lesa meligo kana'amu kana'amu oto nipagu keta hu'ehina li hetofa hu neto'ehinamo ni'ibe. 17 Ya huto Lomu hepatoga nehetiloto nani kumu mele'isi sa sa huto nele'mo huto hu'ehina. 18 To Efeso hepatoga minona kanagu hiti mehi nimito foya lito mino'ehina yamofihi fa'menena meni'ibe. Yamofihi lama'naka keheli'ahane. Ya hu neto'ehina'mu Sipi Bouba kehelinogo ya'ma napa yupahi Sipi Bouba huto hilina kana'agu keke'i luse'na emilibe luto nolube.

Copyright information for `BEF