Acts 1

Oho Tiofilusio. Nani yata'a buku'nigu Yesu yata'a hapi fito li huto hu'ehinana hiti to kaga lu epi'ehina hiti ninamofihi fayahi go'ohube. To lili'na'a hapi fito li'ehinamoloti ti baga iloto, kokulumalugu ti'ehina kana moloto oto pa sobe. Kokulumalugu meti'ehigo Sikalafu'uba Yesuhi he'mago kaga ma luto enele'mo nupa hu'ehina aposolo panana'a lu epi'ehina. Koyapa'i Yesu ai gabu foya li kofito fililoto ai alihi aposolo pana'amagitoga huto hu'ehina. Ai fili'ehinagati ho tiloto kosaba bo nohube luto babuna fato fato'i aposolo pana'a hu enubulo molo'ehina. To 40 yupaha kanagu aposolo pana'amagi Yesu enubulo huto huto huloto Hu'mamofihi Kapo'amofihi kaga'a beto hu epi'ehina yabe. Yesu aposolo pana'a hiti nohuto kaga ma luto lu epi'ehina: Lenali Yelusale hepa'i he'mite mebilo. Lenali'i lepilube luto Afo'nifu kaga koyapa'i molo'ehinana lenalitoga alina'mu geba hite minalo. To nani anana'mu koyapa'i kaga alu lepi'ohuna yabe. Yoniu nagami lafatu'i boana'i nagami'i folo epolo'ehina yabe, Ya hu'ehina lenali yatama kana mebu'ehinogo Sikalafu'uba komopa'anigu tilina'mu yabe.

Yesu kokulumalugu ti'ehina

Mk 16:19-20; Lk 24:50-53

Aposolo naga'magi Yesu hiti bite li nupa hite minelete ma lite loka he'ahana: Sipi Bo, yatai ya'ma kana'alo Isilaeli kapo aku'i li kosaba hilata ni'ifihe? Ya lite loka hago Yesu ma luto lu epi'ehina: Ana suhi huto hilina yupa hiti to kana'a hiti molosemofihi nani Afo'nifugo keheli'ehibe. To ya yupahi huto hilibe lite lenali mekehelilana'mu yabe. Ya hu'ehinaya Sikalafu'uba lenalitoga alina yupahi lenali amuya lilete, Yelusale kegi'afi, to asaga'i Yutia to Samalia kegi'a buto nohe'muna to melugu foto'i nekisa'aga nani kumu'i lu yege halana'mu yabe. Yesu ya luto kaga lu su holago enali be gelete nehago Yesu kokulumalugu notigo sopohi moneuba oto le'mo fenene enubuloti hu'ehina.

10 Ai ya huto notigo aposolo pana'a enali kokulumalugu be goba be goba lite nehago ana'asilo bo loemo koholi gukete li hekolose bole enali nehanalo ho ti'aha'ina. 11 Etali ma hite lu epi'aha'ina: Lenali Galili bose, henabe lite maga ho ti'ehite kokulumamofihi bulu'i nehabe? Ya'ma Yesuhi, yatai Hu'mau lenalitogati le'moto kokulumalugu notina okaba hiti bo ana suhi luto aku'i mone yupahi alina'mu yabe.

Yutasihi hepato nona'a lili'na lilina bo mone le'mo huto hi'ahana

12 Ya la'igo enali ya'mana Oliba kosa he'mite Yelusale i behe hite bi'ahana yabe. Oliba kosa ai Yelusale hepa'i lebatosi mino'ehina yabe. 13 Ya hu'ehigo enali Yelusale'i nehetilete minelata nehana nohi hasagu ti'ahana. Enali enigi'ani, Pitau, Yoniu, Yemesiu yagi to Batolomu, Filipiu yagi to Tomasi, Atulu yagi to Matiu, Alifiasihi pana'a Yemesi, Simoni gimi bo yagi, to Yutasiu Yemesihi pana'a ya hite enali asaga'i mine'ahana. 14 Ya'ma bo asaga'i enali komopa'ani monetoga melete li nupa hite numuna hite minelata hi'ahana. To ana'i luga'a hiti to Maliau Yesuhi ito'afi hiti to gonamu tamu'a enali ana hite moneko ete li nupa hite nunumu hite mine'ahana yabe.

15 Nunumu hite minana kana'a nesi'a babu luto enebe ligilago mone yupahi 120 bona'i li nupa hite minago Pitau ho tiloto ma luto lu epi'ehina: 16 Nogonamu tamu'nimagita lenali kehelilo. Koyapa'i monolugu fayahi mone nina Sikalafu'uba Tebitihi bagalo lu huto hu'ehina yabe. Ai Yutasi kumu lu'ehina, ya'ma bouba ai Yesuhi halana bona'magihi kapo'ani li hokolo hilina'mu yabe. Ya lite fayahi ge'ahana ana suhi ahu'ehibe. 17 Koyapa'i Yutasiu ai lali hiti moneka minototi ai hiti ya'mana lili'na moneka li'ohuta yabe luto Pitau lu epi'ehina yabe.

18 Yutasiu Yesuhi fateha'amagi emina efatu'i me'i nesi'a mone mina fi'ehina yabe. Ai ana melugu buto ho kago ipa'a folaganuguti i hokolo gehesa higo asaga komopa'agu ninana fegutoga limi su hago fili'ehina yabe. 19 Alihi asaga bona'i Yelusale minanamagi ya'mana kaga keheli'ahana yabe. To enali kaga'aniguti ya'mana hepa'i gi'a Akelatama yabe li'ahana. Ya'mana kagaguti gi'a he'ahanamofihi hapa'a golaha me'i yabe luto ni'ibe.

20 Yalo Pitau lu'ehina: Ya'ma fayahi namamo lise bukugu ni'ina, ai ma luto yabe.

  • Ai noha'a yu'nohi mineno.
  • Bona'i mone ana nonugu memineno.

To mone hiti ma luto ni'ina yabe.

  • Bo moneuba ai hepa'i lito
  • nona'a lili'na alino.

21 Ya'mu luto yatai bo mone lali hiluta suhi luto Yesu filito ho ti'ehinamofihi bu goto ya'ma kaga'a lu yege halune, ai ya'mana bo Yesu hiti moneka humofa'na huta kana'a luga lemege'i molomofa'na hu'ehilina boguti le'mo ho tiluta'mu yabe. 22 Koyapa'i Yoniu boana'i nagami'i folo epolomofa'na higo to Yesu lili'na'a hapi filoto limo limo oto Hu'mau lalitogati Yesuhi le'moto ifoga ti'ehina, ya'ma asaga'na nolunamofihi bu go baga i'ehilina bo le'mo ho tilune. To ai ya'mana bouba lali hiti moneka lili'na lito Yesu fili'ehinaguti ho ti'ehibe luto lu yege haluta bo yabe. 23 Pitau ya luto lulago bo loemo etele'mo ho ti'ahana; Yosefe, ai Basabasi, to mone fato gi'a Yasitasi yabe luto nohina hiti to Mataiyasi hiti etele'mo ho ti'ahana yabe. 24 Ya hilete yalo enali nunumu ma lite hi'ahana: Sipi Bo, kai asaga bomagihi komopa'anigu bu go fulu tise bo nohane. To yamu'i, Sipi Botimaka, ma bo loeguti hiya bouba ya'mana hepa'i lito lili'na lilifi kai lelepibo. To Yutasiu kapo'aga bilube'mu nohuto aposolo lili'na he'mi'ehinana'a ana lili'na kosaba bo lilinamo ni'ibe. 26 Ya lite nunumu hilete enali luga'amagi Mataiyasio yabe lite enayahi netigo to luga'amagi Basabasio yabe lite enayahi tina Mataiyasiu be ligi'ehina yabe. Ya higo enali Mataiyasihi nayahi luga luga su hoto nigigusagati mone heleko malago aposolo pana'i minanalo le'mo mele'ahana yabe.

Copyright information for `BEF