Acts 12

Helotiu Yemesihi ho nofilito Pitahi nagalugu le'mo molo'ehina

Ya'mana kana'alo Helotiu gihiti bouba hapi fito Yesutoga komopa'ani emina bona'i enegene mane ito enohoto enagabu gise'na li huto hu epolo'ehina yabe. To ai Yonihi gona'a Yemesihi kosa emitatu i gitigigo fili'ehina yabe. Ya hinanalo Yuta bona'magi be gelete enegelo sipi bigo Helotiu bu goloto Pitahi nagalugu le'mo molo'ehina. Yisiti komopa'agu meni'ina Beleti Nelata nehana kana'agu Helotiu ya'manana li huto hu'ehina yabe. Helotiu Pitahi yato lito naga nonugu le'mo molo'ehina. Ya huloto loegi loegi gimi bomagihi kaba hi etela hi etela hilabe enali enayanugu he'mito'ehina yabe. Pasa nose'na kana'a su holenogo alihi Yuta bona'i enali enubulo le'moto bilube luto Heloti keheli'ehina. Ya higo Pitau nagalugu nohigo gimi bomagi kaba hi'ahana. Ya'mu lite enali Yesuhi komopa'ani emite minana bona'magi Hu'mau he'malibe lite amuya melete nunumu hi ete'ahana yabe.

Agelouba Pitahi nagaluguti le'mo gulu ho'ehina

To Helotiu yago'a yabe luto Pitahi Yuta bona enubulo le'mo ho tilube'mu hu'ehina folugu'i gimi bo loemale'i folagaha'atitigu Pitau ko'ehina. To enali sipi seni nagatu gilo gite yato gite hite he'mi etelete folugu'i kaba gimi gilata nehana bomagi kasito gimi gite mine'ahana yabe. Ya hago ana folugu'i agelo bo moneuba Pitau nohina naga nohi hasagu huto higo fana meha'auba i besalo baga i'ehina. Ya huloto ana agelouba Pitahi gi'na'alo le'mo kule kule huto le'mo ho tiloto lu emi'ehina: Kai mele'isi ho tibo. Ya noligo ana'asilo gi yato gi'ahana seni naga'i gulu hoto melugu limo i'ehina yabe. Ya higo agelouba ma luto lu emi'ehina: Gilimika noito kigigusagu suka bibo. Pitau agelouba lina suhi hu'ehina. Ya nohigo yatama guketeka i besoga bibe huloto nemege'i moloto obo. Ya ligo Pitau ya'mana hasaguti he'mito agelo mege'i lifito bu'ehina ya hu'ehina agelouba ma'naka luto ya'mana nohu netabe luto mekeheli'ehina fa'mene bamu'i bu nogobe luto ekesa keheli'ehina. 10 Etali kapo melete neba'igo yata'a gimi bo luga'a kaba hi'ahananamagihi enebe ligite bite to yalo kaba hi'ahana mone luga'amagihi enebe ligite bite to kasihi sipi kafe gi'ahanalo heneti'aha'ina. Ya hilete ete naga noho gegisalo haka ule'ale hite aeonitu he mele'ahanalo nea'igo ana haka ai'i i hokolo higo tauni kapo giyaka lite bi'aha'ina hepa'i folaganugu kapo melete nebite agelouba Pitahi he'mi etoloto i fenene hu'ehina.

11 Ya higo Pitahi huto hu etananalo ekesa i hokolo hu'ehina. Ya higo ma luto keheli'ehina: Ma'naka luto Sipi Bouba agelo'a ho lifigo oto Helotiu amuya malago to Yuta bona'magi hiti enali nahalune'mu nehanamagi enayanuguti nele'mo gulu fabe.

12 Ai ya luto ekesa keheliloto Yoni Makihi ito'afu Maliahi nonuga bu'ehina. To enali babu bona'i ya'mana nonuga li nupa hite nunumu hite mine'ahana. 13 Pitau ana noto henetiloto nohi kasito begele begele nohigo koko pa'i mone gi'a Lotau kafe sigilube'mu o'ehina. 14 Ai Pitahi nogo'a keheliloto sipi gelo biloto kafe mesigise i behe huto luga'a bona'i nehanaga hololu luto bu'ehina. Ya huloto ma luto lu epi'ehina: Pitau fegutoga ho tiloto nohibe. 15 Ya ligo, kai negi ka nolapihe? li'ahana. Ai: Lusiga luto lama'naka Pitau nohibe luto amuya moloto kaga noligo enali li'ahana: O'e, ai Pitahi meha'a nohilina'mu yabe, li'ahana. 16 Ya lite nehago Pitau fegutoga begele begele nohigo kafe sigite Pitahi be gelete enali topa he baga i'ahana. 17 Ya nehago Pitau sipi kaga melilo luto yatu babeyafa hu'ehina. Ya huloto Sipi Bouba naga nonuguti le'mo fegutoga molo'ehina kaga lu epi'ehina. Lenali ya'ma kaga lite bite Yemesi hiti lalalutigi hiti lu epi baga ilo. Ya luto lu epiloto Pitau fegutoga limito fato hepatoga bu'ehina yabe.

18 Go'i ligo etehi gimi bomagi topa hete Pitau hiyaga bu'ehibe lite ai lu emigo ai lu emigo hilete mekeheli'ahana. 19 Gihiti bo Helotiu: Mele'isi Pitahi sa sa hilo, luto gimi bo enohose ka ligo enali bite sa sa hana bu mege'ahana yabe. Ya hago Helotiu gimi bomagihi ka foya li epoloto lenali'i lenoho fililube luto lu epi'ehina.

Ya luto luloto alihi Helotiu Yutia me'i he'mito Sisalia kegi'a limito hupamone kana anaga mino'ehina yabe.

Helotiu fili'ehina

20 To Taiya hepatoga bona'i hiti Saitoni hepatoga bona'i hiti enali'i Helotiu sipi enipakafa holoto italuga logo bigo nohigo enali bu galune lite li nupa hite monekolugu e'ahana. Enali Balasitosiu kibina bomofihi nokana hepato kaba hulata bomofito yata'a kaga ai hiti lu bati hulototi yabe lite enalitoga le'mo mele'ahana. Ya hilete ya'ma kibina bomofihi hepaluguti nose'na enali hepa'anilo lite bago nelata nehana'mu lite Helotihi ya'mana bona'i aku'i enele'mo fulu hubo lite aitoga yibi hi'ahana yabe.

21 To Helotiu kana mone mololoto ana yupahi enikibina bomagi nehekalana gukete'a hekololoto sipi kefa hisalo mino saga huto nohuto bona'i yatama kaga lu epi epi'ehina. 22 Ya nohigo asaga bona'magi sipi kehe ite li'ahana: Ma kaga nolina ya bona'uba noligope mone'namofihi meha'auba Hu'mau tegi huto nolibe. 23 Ya nelago ana'asilo Sipi Bomofihi agelo'auba Helotiu Hu'mamofihi gi li saga huto fokehi mehana'mu luto ho filigo limito ko'ehina. Ya higo ginihi ipa'aguti henilete gufa'a ne su hago fili'ehina yabe.

24 Ya hulago aku'i Hu'mamofihi ka'a hepato bula ola huto pulu tito hofa to'ehina yabe. 25 To Banabasiugo Soliugo mono foya lili'na Yelusale neli'ina su holago Yoni Makihi le'mete i behe hite e'aha'ina yabe.

Copyright information for `BEF