Acts 13

Banabasinogo Solinogo mono fayalo etoho lifi'ahana

Atioki hepalugu Hu'mamofihi kaga'a mege'i melete neminana boana'magi folagaha'anigu kaga lu yege holata bo luga'a hiti to kaga enelepise bo hiti mine'ahanamagi enigi'ani Banabasi yagi Simioni fato gi'a Nupa Bo yabe lilata hana bo yagi to Lusiu, Sailini hepato bo yagi Manaeni ai Helotihi gamanilo hofa to'ehina bo yagi to Soliu yagi hite mine'ahana yabe. Ya hite, enali komopa'ani Sipi Bomofitoga emite nunumu nama lite nose'na mo site nehago Sikalafu'uba oto ma luto lu epi'ehina: Lenali Banabasinogo Solinogo etele'mo ho tinogo nani lu etoto'ohuna lili'nalo bila'ibe. Ya ligo enali nose'na mo site minete nunumu hi etetelete enayaha babeyafa hite lusana etimilete etoho lifigo bi'aha'ina yabe.

Etali ka lamana'a Saipalasi kegi'a lu yege he'aha'ina

Sikalafu'uba ya huto etoho lifigo bilete etali Selusia hepato heneti'aha'ina. Selusia hepatoti sipi botigu ti'igo ana botiuba etele'moto Saipalasi metoga hege nagamilugu ti'ehinaga bu'ehina yabe. Ya hilete etali Salamisi hepato henetite Yuta bona'magi li nupa hite minete kaga lu keheli fa keheli nehana nonugu tite Hu'mamofihi ka lamana'a lu epi'aha'ina. To etali Yoni Makiu ana lili'na etehe'moto lilibe lite le'mete bi'aha'ina yabe.

Etali asaga kegi'a Saipalasi metoga hege nagamilugu ti'ehinanalo bite Pefosi hepato heneti'aha'ina. Pefosi hepato nalisalo bo moneuba fato fato suhi lumofihi lumofihi li huto hulata nohina bo nohigo bu ge'aha'ina. Ai Yuta bo nohina kaga lu huto huto bo nohube nolibe. Ai ana bomofihi gi'a Bayesu yabe. Ana nagamilugu ti'ehina metoga gamani bo mone mino'ehina gi'a Segiu Polasi ekesagu fe lina bomofihi lalu'afu yabe. To ya'ma gamani bouba Soliugo Banabasiugo Hu'mamofihi kaga'a li'inogo kehelilube luto kehe i etimi'ehina. Ya hina Elimasi nalisalo bo fato fato suhi lumofihi lumofihi li huto nohigo Giliki nogoguti Elimasio lite lu gelehe hi'ahana ya'ma bouba etali'i etele'mo melugu mololata hu'ehina. Ya nohuto ya'ma gamani bomofihi etali ka kehelito komopakagu li memolobo luto Elimasiu ya luloto ekesa bi'ehina yabe. Ya nohigo Soliu mone gi'a Polu aitoga Sikalafu'uba bai tolago ai ana bomofihi bulu'i holoto lu emi'ehina: 10 Kai Satahi pana'a. Bati'na asaga'i ni'inamagihi kai fateha'ani yabe. Asaga faga faga hiti bati mehina suhiti kailugu babu lito bai toto ni'ibe. Kai asaga yupahi Sipi Bomofihi ka mana'a faga fagagu li mololata nohane. 11 Yatai Sipi Bomofihi yaha'auba kaitoga liminogo kubuka pisi linogo fana mehena bu megose luga'a kana minalane. Ya ligo ana'asilo mele'isi Elimasihi bu'alo nupa sopohi teginauba ifi to'ehina. Ya higo ai yato lite kapo lepite bilana bona kumu lika tika huto sa sa hu'ehina yabe. 12 Ya higo gamani bouba anana huto hina bu goloto topa holoto Sipi Bomofihi kaga enelepinamofihi komopa'agu li molo'ehina yabe.

Etali Atioki hepato Pisitia melugu mono foya li'aha'ina

13 Polu yagi to bona'i luga'a ai hiti kapo malanamagi hiti enali Pefosi hepatogati he'mite sipi botigu tilete Pega hepato Pamifilia kegi'a bi'ahana. Ya nehago Yoni Makiu he'mi etoto to Yelusale hepatoga i behe huto bu'ehina yabe. 14 Enali Pega hepa'i he'milete kapo melete Atioki hepato Pisitia kegi'a bi'ahana. Ya hilete fuli yupahi kana'alo Yuta bona'magi mono nonuga tite mine'ahana. 15 Mono noto kanisole bomagi Moseu li'ehina keya ka hiti to kaga lu huto hulata bomagi fayahi ge'ahanana hiti leka selete alihi kaga ma lite Polu hiti lalu'agi hiti lu epi'ahana: Nogonamu tamu'ise, boana'magi komopa'ani li amuya malalana kaga lite e'ehitemo lenali lu hokolo hite lu epilanamo ni'ibe.

16 Polu ho tito yahi tiloto ma luto kaga lu epi'ehina: Isilaeli bona'ni hiti to fegutoga bona'i asaga'i Hu'mamofitoga komopatini emite neminanamagita nani liluna kaga kehelilo. 17 Ma Isilaeli bona'magi Hu'ma'anifu tatatitigi enele'mo ho ti'ehina. Enali Iyipi melugu ka bona'i minete babu bona'i huto hi'ahana. Ya hago alihi Hu'mamofihi lusi amuya'auba ana meluguti enele'mo fegutoga maga e'ahana yabe. 18 Ya huloto ka melugu 40 kufu kanagu Hu'mamofihi keta hu etanana li huto hite mine'ahana yabe. 19 Hu'mau nayahi mone kegi'a su hoto mone kegi'agati loemo heleko malago hepa'i Kena melugu enoho fu loloto ai bona'a ana me'i epigo ana me'mofihi hapa'a lolo hite mine'ahana yabe. 20 To enali 450 kufu ana melugu mine'ahana.

Ya huloto alihi kaga'ani loko hulata bo epiloto nehago ana enemegesalo kaga lu yege holata bo Samueliu huto hu'ehina.
21 To enali kibina bo'ani kaba hu epalalina'mu kehe igo Solihi Kisihi pana'a Beyaminihi nagaluguti 40 kufu kana kaba hu epalalibe luto Hu'mau epi'ehina. 22 Hu'mau Solihi le'mo nohe'mito Tebitihi kibina bo'ani le'mo ho ti'ehina. Ai kumu luto Hu'mau ma luto lu'ehina:Nani Yesihi pana'a Tebitihi le'mo huto hu'ohube. Ya'mana bo nani nibita hina bo nohigo komopa'ni ai'i noemube. Ai asaga ka'nimofihi mege'i moloto agoya hu netalibe. 23 To Hu'mau li huto hilube luto koyapa'i ka molo'ehina suhi li huto huto ya'mana bo Tebitihi nagaluguti bo mone huto hu'ehina Yesu yabe. Ai koyapa'i Hu'mau kaga molo'ehinamo'mu ya'mana bouba asaga Isilaeli bona'i enele'mo enubuto bilina bo nohibe luto epi'ehina. 24 To Yesu huto mehu'ehigo Yoniu yata'a Isilaeli boana'i foipanatini he'milo luto komopatini i gelehe hite mono nagami falalo luto kaga lu yege ho'ehina. 25 Yoniu lili'na'a su halube'mu nohuto ma luto enoloka ho'ehina: Nani kumu kuyu'afu nohibe lite nekehelibe? Lenali geba hite nehana bomo nani menohube. Ya hu'ehina lenali kehelilo. Ai alihi nemege'i noana bomofihi nani gigusagu su'a kisi he'mi etaluna'a huto bati mehuna bo nohube luto Yoniu ya lu'ehina yabe.

26 Abalahahi tata'agita to ma fegutoga bona'i hiti Hu'mamofihi agoya hu emilata nehanamagita nalalu'nigitase. Hu'mamofihi kaga'auba lali'i lele'mo lubuto bilibe lu'ehinana alimi'ehibe. 27 Enali Yelusale bona'magi hiti kaba bona'amagi hiti Yesu ai lele'mo lubuto bilina bo nohibe lite mekehelila to kaga lu yege holata bomagi asaga fuli yupahi leka selata hana kaga hiti keheliya mei'ahana yabe. Enali Yesuhi faga lite fisa inauba kaga lu yege hose bona'mofihi kaga'aniuba pa so'ehina yabe. 28 Enali ana'ina mone Yesu li sibina hu'ehilina'mu ai'i halune lite sa sa hana bu megelete gamani bo Pailatihi fa'mene ho filibo lite kehe i'ahana. 29 To mono kagu ai kumu lu'ehinamofihi enali asaga'na li huto hi etelago Yesuhi bona'magi malipu yafaloti le'mo lago limite muligu he'mi ete'ahana yabe. 30 Ya hana Hu'mau fili'ehinagati aku'i le'mo ho ti'ehina yabe. 31 Enali Yesuhi mege'i melete Galili kegi'ati Yelusale kegi'a bula ola hi'ahanamagi babu yupahi bu ge'ahana yabe. Ya hi'ahanamagi yatai Isilaeli bonatoga ya'ma Yesu kumu lu yege nehabe. 32 Ya'mu luto lali yatai lenalitoga ka lamana'a ma luto lu epilune luto noone. Ya'manana koyapa'i Hu'mau tatatigi epilube lu'ehinana yatai lali panana'animagita alimi'ehibe. Mono nama buku kupa'agu 2 enali keye'ahana Yesuhi le'mo ho tilibe luto mono kagu ma luto ni'ibe:

  • Kai nani pana'ni nohane.
  • Yatai'isi kai afokafita lolo hu'ohube.

34 To Hu'mau fili'ehinagati le'mo ho ti'ehina'mu aku aku'i tuguma'i mebilibe luto ma luto lu'ehina:

  • Koyapasana Tebititoga kaga molo'ohuna'a huto
  • nani hetofa lusa mana'a kimiluna'mu yabe.

35 Ana suhi luto mono nama buku mone hepagu ma luto lu'ehina:

  • Kai panaka mana'a he'mi etetogo
  • tuguma mebilibe.

36 To Tebitiu Hu'mamofihi mege'i moloto lili'na lito boana'magi folagaha'anigu melugu mino'ehinamo akeheli'ohuna. Ya huloto alihi filigo tatatigi kene keli beleha'alo keli ho etago tuguma bi'ehina yabe. 37 Ya hu'ehina Hu'mau le'mo ho ti'ehina bomofihi gufa'a tuguma mebi'ehina yabe. 38 Ya hu'ehinagi nalalu'nigita lenali keheli bati hilo. Lenalitoga kaga ma luto lu yege nohone. Ya'mana bouba ai asaga foipatini li he'mi su holoto lenele'mo lenubuto bi'ehibe. 39 Mosehi keya ka'auba lenele'mo lenubuto bito foipatini li he'mito bebe sana bona'i yabe luto lenigi mehalina'mu yabe. Ya hu'ehina ya'ma bomofitoga komopa'ani emite minalanamagi asaga foipana'ani li he'mi epoloto enele'mo enubuto biloto bebe sana bona'i yabe luto enigi molo'ehibe. 40 Ya hu'ehinagi lenali kaba hu bati hilo. Koyapa'i kaga lu huto huto hulata bomagi ka mone ma lite li'ahanauba lenalitoga o lalibe:

41 
  • Lenali enemegeka lilata bona'i
  • lenali topa hete
  • gili gili hilete fililo.
  • Nani lenali kanalo lili'na mone nolube.
  • To bo moneuba
  • ya'mana kaga lu hokolo hilina
  • lenali ai ka'a keheli meemilana'mu yabe.

42 Ya lu epito Polugo Banabasiugo li gehesa hilata nonugati he'mite fegutoga limilu'ibe'mu neha'igo boana'magi mone fuli yupapogu kanagu aku kaga mone'a hiti ete lu limila'ibe lite lu etete'ahana yabe. 43 To li gehesa hite nehana bona'i bila ela nehago Yuta bona'i luga'a hiti to fegutoga bona'i Yuta bona'magihi mono ka keheli'ahana luga'a hiti Polunogo Banabasinogo etemege'i lifite bi'ahana yabe. Ya nehago etali kaga lu epite enele'mo amuya melete Hu'mau lenehe'menogo ai yanugu minalo lite li'aha'ina yabe.

44 Mone fuli kanagu silaga bona'i taunigati Sipi Bomofihi kaga'a kehelilune lite li gehesa hi'ahana. 45 Ya hago Yuta bona'magi babu boana'i li gehesa hana bu gelete siko hilete enipakafa he'ahana. Ya hilete Polu kaga nolina kaga'a li sibi hite fagalo bo nohatagi kaga meluse analo he'mibo lite bunepa i'ahana. 46 Ya nelago Polugo Banabasiugo ule'ale hilete ma lite kaga li'aha'ina: Ma'naka luto lenali Yuta bona'magita Hu'mamofihi ka'a kohe toto lu nolepu'ibe. Ya hu'ina lenali Hu'mamofihi ka'a keheli he'minana to lenali minoba minoba hepa'mofihi nasana'mu melebesibe lite lago le'ali he'mi lepoloto fegutoga bonatoga nobu'ibe. 47 Sipi Botiuba kaga ma luto molo'ehinamoya lali'i limi'ehina:

  • Fegutoga bona'magitoga
  • fana tose'na kele'mo ho ti'ohube.
  • Melugu bona'i yege yege'i nehanamagihi
  • enele'mo enubuto bilane luto
  • kapo li hokolo huse bo
  • kele'mo ho tube.

48 Ya noligo enali fegutoga bona'magi kehelilete enegelo bilete Sipi Bomofihi ka'alo fokehi he'ahana. To asaga bona'i minoba minoba hepatoga bilabe luto Hu'mau elesa molo'ehinamagi aitoga komopa'ani emi'ahana yabe.

49 To Sipi Bomofihi kaga'a ya'mana kegi'a tili tele huto bula ola hu'ehina. 50 To Yuta bona'magi fegutoga ana'i enikibinamagi Hu'mamofihi ka kehelilata nehana hiti to hepalugu olopa bona'i hiti enekesa li baga ilete Polunogo Banabasinogo enegene mane hite etele'mo hepa'aniguti fegutoga mele'ahana. 51 Ya hago etali etigigusagu su'atiti kisite mumusopa i tili hilete Ikoniu hepatoga bi'aha'ina. 52 Ya ha'igo Atioki hepalugu Yesuhi mege'i mele'ahanamagitoga Sikalafu'mofihi amuya'auba enalitoga bai tago enegelo sipi bi'ahana yabe.

Copyright information for `BEF