Acts 15

Yelusale hepalugu li nupa hite tutuma'i mele'ahana

1Bona'i luga'amagi Yutia kegi'ati ete Atioki henetilete Yesuhi kaga'a kehelise bona'a kaga ma lite enelepi'ahana: Lenali Mosehi keya ka lu'ehina'a hite mege'i melete lenugufa laga mehilana lenugufatini li lenubuto mebilana'mu yabe, lite ya'ma kaga'ani lu epite hapi fi'ahana. 2Ya hago etali Polugo Banabasiugo etubufaluga ya hanana'mu lite logo bigo ana bona'i hiti kenasabo bite enogolagagu fibu fibu hi'ahana. Ya hilete enali Polunogo Banabasinogo hiti to luga'a bona'i etalitoga malana hiti Yelusale hepato tite aposolo bona'i hiti to olopa bona'i hiti nehanalo kaga lu bebe salabe lite enoho lifi'ahana yabe.

3Yesuhi kaga kehelise bona'magi ana hepatogati enoho lifigo enali Fonisia kegi'a bite to Samalia kegi'a bilete li'ahana: Fegutoga bona'magi Hu'mamofitoga komopa'ani emi'ahanamofihi kaga lu epi'ahana. Enalalu'anigi ya'ma kaga kehelilete enegelo sipi bi'ahana yabe. 4To enali Yelusale hepato henetigo Yesuhi kaga kehelise bona'magi hite aposolo bona'i hiti to olopa bona'magi etebe tigi'ahana. Ya hago etalitoga Hu'mau etoto'ehinamofihi hapa hapa'a lu epi'aha'ina yabe. 5To Felosi naga'i mone'amagi Yesuhi agoya hu emilata enali ho tite ma lite li'ahana: Ya'ma fegutoga bona'i enali enugufa'ani laga hilenogo Mosehi keya ka'a lu epinogo mege'i malalabe lite li'ahana yabe.

6Ya'mana ya lite lago aposolo bona'i hiti to olopa bona'i hiti ana kagamofihi keheli keheli hilete lu monetoga malalune lite li nupa hi'ahana. 7Enali kenasabo bite kaga lumupa ilago Pitau ho tiloto ma luto lu'ehina: Nalalu'nigitase. Koyapa kanagu nani'i fegutoga bona'magitoga ka lamana'a lu yege ho epilenogo enali ana kaga kehelite li komopa'anigu malalabe luto Hu'mau lenali folagahatiniguti nele'mo ho ti'ehina lenali keheliya i'ahabe. 8Hu'mau asaga bona'magi komopa'ani bu go fulu tito bu nogana bouba ai komopa'ani bu gana bati hu'ehigo Sikalafu'i lali'i limi'ehina suhi luto enali'i epi'ehibe. 9Ai lali'i fato suhi nohu letoto enali'i mone fato suhi mehu epolo'ehibe. Enali komopa'ani aitoga emigo ya hanalo nona'a foipana'ani li he'mi epolo'ehibe. 10Ya hu'ehinaya lenali yatai hena hibe lite Hu'mamofihi fi taga hi etalune'mu nehabe? Lenali Hu'mamofihi mege'i malalune'mu nehana bona'i ketana enemegesagu ligo mefi epalalo. Koyapa'i tatatigi hiti to laliti hiti ana ketana kofito mebiluta'a hu'ohuta yabe. 11Ya hu'ehina lali ma luto komopati emilata nohune: Ya'mana bona'i foipana'ani li he'mi epoloto ai'aloto enele'mo molo'ehina'a huto Sipi Bo Yesu lali'i ginaga fi limi'ehina'mu luto Hu'mau aku'i lele'mo'ehibe luto Pitau lu'ehina yabe.

12Pitau ya luto kaga lulago asaga bona'i li gehesa hite nehanamagi kaga'ani lege'nete legeso hi'ahana. Ya hilete Polugo Banabasiugo la'ina kagalo enekesa mele'ahana. To ya hago etali etayato Hu'mau babeyafana fato fato'i ya'ma topa hose nasanamofihi fegutoga bona'magi folagaha'anigu li huto hu'ehina kaga lu epi'aha'ina yabe. 13Etali ka'atiti ali su hela'igo Yemesiu ho tito lu'ehina: Nani liluna kaga kehelilo, nalalu'nigita. 14Hu'mau yata'a yupahi fegutoga limito enali folagaha'aniguti ai'a bona luga'a enele'mo'ehinamofihi kaga'a Simoniu alu lepi'ehibe. 15To kaga lu yege holata bomagihi ka'aniuba ya'mananalo moneko ka pa nosabe. Ya'ma mono bukugu fayahi keye'ahanamo ni'ibe:

16
  • Sipi Bouba ma luto lu'ehina:
  • Nani alihi i behe huto
  • oloto'ni Tebitihi noha'a
  • i tele bito limito ko'ehina
  • nani aku'i gi kosaba hilube.
  • To fe'noha'a ya'mana
  • nonuguti tuguma bi'ehilina
  • nani yuhufana li malalube.
17
  • Ya hu'ehinogo
  • fato fato bona'i asaga'magi
  • Sipi Bomofihi sa sa hilabe.
  • Asaga bona'i noto noto nehanamagihi
  • nani'ni bona'ni yabe luto
  • elesa molo'ohube.
  • 18
  • Ya'mana kaga koyapa'i
  • Sipi Bouba ai'a lu hokolo hu'ehina kaga
  • yatai hiti ai'a nolibe.
  • 19Ya hu'ehina nani'ni ma luto nokehelube. Enali fegutoga bona'magi komopa'ani i behe hite Hu'mau mege'i nemelenogomo lali kapo'ani hekini loto ketana ligo mefi epalalune, Yemesiu ya luto noluto yabe. 20Lali enalitoga fayahi goloto ma luto lu epilune: Fato fato'na enemeha'amagihi kuguhi go nepilana nose'na ya'ma kolo tana nose'na ni'inagi menalata. To enali bo alobo gulu hete ai he'mi etenogo ai he'mi etenogo mehilabe. Enali yagakafa lubaha'ani nagatu gi polo hago golahubago hu'ehilina menalabe. 21To asaga nohi

    hepato bo mone minola minola hi'ehite asaga fuli kanagu Yuta bona'i li gehesa hite kaga lu keheli fa keheli nehana nonugu Mosehi keya ka'a leka so epilata to ana ka'a lu yege holata asaga nohi hepato nehanamoya lali ya'ma akeheli'ohune luto Yemesiu lu'ehina yabe.

    Fegutoga bona'i Yesuhi kaga'a kehelise'na'a enalitoga fayahi mele'ahana

    22To aposolo bona'i hiti to olopa bona'i hiti asaga mono bona'i hiti kaga lu monetoga melelete enali bo luga'a folagaha'aniguti enele'mo ho tinogo Atioki hepato Polunogo Banabasinogo hiti enoho lifinogo bilabe lite keheli'ahana. Ya hilete enali Yutasihi fato gi'a Basabasiu yabe lite gi helata nehana bo hiti to Silasi hiti etele'mo ho ti'ahana. Ya'mana bole asaga bona'magi bati bo neha'ibe lite lilata nehana bole yabe.

    23Enali fayahi mone ma lite gete etali etayanugu mele'ahana: Lali aposolo bona'i hiti to olopa bona'i hiti lenalalutinigita fegutoga bona'i Atioki hepato hiti Silia hepato hiti to Silisia hepato hiti neminanamagita lenalitoga bati hite nehafihe luto fayahi nogo lepolone. 24Bo luga'a lali folagahatiguti lenalitoga bite kaga fato fato'i lu lepigo lenali'i keta lepesi'ehina lali akeheli'ohune. To lali ya'ma kaga bite lu epilo luto enoho melifi'ohune. 25Ya'mu luto lali kaga lu monetoga mololototi folagahatiguti lalalutile'i loemo etele'mo ho tiloto lenalitoga kaga lite bila'ibe luto Polunogo Banabasinogo lebesina bole lalalutigihi hiti moneka enoho lufunogo ba'ibe. 26Etali Sipi Boti Yesu Kilisitohi foya koli mehise lite neba'igo filise'na li etugufalo babu yupahi mele'aha'ina yabe. 27Ya'mu luto loe bole Yutasinogo Silasinogo etoho lufune. Ya hutagi etali'atiti etabagaguti ya'mana kaga lu lepila'ibe. 28Sikalafu'uba lali hiti moneka nohigo kaga ya'ma luto lu'ohune. Lali ketana fato'i aku'i mone melepilune. Lenali ya'ma suhisigo hilo. 29Fato fato'na enemeha'amagihi kuguhi go nepilana nose'na menalo. Yaga golahi mo silo. To yagakafa bona'i nagatu gipolo hu'ehilana menalo. Lenali bo alobole ai he'mi etenogo ai he'mi etenogo mehilo. Lenali silaga ya'mana kaga mege'i melete nesi'a mone pelesa meise minalana bati hilana'mu yabe. Lenali bati hite minalo.

    30Ana fayahi epilete enoho lifigo bana bomagi Atioki hepato henetilete Hu'mamofihi komopa'ani emite neminana bona'i enele'mo nupa hilete ana fayahi epi'ahana. 31Ya hago enali ana bona'magi hetofa kaga fayanugu ge'ahana leka sete be gelete enugufagu laga higo enegelo bi'ahana. 32Yutasiugo Silasiugo etali kaga lu yege holatamale'i kaga yatamalo lu epite enalalu'anigihi koli mehilo lite enele'mo amuya mele'aha'ina. 33Yutasiugo Silasiugo nesi kana'asi ana hepato minela'igo enalalu'ani nehanaga aku'i i behe hite bila'ibe lite fulunaguti etoho lifi'ahana yabe. 34Ya hilune'mu nehago Silasiu managa minalube luto keheli'ehina.

    35Polugo Banabasiugo ya'ma Atioki hepalugu kana mone'a mine'aha'ina. Etali hiti to bona'i luga'amagi hiti kaga enelepila to Sipi Bomofihi ka lamana'a lu yege hela hite mine'ahabe.

    Polugo Banabasiugo loko hi'aha'ina

    36Alihi nesi'a kana minelete Polu Banabasihi ma luto lu emi'ehina: Le'ali koyapa'i Sipi Bomofihi kaga'a lu yege ho epi'ohu'ina bona'i le'alaluti'agi nehana hepatoga buto enebe tigimofa'na hilu'ibe. Ya hulototi'a enali bati hite nehafi to hena hite nehafi bu enagalu'ibe. 37Ya luto ligo Banabasiu: Yoni Makihi le'mo le'emegetoto ai bilune. 38Ya ligo Polu: O'e luto, koyapa ya'ma pana'uba Pamifilia kegi'ati he'mi le'etoloto fato kapoga bu'ehina. Le'ali hiti moneka humofa'na huto lili'na li baga mei'ehina pana'i yago le'ali hiti mebilibe luto Polu ya lu'ehina. 39Polugo Banabasiugo ana kaga'mu lite kenasabo bite etogolagagu fibu fibu hilete loko hi'aha'ina. Ya hilete Banabasiu Makihi le'moto Saipalasi ya'ma hege nagamilugu ti'ehina metoga botigu tite bi'aha'ina. 40Ya neha'igo Polu Silasihi le'moto nobigo lalu'agi ma lite li'ahana: Hu'mau kaba hu letoto letehe'menogo biliyo, lite li'ahana. 41Polu Silia kegi'a hiti Silisia kegi'a hiti buloto Hu'mamofitoga komopa'ani emi'ahana boana'i kaga lu epito enele'mo amuya molomo bu'ehina.

    Copyright information for `BEF