Acts 17

Tesalonika bona'magi Polunogo Silasinogo etahalune'mu hi'ahana

Etali kapo melete bite Afipolisi kegi'a henetilete yaloti he'mite bite Apolonia kegi'a henetilete ana hite ya'ma hepa'i be ligite bite Tesalonika hepato heneti'aha'ina. Ya'mana hepato Yuta bona'magi mono noha'ani mone ni'igo bu ge'aha'ina. Polu hulata nohina suhi luto Yuta bona'magi kaga lu keheli fa keheli hilata nehana noha'anigu buto ti'ehina. To ai loegi monegi fuli kana'agu mono bukugu ana bona'i kaga ma luto lu epi'ehina: Mesiau gabu foya liloto filito aku ho tilibe luto Hu'mau le'mo ho ti'ehina. Ya'ma Yesu kumu kaga lu nolepuna boya ai Mesiau nohibe luto lu yege hago enali enegekesa keheliya i'ahana. Luga'a boana'magi etali ka'atiti keheli komopa'anigu melete etemege'i mele'ahana. Giliki bona'i luga'a babu lite Hu'mamofitoga agoya hu emite mine'ahana bona'i ana hite, to enigihiti ana'magi ana suhi hite etemege'i mele'ahana yabe.

Ya hago Yuta bona'i luga'amagi enogolagu higo enipakafa helete enumuhi meni'igo kegeiyo neminana bona'i enele'mo nupa hi'ahana. Enali nonugu nonugu tauniga tilete limilete hite ete bo mone Yesonihi nohi li bego hite Polugo Silasiugo ana nonugu neha'ifi meneha'ifi lite libe tele bibe hite nehi'inogomo etele'mo fegutoto bona'magi enubulo etele'mo malalune lite yabe. Ya hana etali meneha'igo Yesoni hiti lalu'agi luga'a hiti enayato lite gamani bona'i enubulo bilete nogo'ani sipi ma lite li'ahana: Enali ya'ma bomagi asaga hepa'i li sibina nehana yatai ma hepati li sibina hilune'mu nehabe. To Yesoniu ya'mana bo noha'aluga enele'moto bu'ehinamagi Sisahi kaga'a ligofa helata nehite ma lite lilata nehana yabe: Kibina bo fato mone nohina gi'a Yesu yabe. Ya nelago asaga boana'i hiti to gamani bo hiti ana kaga kehelilete topa hete kehe sipi sipi i'ahana. Ya hilete gamani bona'magi Yesoni hiti lalu'agi hiti enalitogati efahi mone'a lu molo'ehinanamo nelite he'mi epalago bi'ahana yabe.

Polugo Silasiugo etali Belia hepalugu mono foya li'aha'ina

10 To ana folugu'i sinihi ginogo Yesutoga agoya hu emi'ahana bona'magi Polunogo Silasinogo Belia hepato mele'isi etoho lifi'ahana. Ya hago etali Belia hepato henetilete Yuta bona'magi mono li gehesa huse nonuga bite ti'aha'ina yabe. 11 Enali Yuta bona'i Belia hepalugu enegekesa hokolo nehanamagi hetofana hite koyone hi'ahana. To luga'a Yuta bona'i Tesalonika nehanamagi suhi lite memine'ahana. Enali Belia bona'magi ka'atiti keheli bati hite laga'ani epesigo asaga yupahi mono buku'ani hiti lite e'ehite Polugo Silasiugo faga lila'ifi ma'naka lila'ifi lite leka so bati hite bu golata hi'ahana. 12 Ya hilete babu boana'i etali ka'atiti komopa'anigu li pili kago to babu enigihiti Giliki ana'i to bona'i babu lite enali hiti ana hite ana kaga komopa'anigu li pili koto hi'ahana. 13 Ya hago alihi Tesalonika Yuta bona'magi Polu ya huto Hu'mamofihi ka'a Belia bona'i lu noepibe lana'a keheli'ahana. Ya hilete enali ana hepatoga bite boana'i faga faga lube epibe hite enegekesagu lu pisili bite enele'mo negi nagi ne'ahana. 14 Ya nehago Yesutoga agoya hu emi'ahana bona'magi Poluhi mele'isi le'mo he'migo hege nagami beletoga limi'ehina. Ya nohigo Silasiugo Timotiugo etali Belia hepatoga mine'aha'ina. 15 To Poluhi le'mete moneka bana bona'magi le'mo foto'i melete Atenisi hepato bi'ahana. Ya hilete enali aku'i i behe hite Belia alune'mu nehago Polu Silasinogo Timotinogo etali kumu mele'isi nani nohunaga aliyo luto kaga malago lite bi'ahana yabe.

Polu Atenisi tauniga mono ka lu epi'ehina

16 Polu Silasinogo Timotinogo Atenisi hepato etegeba huto nohuto bu gana ana hepalugu ana'ina meha'a babu lite yafatu lolo hite mele'ehite komopa'ani ananamagihi epite neminago bu go'ehina. Ya huloto anana'mu luto Poluhi ipagu keta hu'ehina. 17 Ya higo kaga lu keheli fa keheli hilata nehana mono nonugu tiloto Yuta bona'i hiti to fegutoga bona'i luga'a Hu'mamofitoga komopa'ani emite minelata nehana bona'i hiti kenasabo bilata hu'ehina. To asaga yupahi babu boana'i hepa'i folagaha'agu limo gehesa hite minete kaga lu keheli fa keheli hilata hanalo Polu kaga lu epilata hu'ehina yabe. 18 To luga'a Epikuli bona'i to Sitoiki bona'i kaga enelepilata bo'animagi Polu hiti kenasabo bilete luga'amagi ma lite li'ahana: Ya'ma hagulu hagulu ka nolina bo ai henamofihi kaga lu epilube'mu nohibe? To luga'a bona'magi li'ahana: Ai fato melugu meha'agi kaga'ani lu yege nohabe. Polu Yesu kumu ai fili'ehinagati aku'i ho ti'ehibe luto ka lamana'a lu yege ho epina'mu ya lite li'ahana yabe. 19 To enali Poluhi le'mete kanisole bona'i li gehesa hepa'i gi'a Aleopagu yabe lite bite ma lite li'ahana: Kai yuhufa kaga boana'i noenelepitamofihi hapa'a lali keheli bati hilune'mu nohune. 20 Kai lu noepita kaga lali keheluta fato huse ka lu noepine lali ana kagamofihi hapa'a hena huto ni'ifi lali kehelilune. 21 To asaga Atenisi bona'i hiti to fato hepatoti bona'i luga'a ete ana hepato mine'ahanamagi hiti yatai yuhufa kaga kehelise yupahi yabe lite limo gehesa hi'ahana yabe.

22 To Polu Aleopagu kanisole bona'i enubulo ho tiloto ma luto lu'ehina: Lenali Atenisi bose. Asaga mono kaga lusemofito lenali amuya nemalago bu nolenogobe. 23 Lenali komopatini emilata nehanana asaga'i hepatinigu ni'ina nani kapo nomoloto'ni abu go su ho'ohube. To kuguhi gelata nehana hepato kaga mone ma lite fayahi gete mele'ahago bu go'ohube: Ya'ma mekeheli'ohuta nasana meha'alo yabe. To lenali ya'mananamofihi meha'a bu mege'ahananalo komopatini emite fa'mene'mu minelata nehana yatai nani kaga'a lu hokolo huto lu nolepube. 24 To Hu'mau kokuluma'i hiti me'i hiti to asaga'na fato fato'i anagu ni'inana lolo hu'ehina bo ai kokuluma'i hiti me'i hiti Sipi Bo'a nohuto bona'magi enayatu gilata nehana mono nonugu tito meminolata nohibe. 25 To ai ana'ina'a su holenogo bona'magi enayanugati he'mete meemilana'mu yabe. To hena'mugope asaga bona'i sikalafu'ani episemofihi to mino kosaba husemofihi to silaga'na ai'ago epilata nohibe. 26 Koyapa'i moneko bo lolo hu'ehinaguti nupa bo safa bo fato fato'i noto noto'i bite mino baga ino luto enoho lifigo analo analo mine'ahana yabe. Ai'a yata'a kana'a molo epoloto ya hepato bila bila hilo luto me'i enemeto enemeto epi baga i'ehina. 27 To ai Hu'mamofihi sa hilabe luto ya hu'ehina. To enali ai kumu'i sa sa hite bula ola hilete be go lamana hilabe. To ai ana bo foto'i menohina laliti lemeto lemeto nohibe. 28 Ya nohigo kaga mone ma ni'ibe:

  • To ai yanuguko mino kosaba huto
  • bula ola huto nominone.

To luga'a bonatinimagi kilihe ka ma lite li'ahana'a huto ni'ibe: Lali hiti ana huto ai'a yagapana'a nohune.

29 Ma'naka luto Hu'mamofihi yagapana'a nohutagi ya'ma lali Hu'mamofihi hapa'a li sibina huto golitufi silibatufi to efatufi ana'ina meha'a bona'magi enegekesa keheli bati hi'ahanamagi enayatu lolo hi'ahanana'mu ai nohibe luto lekesa mekehelilune. 30 Koyapa'i kaga keheli bati mehuse kanagu yatai kana'alo li huto nehanamofihi li huto nehanamofihi li huto hilata hi'ahana Hu'mau bu go he'mi'ehina yabe. To yatai ai asaga bona'i ma luto lu noepibe: Lenali foipana li huto nehana he'mi su helete komopatini i gelehe hilo. 31 To ai asaga melugu bona'i ka foya liloto guna ilube luto limilina kana'a molo eto hu'ehibe. To ai ya'mana lili'na lilibe luto bo mone le'mo ho ti'ehinauba guna i epalalibe. Ai ana bo fili'ehinagati le'mo ho tilotomo ya'mana asaga bona'i enelepigo be gete keheli'ahabe.

32 Filise bo kene keliguti aku'i ho ti'ehibe luto Polu lina kamu'i luga'a bona'magi kiya hi ete'ahana. To luga'amagi ma lite li'ahana: Mone yupahi ana kaga aku'i lu limitogo kehelilune. 33 Ya lite lilago Polu li gehesa hite nehanaloti he'mito bu'ehina. 34 To luga'a bona'magi kaga'a keheli komopa'anigu melete mege'i mele'ahana. Ya hana bona'magi folagaha'aniguti bo mone Tionisiu ai Aleopagu kanisole bo hiti to mone a'i Tamalisi hiti to luga'a bona'i hiti ikelete mege'i mele'ahana yabe.

Copyright information for `BEF