Acts 19

Polu Efeso mono foya li'ehina

Apolosiu Koliti hepatoga minana kana'aluga Polu kosa ubago hina kapo luga kapo moloto oto Efeso hepato neheti'ehina. Ya huloto Efeso hepalugu Yesutoga agoya hu emi'ahana bona'i luga'a bu enogoloto enoloka ho'ehina: Lenali Yesutoga komopatini emi'ahanalo Sikalafu'i li'ahanafihe? O'e, koyapa'i Sikalafu'i ni'ibe lite lu limigo lali mekeheli'ohuta yabe lite ka'alo nona'a li'ahana. Ya lago Polu aku'i enoloka ho'ehina: To lenali henamofihi nagami'i fele'ahabe? Ya ligo enali lu emi'ahana: Lali Yonihi nagami'i folo'ohune. Ya lite lago Polu lu'ehina: Koyapa'i boana'i komopatini i behe hilo luto lu epito Yoniu nagami'i folo epolo'ehina. To bo mone nani nemege'i noana bo Yesu, aitogago komopatini emite minalo luto Isilaeli bona'i lu epi'ehina yabe. Polu ya luto lu epigo enali ana kaga kehelilete Sipi Bo Yesuhi gi'alo nagami'i fele'ahana. Ya nehago Polu lataha'anilo yahi noligo enalitoga Sikalafu'i limigo fato fato nogo hite Hu'mamofihi ka'a ana nogoguti li'ahana. To ya'mana bona'i nayahi luga luga su hoto nigigusagati loemo heleko malana'amagi yabe.

Polu Yuta bona'magi mone kaga lu keheli fa keheli hilata nehana nonugu tiloto amuya moloto ka lamana'a lu epito ikahi loebe monebe mino'ehina. Ai enali hiti kenasabo bi enohoto Hu'mamofihi Kapo'alo bilabe luto amuya kaga lu epi'ehina yabe. Ya lina kaga luga'a bona'magi keheli komopa'anigu memelelete silaga boana'magi enubugu Sipi Bomofihi Kapo'a lu sibina hi'ahana yabe. Ya lago Polu nohe'mi epoloto pana'alobo'a enele'moto buto asaga yupahi Tilanuhi ka enelepilata nonugu tito kaga lulata hu'ehina yabe. 10 To ai ya huto minoto kufu loemo li he'mina kana'agu Yuta bona'ifi Giliki bona'ifi to silaga bona'i Esia melugu mine'ahanamagi Sipi Bomofihi ka'a akeheli su he'ahana yabe.

Sikibahi pana'amagihi kaga'ani

11 Hu'mau Poluhi yato babeyafana fato fato'mofihi li huto hu'ehina yabe. 12 Poluhi hakisipi'afi to gukete'a pekene higo he'mi'ehinana lite bite enebesi'ehina bona'magi enugufaga soso hago enebesise'na'ani su ho epolola to foipa fele komopa'anigu minolata hu'ehina bona'magi ana hite enugufa soso hago ana foipa fele heleko limito bulata hu'ehina yabe. 13 To Yuta bona'i luga'amagi bula ola hite foipa fele ho lifi nehe'mite efahi lilata nehanamagi enegekesa kehelite Sipi Bo Yesuhi gi'a ya'ma babeyafalo foipa fele ho lifilube'mu hu'ehina. Ai foipa felemofihi ma lite lu emi'ehina: Polu kaga'a lu yege nohana bo Yesuhi gi'alo kehe noube. 14 Yuta bona'magi sipi mono bo'ani Sikibahi pana'amagi ya'ma suhi li'ahana. 15 Ya nehago foipa feleuba ma luto lu epi'ehina: Nani Yesuhi kehelito to Poluhi hapa'a hiti akeheli'ohube. To kaibe kiyi'agabe? 16 To ana foipa fele komopa'agu nohina bouba enugufalo heleko moloto sipi luba huto enoho'ehina. Ai lusina huto fugepa'ani bigo gukete'ani toba hoto li behe kege hube higo ana nonugati he'milete enugufa yapako hololu lite bi'ahana. 17 Asaga Yuta bona'i hiti to Giliki bona'i hiti Efeso hepato neminanamagi foipa feleuba enoho'ehibe lite lana ka kehelilete enelesa'ani gofa ligo sipi koli hi'ahana. Ya hilete Sipi Bo Yesuhi gi'a liyafa hite fokehi he'ahana yabe. 18 Babu bona'i Hu'mamofihi agoya hu emi'ahanamagi ete asaga boana'magihi enubulo lu sibina hila to foipa hapa'ani lu huto huto hi'ahana. 19 To luga'a bona'magi ana hite nalisa enehelata nehanamagi buku'ani li nupa hite asaga bona'magi enubulo logogu ge'ahana. To asaga logo ge'ahana bukumofihi mina'a li nupa hite bu gana sipi efahi leka sete 10,000 kina ya'ma huto hu'ehina yabe. 20 Ya'ma hananaguti Sipi Bomofihi kaga'auba amuya mololoto i futili katili huto bula ola huto ule'ale hu'ehina yabe.

Efeso bona'magi Poluhi bunepa i'ahana

21 Alihi anana huto hu su holago Polu kapo moloto Masetonia kegi'a buto Gilisi melugu nehetiloto yagati he'mito Yelusale bilube luto ekesa keheli'ehina. Ya'ma melugu bu baga iloto'ni ana huto alihi Lomu kegi'a bilube luto lu'ehina. 22 Ya luto ekesa akeheliloto Timotiu yagi to Elasatu yagi etali ai'i he'mete lili'na neli'ina bole Polu etoho lifigo Masetonia melugu neba'igo ai'a Esia melugu nesi'a kana mino'ehina.

23 Ya'mana kana'agu luga'a bona'magi Sipi Bomofihi Kapo'amu lite fatehi fi etelete kehe napa ite bati mehi suhi li huto hi'ahana. 24 To bo mone mino'ehina gi'a Temetiliu ai silibatu'i ana'ina lolo hulata bo yabe. Ai fato fato'na meha'a silibatu lolo huto Atemasihi sefu noha'agu nomalago ana bisinisi'auba lili'na neli etana bona'magi mina'a bati hite li'ahana yabe. 25 Ya hago lili'na bona'a hiti to mone'ago lili'na lilata nehana bona'i Temetiliu kehe i nupa huloto ma luto lu epi'ehina: Ma bose, lali fe'nohati ma lili'naloto huto nohinamofihi lenali be ge'ahabe. 26 Ma bo Polu nohinanamofihi hapa'a lenalitini lenubutu be gelete akehelilata nehabe. Ai silaga bona'i Efeso maga asaga'i nehana hiti to asaga Esia kegi'a bu baga iloto ma luto lu epilata nohibe: Bona'magi enayatu ana'ina meha'a lolo hite komopa'ani emilata nehanaya faga faga suhi nehabe luto lu epilata nohibe. 27 Poluhi ya'mana ka'auba bisinisi lili'nati li sibina nohuto sipi a'i Atemasihi meha'a lolo hite mele'ahana noha'a boana'magi enubugu fa'menena le'mo lolo hilina'mu yabe. Koyapa'i Esia bona'i hiti to luga'a melugu bona'magi ya'ma a'i meha'amofihi komopa'ani emite minelata hi'ahana yatai Poluhi ka'auba sipi gi'a li sibina hilube'mu nohibe lite li'ahana yabe.

28 Ya luto ligo li gehesa hite minana bona'magi kehelilete lusina huto enitaluga logo bigo kehe sipi ite li'ahana: Efeso bona'magita Atemasi sipi a'mo laliti nohibe lite hapi fi'ahana. 29 Ya hite, kehe napa neigo silaga bona'i ana hepatoti ho ti baga ite kehe napa ilago bila ela hite Poluhi lalu'afugo hiti kapo melete moneka nebana bole Gaiyasi hiti Alisitaka hiti Masetonia kegi'ati etayato lite hololu lite tutuma'i melete nehanalo bi'ahana. 30 Ya nehago Polu bona'magi folagaha'anigu heleko moloto buto ai'a kaga lu epilube'mu nohigo lalu'agi mebubo lite le'mo mele'ahana. 31 To luga'a gamani kaba bona'i ai lalu'agi lolo hite mine'ahanamagi: Kai tutumalugu mebubo lite aitoga ka mele'ahana. 32 To li nupa nehana bona'i luga'amagi fato ka lite kehe neigo to luga'amagi fato ka lite kehe neigo hago ana hepalugu kagauba pisili bigo negi nagi ne'ahana. To bona'i mone'amagi enali henabe lite li gehesa nehafi lite keheli bati mehi'ahana. 33 To Yuta bona'magi mone bomofihi Alekasata gi'a yabe folagaha'anigu le'mo malago binana'mu lite luga'a bona'magi ai kaga hapa'a nohibe lite fisa i'ahana. Ya hago Alekasatau yaha babeyafa huto kaga'anilo nona'a lu epilube'mu hu'ehina. 34 Ya nohigo asaga bona'magi ai Yuta bo nohigo be gelete moneko kumu koyapa li'ahana kaga lu kululu pa sete aku'i ma lite li'ahana: Efeso bona'magita sipi ati Atemasiu nohibe, lite yatama kana ana kagago luba luba hi'ahana.

35 Alihi Efeso kusi kusi bouba silaga bona'magi kaga'ani i lege'noloto ma luto lu epi'ehina: Lenali Efeso bona'ise. Atemasihi mono noho hepa ma Efeso ni'igo kokulumaluguti sefu efahi limi'ehina malo ni'ibe lite lilata nehanamoya asaga bona'magi akeheli'ahabe. 36 To mone kene'uba ya'mananamofi kumu lu fala mekilina'mu yabe. Ya hu'ehinagi lenali kagatini analo lege'nete lenuluhaya tite ana'ina mone mele'isi li huto mehilo. 37 Lenali ya'ma bo loemo etele'mete e'ahana bomale'i etali ana'inatini gumina felela to lali ana'ina Atemasi lugefati kumu lu sibina hila mehi'aha'ibe. 38 To Temetiliu hiti to ai lili'nalo bo'a hiti bo mone'mofihi ka foya li etalune litemo ka foya lise kana'a fato yupahi kana'alo alanamo ni'ibe. Ya hinogo gamani bona'i nehanago enali ka foya li epelete ka'ani lu bati hu epalalanamo ni'ibe. 39 To lenalitinilo kaga mone'a hiti ni'inogomo tutuma'i melete kaga lilata nehana ana yupapo lu huto hinogo asaga bona'magi ana kaga lu bebe salanamo ni'ibe. 40 Yatai yegegu luba hulototi kaga yuhufa fato'i ligo futita'mu yabe. Ya'mananamofihi kaga hapa'a ma'naka luto meni'inanalo li nupa hutago mone gamani bouba hena hibe lite li nupa hi'ahabe luto loloka hatita kaga hapa'a lu emilutana'mu sa sa hutita'mu yabe. 41 Kusi kusi bouba ya luto kaga lu epiloto ana bona'i enele'mo tili higo bula ola hi'ahana yabe.

Copyright information for `BEF