Acts 2

Sikalafu'i limi'ehina

Sikalafu'i limise kana'a olago enali moneko nonuga ete li nupa hite mine'ahana. Ya hi'ahago mele'isi kokulumaluguti nogo molo'ehina, ai amuya habafahi suhi luto nogo molo'ehina, ya huloto li nupa hite nehana nonugu tito ana habafahuba bai to'ehina. To logo guluya meha'a legina huto nohigo bu ge'ahana. Ya nehago ana logo guluya meha'a nesi nesi huloto moneko moneko bonato mino baga i'ehina. To Sikalafu'uba asaga aposolo pana enalitoga bai tago enali fato fato kaga li'ahana, ai Sikalafu'uba li enabagalo malana kaga li'ahana yabe.

Yuta bona'i luga'a Yelusale ete mine'ahana, enali mono bona'i hiti to bona'i luga'a fato fato hepatoti ete li nupa hite mine'ahana. Ya hite nehanalo sipi nogo kokulumaluguti malana kehelilete babu bona'i limo gehesa hilete aposolo pana'magi kaga fato fato nogo hite nelago limo gehesa hana bona'magi nogo'aniguti fato fato'i kaga nelago kehelila kehelila hi'ahana. Ya hilete enali ana kagalo topa helete enegelo gofa bi'ahana. Ya hilete enali luga'aga enekesa yigi babu nelite luga kegi'a enegelo bilete ma lite li'ahana: Enali asaga bo ma kaga nelana asaga'i Galili bogo nehabe. Hena hi'ehite enali moneko moneko bomagita nogoti hite kaga fato fato nogoguti nelabe? Enali itotigi atotigi lago keheli'ohuta nogomoguti kaga nelabe. Maga li gehesa huto nohuta bona'iya Patia to Mitia to Ilama hepato bo yabe, to lali Mesopotamia bona'i yagi, Yutia to Kapatosia hepatoti, to Ponitasi to Esia bona'i yabe. 10 Filigia to Pamifilia kegi'ati, Iyipi bona'i Libia kegi'a Sailini lebatoti yagi, lali Lomu bo maga oto nominota. 11 Lali Yuta bo hiti to fato bona'i Yuta bona'magi hapa'ani li'ohuta bona'i yagi, Kiliti to Alebia bona'i yagi lali asaga'i fato fato nogoti nina nohuta enali ana mone'isi nogotiguti Hu'ma amuya lili'na li huto hu'ehinamofihi lu yege hago nogotiguti keheli baga une. 12 Ya hilete enali topa helete enekesa yigi babu lilete enali'ani ma lite ai loka hago ai loka hago hi'ahana: Ya'ma kaga nelanaguti hena suhi huto hilina ni'ibe? 13 Ya nelite luga'amagi kiya yokolo ka lu epelete enali kosaba bai nagami'i babu lite ne'ehite nelabe li'ahana.

Pitau lu yege ho'ehina'a

14 Ya lago Pitau hiti to nayahi luga luga su hoto nigigusagati mone heleko malago nehana aposolo naga'i hiti asaga'i ho tilete kehe sipi iloto kaga lu hokolo huto asaga boana'i ma luto lu epi'ehina: Lenali Yuta bona'i hiti to asaga boana'i lenali Yelusale ete li gehesa hite nehanamagita nani kaga mone'ya lilube'mu nohunagi kehelilete ya'mananamofihi hapa'a keheli bati hilabe. 15 Lenali lu keheli fa keheli nehana'a hite ma bomagi enali bai nagami'i ne'ehite negi nagiga nelabe lite melilo. Yata'isi ma'asi etehi ni'ibe. Bona'i ete ya'ma kana'a bai nagami'i menelata nehabe. 16 Ya hu'ehinaya ya'ma huto nohinanalo koyapa'i lu huto huto bo Yoeliu ma lu'ehina yabe:

17 
  • Ya'ma suhi kokuluma hiti me'i hiti
  • su halina yupahi
  • li huto hiluna'mu yabe luto
  • Hu'ma lu'ehina:
  • Nani Sikalafu'nimofihi amuya'a
  • asaga boanatoga
  • molo baga iluna'mu yabe.
  • Lenali panatinimagi to patinimagi hiti
  • enali lu huto huto bona suhi lite
  • kaga lu yege halana'mu yabe.
  • To nani fato fato'na
  • neheya kola botinimagihi
  • enali enubulo li huto hiluna'mu yabe,
  • to oyafatinimagi bamu'i
  • nani hu enubulo malaluna'mu yabe.
18 
  • To ana huto
  • ya'mana yupahi asaga boana'i
  • enali nani lili'na neli netanamagihi
  • Sikalafu'nimofihi amuya'a enalitoga
  • malalube,
  • yahi nogo'ni enali babafi bana suhi lite
  • kaga'ni lu yege halabe.
  • 19 
  • Nani babeyafana fato huse'i
  • kokulumatoga ifoga
  • li huto nohuto ana huto ma afetoga
  • melugu li huto nohinogo'ni
  • golahi hiti logo hiti
  • to lokiya sopohi huto hilibe.
  • 20 
  • Nani yege li gelehe hinogo'ni
  • metepu gilibe.
  • To ikahi le'mo gelehe hinogo
  • golahi huto hilibe.
  • Ya huto asaga'na huto hu su holenogo
  • Sipi Bo kibinamofihi kana'a huto huloto
  • i besa lo baga ilibe.
  • 21  Ya hinogo boana'magi Sipi Bomofihi gi'a halana enali'i Hu'mau enele'menogo ai boana'a minalabe. Kaga lu yege holata bo Yoeliu ya'ma luto lu'ehina yabe.

    22 Lenali Isilaeli bomagita ya'ma kaga kehelilo. Nasalete bo Yesuhu kaga lu lepilube'mu nohube. Ya'mana bomofihi yato Hu'mau amuya lili'na emigo li'ehina hiti topa hose'na hiti to babeyafana hiti li huto huto lenali folagahatigu bu'ehina, ya Hu'mau ho lifi'ehina bo nohibe lite lenali bu go bati hilabe luto yabe. 23 Koyapa'i Hu'mau ai'a ekesa yigito mololoto ai ya'mana bo Yesuhi lenali lenayanugu molo'ehina yabe. To enali kaga li gofa hose bomagihi enayanugu meleletetini malipu yafalo hago fili'ehina yabe. 24 Ya hi'ahana Hu'mau ya'mana bo aku'i le'mo ho ti'ehibe. Ai gabu gigo fili'ehinana asaga'i li he'mi su ho'ehibe. Hena'mugope kene mala malauba ya'mana bomofihi gufa'alo meligo yabe. 25 Ya'ma luto Tebitiu ai kumu'i kaga mone ma luto lu'ehina:

    • Sipi Bouba asaga yupahi nubulo higo
    • bu go'ohube.
    • Ai nayahi lamaga'aga nohinago
    • nani'i ana'ina
    • moneuba nele'mo felu mehalina'mu yabe.
    26 
  • Ya'mu luto nani nipa'nigu laga nohigo
  • nani nofokehe kaga nolube.
  • Nugufa'niuba hiti hetofana'mu geba huto
  • minalibe.
  • 27 
  • Kai nugufa'ni he'mitogo
  • filise bona'magi hepatoga meminalibe.
  • To ana huto
  • lamana bomofihi gufa'a he'mitogo
  • tuguma mebilina'mu yabe.
  • 28  Kai minoba minoba hepa'i ni'inamofihi kapo'a a'nelepi'ahane. Yalo kai nani hiti moneka minalu'inauba nani nugufa'nigu laga gofa nebesilina'mu yabe. Tebitiu ya'ma luto lu'ehina yabe.

    29 Nigibo nagabose, nani ma'naka luto Tebitiu tatatimofihi kaga'a lu hokolo huto lu lepilube. Ai afiligo akeli he'ahana ai kene keli'a yatai kana'alo lali hiti ma folagahatigu ni'ibe. 30 Ya hu'ehina ai Tebitiu kaga lu yege hose bo nohibe, ai Hu'mau ma luto lu molo'ehina kaga akeheli yafa hu'ehina yabe. Nani panaka mone kai siakalo nona'a minalina kiminogo'ni kai hepa'i lilina'mu yabe. 31 Tebitiu Hu'mau li huto hilube'mu nohinamofihi hapa'a abu goloto Mesiau aku'i ho tilina kaga ma luto lu'ehina:

    • Hu'mau filise bona'magihi
    • hepalugu gufa'a he'minogo
    • meminalina'mu yabe.
    • To gufa'a tuguma mebilina'mu yabe.

    32 Ya'mana Yesuhi Hu'mau ale'mo ho ti'ehigo lali bu golototi ai kaga'a lu yege nohone. 33 Yatai ai kokulumalugu tito Hu'mamofihi yahi lamaga'aga nohibe. Ai koyapa'i afo'afu emilube ka lu molo'ehina'a huto Sikalafu'i afo'afitogati ali'ehibe. To lenali yatai bu gela kehelila nehananaya Yesu ai yatai lalitoga molo baga i letabe. 34 Tebitiu ai'a kokulumalugu meti'ehinaya, ai ma luto lu'ehina:

    • Sipi Bo Hu'mau Sipi Bo'nimofihi ma luto
    • lu emi'ehina:
    • Malo nayahi lamaga'aga minobo.
    35 
  • Ya hu'ehitogo
  • alihi fatehaka kigigusaluga
  • enele'mo melenogo bilabe.
  • 36 Ya hu'ehinagi asaga Isilaeli naga'magita ya'mananalo keheli bebe salune. Ya'mana Yesuhi lenali malipu yafalo hago fili'ehina, ai'i Hu'mau Sipi Bo le'mo lolo higo nohina ai Yesu Kilisitou nohibe luto, Pitau ya luto lu epi'ehina yabe.

    37 Asaga boana'magi ya'mana kaga kehelilete enali enelesa'ani ligo Pita hiti to luga'a aposolo pana'magitoga ma lite enoloka he'ahana: Ligibo lagabose. Ya lanago lali hena hiluta ni'ibe? 38 Pitau ka'anilo ma luto lu epi'ehina: Lenali mone'isi mone'isi komopatini i gelehe hilete Yesuhi gilo nagami'i falalana lenali foipanatini li he'minogo Hu'mamofitogati amuyana Sikalafu'a lepilibe. 39 Koyapa'i Hu'mau ka molo'ehinaya lenalitoga hiti to yagapanatiniloga hiti to asaga'i me'i foto nehana hiti, asaga'i enali Sipi Boti Hu'matifu kehe ilina bona'i ya'manana epilina'mu yabe.

    40 To Pitau fato fato kaga lu hokolo luto lu epi'ehina. Ai ma luto lu'ehina: Lenali kaba hu bati hilo. Hu'mau foipa bona'i osahi epilinagi bonatini ma bati mehana bona'i enemege'i melete enali hapa'ani li lalagi kaba hite minalo. 41 Ya luto Pitau lulago ai ka'a keheli bati hana bona'i ana yupahi nagami'i fele su he'ahana. Ya'mana yupahi bona'i nehana'alo Hu'mau molo emi'ehina 3,000 boana'i yabe. 42 Enali aposolo pana'magi kaga'ani mone'a hiti kehelilune lite amuya mele'ahana, to enigibo nagabo enehe'mola, nose'na monekolugu li nupa hite nela hite to nunumu monekolugu li nupa hilete hilata hi'ahana yabe.

    Yesutoga komopa'ani emi'ahana bona'magi minetemofihi hapa'a

    43 Sipi lili'na fato fato'i to topa hose'na hiti aposolo naga'magihi enayato Hu'mau babu luto li huto higo asaga boana'i enali be gelete enelesa'ani ligo koli hi'ahana. 44 To asaga boana'i enali Yesutoga komopa'ani neeminamagi enali hiti ho ti baga i'ahana. To asaga enali nasana'ani keheligo asaga mono bona'i li nupa hite minanamagihina lolo hu'ehina. 45 Enali fe'noha'ani bona'i neepite efahi lilete ana efa guna i eto eto lite lilata hi'ahana yabe. 46 Asaga yupahi utehi etehi moneko naga'i lolo hite sipi mono nonuga li nupa hite bilata hi'ahana, to noha'anigu nose'na monekolugu nupa hite nelata hi'ahana, to fuluna kiya yokolo'nagu minete nose'na nelata hi'ahana yabe. 47 Asaga yupahi utehi etehi Hu'mamofihi gi'a li saga hite minelata hago asaga boana'magi enugufagu bati hu'ehina yabe. To asaga yupahi Sipi Bouba boana'i luga'a enubuto bito enali folagaha'anigu molo emilata higo boana'i babu lu'ehina yabe.

    Copyright information for `BEF