Acts 21

Polu Yelusale hepatoga bu'ehina

To lali ana bona'i enebe tigito he'mi epoloto botigu tito buto buto fu lu'ehina kapo molototi Kosu metoga neheti'ohune. To etehi anagati he'mito buto Lote metoga nehetito anagati buto Patala metoga neheti'ohune. Anaga limito fato boti Fonisia hepato bilina boti sa sa huto bu goloto ana botigu tito bu'ohuta yabe. Ana botigu buto buto Saipalasi hege nagamilugu ti'ehina metoga sofo kegi'a ni'igo bu goto bege ligito buto Silia kapoga buto Taiya hepatoga neheti'ohuna. Fe'nohi anaga botiguti li he'milune lite nehetibe. To lali anaga Yesuhi ka'a kehelise bona'i sa hutoti enali hiti yegegu 7 ya'ma kana'a mino'ohune. To enali Hetofa Sikalafu'uba lu epigo Polu kumu Yelusale hepatoga mebubo lite amuya melete kaga lu emi'ahabe. To ya'ma li nupa hu'ohunamofihi kana'a su hago anagati he'mito buna yupahi enali asaga'i liha'ani hiti yagapana'ani hiti lele'mete bite to hepa'i he'mite lele'mete nebago lali asaga'i moneko'na nagami beletoga kehetoga lahupa nohi fito nunumu hu'ohune. Yalo lali minoloto ai be tigigo ai be tigigo huto botigu notugo enali aku'i hepa'aniga bifa hi'ahabe.

To Taiya hepatogati he'mito buto Tolemesi hepato nehetito anaga neminana bonati Yesuhi kaga'a kehelise nehanamagihi enebe tigitoti enali hiti minoto moneko yegegu ko'ohune. Koloto etepo anagati he'mito buto Sisalia hepatoga nehetito kaga lamana'a lu epilata bo, gi'a Filipi yabe, ai'a noha'agu ti'ohune. Ya'mana bo koyapa kanagu Yelusale hepalugu mono bona'magi ai'a hiti to lalu'afu 6 enali hiti enele'mo ho ti'ahana. Ai pa'a yafana'i loebe loebe ana hite Hu'mamofihi kaga'a lu yege hose nehana enali anaga mine'ahabe. 10 To lali ana bomofihi hepalugu loe yupahi nominogo huto huto bo moneuba gi'a Agabasi Yutia kapoguti o'ehina. 11 Ai lalitoga oto Poluhi leti'a liloto ai'a yaha gigusa'asi ana letitu sa nogito ma noluto lu'ehina: Hetofa Sikalafu'uba ma nolibe, Yelusale hepatoga neminana Yuta bona'magi ya'ma letimofihi afo'afumo ya'ma hiti sa gi ule'ale hilete naga'i ite fegutoga bonatoga le'mete bilabe. 12 Ya ligo lali hiti to ana hepato bona'i asaga'i ya'ma kehelite Poluhi amuya melete buka tite Yelusale hepatoga mebubo lu'ohune. 13 To Polu ma luto lu limi'ehina: Lenali henabe lite yibi gofa nehite nipa'nigu nagabu'i gito le'mo sibina nehabe? Nani Sipi Bomo Yesu kumu Yelusale hepatoga naga'i nimilafi noho fililafi nani ya'mana bati huto yabe luto nokehelube. 14 Ya luto ligo lali kaga lu emuta ya huto amuya nomalago o'e luto mekeheligo lali he'mito: Ana Sipi Boti molo'ehina'a huto huto hino, luto lu emi'ohuta yabe.

15 Ana hepato kana mone'a minototi lali fe'nohati li nupa huto anagati he'mito kapogu moloto Yelusale hepatoga bu'ohune. 16 To Yesuhi pana'alobo mone'amagi Sisalia hepa'i bona'i enali hiti lali hiti bu'ohune. Enali lele'mete bilete Saipalasi kegi'ati o'ehina bo, gi'a Masoni ai'a noha'agu kalabe lite ai koyapa'i hapi fi'ehinaguti Yesuhi mege'i molo'ehina bo, ai nopogu bu'ohuna.

Polu Yemesihi fo tula hu'ehina

17 Yelusale hepato nehetugo anaga nemina bonatimagi lebe tigite soso hi lete'ahana. 18 Kolototi etehi Polu hiti Yemesiu nohinaga bu'ohune. To mono bona'i olopa enali hiti analo mine'ahana. 19 Polu enebe tigito'a kaga'a asaga'i lu epito ya'ma Hu'mau fegutoga bona'i hetofa hu epolo'ehina'a ya'ma Poluhi foya'a li'ehina'mu asaga'na yamofihi kaga lu epi'ehina yabe. 20 Enali asaga'i ya'ma kehelilete Hu'mamofihi fokehi li'ahabe. To Poluhi kaga ma lu emi'ahabe: Lalalutiga, kehelibo. Ya'ma Yuta bona'magi samahi tite Yesuhi naga'i lolo hi'ahabe. To enali koyapa keya kamu'i amuya melete ule'ale hite mege'i melelata nehabe. 21 Fato bona'magi kai kumu ma nelabe: Kai fegutoga bona'magihi hepatoga neminana Yuta bona'momu'i Mosehi mono'i keya ka lu'ehina'a he'mito lu'ahane lite nelabe. Kai panatini Hu'mamofihi keya'a suhi huto enugufa laga mehilo to Yuta bona'magihi hapa'ani he'milo luto lu'ahane lite nelabe. Enali ya nelago maga nehana Yuta bona'i akeheli'ahana yabe. 22 To kai yatai maga o'ahatamo enali kehelilanagi hena hilane? 23 Lali lu kimiluta'a hubo. Mafi. Lalitoga bomagi loeyagi loeyagi Hu'mamofihi gi'a hoto kaga melete oka'ani laga mehi'ahabe. 24 Kai enalitoga buloto hepiletogo moneko'na hite mono nonugu tite Yuta bona'mofihi kuguhi go epi'ehilana komopa'ani le'mo bati hilata suhi hite enali oka'ani laga hilabe luto salamana galana'ani mina fi etobo. Ya huletogo asaga bona'i kehelilete kai kumu faga li'ahana lite ai Polu ya'ma Mosehi keya ka mege'i nomalabe lite kehelilabe. 25 To ya'ma fegutoga bona'i Yesuhi ka'a mege'i nemalana bona'magi kumu lali fayahi goloto ma ka moloto alu epi'ohune. Lenali kuguhi go epi'ehilana yagamo ya'ma fele hitalo mele'ahana'a ya'ma menalo. To golapo menalo. To lubaha'a li polo hu fili'ehina yaga menalo. To moko mehite kaba hilo. Ya'ma ka asaga'i fayahi goto alu epi'ohuna yabe. 26 Enali ya lago Polu etehi ana loebe loebe bona'i enele'moto buto kuguhi go epi'ehinamofihi nasana ya'ma li'ehina. Ya huloto sipi mono nonugu tito ya'ma kuguhi go epi'ehilanamofihi su halina kana'a ya'ma bona'mofihi kuguhi moneko moneko'isi epila Polu lu epi'ehina.

Sipi mono bona'i Poluhi naga'i emi'ahana

27 To ana kanagu 7 yege yupahi su halube'mu nohigo, Yuta bona'magi Esia kapoguti e'ahana enali Poluhi sipi mono nonugu nohigo be gelete asaga li gehesa he'ahana boana'magihi kenasabo bi epelete Poluhi nu nekite kehe ite ma labe: 28 Oho, Isilaeli bona'ise. Mele'isi ete lehe'malo. Ya'ma bouba asaga hepato bona'i enele'mo keheli sibina hulata bo yabe. Lali Yuta bona'i lemege ka luto to lali mono'i he'mito fato ka lu yege hoto to mana sipi mono nohatimomu'i sibi ka lu epito nohina bo yabe. To ai lu laga hu'ohuta suhi huto mana sipi mono nohatigu fegutoga bona'i enele'moto tito ya'ma nopo le'mo foipa hibe. 29 Enali Polu Efeso hepa'i bo mone gi'a Tolofimu ai hiti tauniga nohi hepalugu neha'igo be ge'ehite enegekesa kehelite Polu ana bomo sipi mono nonugu le'moto ti'ehifiye? lite kehelite ya li'ahana. 30 Ya nelago ana olopa hepato bona'i asaga'i kehelite hololu lite li nupa hite Poluhi nu kite le'mete mono nonuguti kefefe hite limilago mele'isi ya'ma sipi mono nohi kafe gi'ahabe. 31 To enali Poluhi ho fililune'mu nehago Lomu gimi bomagihi kaba'ani bo Yelusale hepatoga sipi luba nehabe lite lu emigo keheli'ehina. 32 Kehelito ana'asi ai gimi bo luga'a hiti to kaba'animagi hiti enele'moto hololu luto li gehesa nehanalo enele'mago enali hololu lite li gehesa nehanalo limite neheti'ahana. To boana'magi ya'ma gimi bomagihi kaba'ani bo hiti to ai'a gimi bo'a hiti be gelete Poluhi osahi halune'mu hanamo he'mite fa'mene mine'ahana. 33 To gimi bomagihi kaba'aniuba buto Poluhi naga'i emito seni naga'i loemotu sa gibo luto gimi bona'magihi lu epito le'mo'ehibe. To boana'magihi ma luto enoloka habe: Ya'ma bo ki'afube? To hena hu'ehibe? luto enoloka ho'ehina. 34 Enoloka hago enalitogati moneuba ai fato ka ligo ai fato ka ligo nehite enubugu fite lubamofihi hapa'a mekehelise nohuto gimi bona amuya nopogu le'mete bilo luto bona'a ya lu epi'ehina. 35 Enali le'mete bite to nohi haka tilune'mu nehago asaga bona'i enemege'i bite ho fililo lite enipakafa nehite hekele lite neligo yana'mu gimi bomagi Poluhi nu nekite le'mo saga hite bi'ahabe.

Polu luba hilune'mu nehana'amagihi kaga lu epi'ehina

37 To ana gimi bomagihi amuya nopogu le'mete tilune'mu nehago Polu ya'ma kaba bomo ma luto lu emi'ehina: Nani ka mone lu kimiluna bati hifiye? Ya ligo kaba bouba loka ho'ehina: Giliki ka keheli'ahapihe? 38 Kai ya'ma Iyipi bo nohapihe? Ya'ma Iyipi bo gimi bo'a 4,000 ka hepatoga enele'moto buto gamanimagihi luba hilune'mu nehite enele'moto bu'ehina bo kai ya'ma nohapihe? 39 To Polu ma luto lu emi'ehina: Nani Yuta bo Silisia kapogu Tasasi hepato olopa nohi hepato yanugu ito'nifu neketo'ehina. Nani ya'ma li gehesa nehana'amagihi kaga lu epiluna bati huto ni'ifihe? 40 Gimi bomagihi kaba bo: Alubo luto, ligo Polu hakalo minoto yaha'a li saga higo to enali kaga lege'nago ai Hibulu nogoguti ma luloto lu epi'ehina:

Copyright information for `BEF