Acts 23

Polu kanisolemagi enubugu bu go fiya i'ohuto ma luto lu epi'ehina: Nalalu'nimagita. Nani ana'ina mone li sibina mehuse Hu'mamofihi bu'alo kapo molomofa'na huto nugufa'nigu laga higo minomo tito tito yatai hiti ana nohube. Ya luto noligo sipi mono noto kaba bo Ananiasi ai Poluhi bufalo nehana bona'i kaga nolina baga i gofa halo luto lu epi'ehina. Ya ligo Polu lu emi'ehina: Kai helegu'i gupisa'alo fayahi ge'ahana suhi huto nohane. Hu'mau kai kabaga i gofa halinamo ni'ibe. Kai yalo nohuto keya kauba lu'ehina'a huto nani'i kaga'ni loko nohataya ana keya ka kaika li gofa nani'i nahalo luto enogo'na nobine. Ya noligo Poluhi metoga nehana bona'magi ma lite lu emi'ahana: Kai Hu'mamofihi sipi mono bo'amofihi ka bati mehina'a lu eto'ahane. Polu ka'anilo nona'a lu'ehina: Nalalu'nigita ai sipi mono bo nohibe luto nani mekeheli'ohube. Mono kauba ma luto lulata nohina: Kai bonakamagi kaba bo'animofihi kaga foipa'a melu etobo.

To luga'a kanisole bo Satusi yagi to luga'a kanisole Felosi yagi hite Polu bu enogoloto ai kehe ito ma luto lu epi'ehina: Nalalu'nigita. Nani afo'nifu Felosi bo nohigo nani'ni hiti ana huto Felosi bo nohube. Nani bona'i fililete aku'i ho tilana kaga'a lu noepuna ana kagamu'i lite lenali yatai ka foya neli netabe. Ai ya luto lulago ana'asilo mele'isi Felosi bona'i hiti to Satusi bona'i hiti kenasabo bi lumala hilete loko hi'ahana. Hena'mugope Satusi bona'magi bona'i fili'ahanaguti aku'i ho metilabe nelite to agelo hiti fele hite menehabe nelago to Felosi bona'magi yanana ni'ibe lite kehelilata nehana'mu yabe. Enali akehelilete kehe kehe inanauba sipi higo kenasabo bigo keya ka enelepise bo Felosi nagaluguti luga'a ho tilete ka epekite ma lite li'ahana: Lali ma bouba ana'ina mone li sibina hu'ehinamofihi kaga hapa'a mekehelune.

10 Kenasabo binanauba napa huloto luba huse huse hago gimi bomagihi kaba'aniuba Poluhi yahi luga luga lite li gepe hilana'mu yabe luto keheli'ehina. Ai ya huloto gimi bo'a bona folagaha'aniguti limite Poluhi le'mo saga hite gimi bomagihi ule'ale noha'anigu le'mete bite malalabe luto enoho lifi'ehina.

11 Ana folugu'i Sipi Bouba Poluhi metoga ho tito nohuto ma luto lu emi'ehina: Kai koli mehuto amuya kekesa molobo. To koyapa'i ma Yelusale hepato nani kumu kaga amuya moloto lu epi'ahata suhi Lomu hepato buto ana huloto lu epibo.

Poluhi ho fililune lite Yuta bona'magi ka lu keheli'ahana

12 Eteka'a Yuta bona'i li nupa hite ka lu keheli'ahana. Ya hite nehite, nose'na mo sito minoto Poluhi ho fililototi nalune lite enogolagalo enayahi ti'ahana. 13 Ya'mana kaga lu kehelina bona'i li nupa huto 40 magihi yabe. 14 Ya lilete enali mono noto kaba bo hiti olopa bona'i hiti nehanalo bite ma lite lu epi'ahana: Lali nose'na mo sito nohuto Poluhi ho fililotigo yabe luto logolagalo layahi ti baga iloto noone. 15 Ya nohutagi yatai lenali hiti kanisole bona'i hiti Poluhi le'mete limite limilo lite Lomu gamani bomofitoga kaga malalo. To ai oloto kaga hapa'a aku'i lu bati huto lu limilibe lite mi'i malalo. Lali kofohi moloto kapogu gimi gi'ohuto ho fililuta'mu yabe.

16 Ya lite nelago Poluhi etali'afihi pana'auba akeheliloto gimi bomagihi ule'ale nonugu buto Poluhi lu emi'ehina. 17 Ya ligo Polu gimi bo mone kehe ito ma luto lu emi'ehina: Ma neheya kola pana'uba kaga mone lito o'ehinagi kai le'moto buto gimi bomagihi kaba'animofihi emitogo ana kaga lu emilibe. 18 Ya luto ligo ana gimi bouba ana pana'i le'moto buto gimi bomagihi kaba'ani nohinalo ho tiloto lu emi'ehina: Ma pana'uba kaga kai'i lu kimilibe luto Polu nagalugu nohina bouba nani'i noloka hago le'moto noobe. 19 Ana kaba bouba ana pana'i yato lito le'mo sugunaluga buloto loka ho'ehina: Kai hena ka lu nimilube'mu o'ahane? 20 Ya ligo neheya kola pana'uba lu emi'ehina: Enali Yuta bona'magi kai'i ete koloka hete Poluhi le'mete kanisole bonatoga limilune lite li'ahabe. To kanisolemagi Polu lu'ehina hapa'a mone'a hiti keheli bati hilune nelabe lite ete gimi'i malalune li'ahabe. 21 Ya li'ahanagi kai ka'anilo mekehelibo. Hena'mugope? Ai'i ho fililune lite luga'a bona'i 40 magihi kapogu kofohi moloto gimi gilune li'ahabe. To enali yatai kai o'yo lilapi lite kegeba hite ka lilata ka kehelilune'mu nehabe. 22 Ya luto ligo gimi bo kaba'aniuba ana pana'i ma luto amuya kaga lu emito ekesa bito ho lifi'ehina: Ya'mana kaga nani oto lu huto hu emi'ohube luto mone bomofihi lu meemibo.

Gamani bo Felikiu to Poluhi le'mete bi'ahana

23 Ya huloto gimi bomagihi kaba'aniuba loe gimi bole kehe iloto ma luto lu etimi'ehina: Gimi bo 200 yamagi enele'mo loloba nehite hosi yaga gupisalo bo 70 yamagi neenele'mete to hiso bo 200 yamagi enele'mete utehi sininugu Sisalia hepato bilabe. 24 Lenali Polu minoto bilina hosi yaga luga'a neli etete kaba hu bati hi etete le'mo bati hite sipi gamani bo Felikitoga le'mete bilo. 25 Yana bouba fayahi mone ma luto ka go bu'ehina:

26 Gamani bo Felikio. Nohapihe? Nani Kolotiasiu Lisiasiu ya'ma fayahi nogo ketobe. 27 Enali Yuta bona'magi mana bo yato lilete ho fililune'mu nehana nani ai ka'a keheli'ohuna ai Lomu bo nohigo nani hiti gimi bo luga'a hiti olototi le'mo buto bi'ohune. 28 Enali henabe lite fisa nei etafi luto nani kehelilube'mu ana bo le'moto enali kanisole'anilo limi'ohube. 29 To ai ana bouba ho filise'nafi nagalugu le'mo molose suhi huto ana'ina mone li sibina mehu'ehigo nani bu go'ohube. Enali Yuta bona'i keya ka'anilo kaga li sibina hu'ehibe lite fisa ite lokasigo he'ahabe. 30 Enali ya'mana bo ho fililune lite suguna kaga mone li'ahana yatai huto nohigo keheliloto'ni kaitoga mele'isi ho nofulube. To enali fisa neina bona'magi kai kubuloko lu huto hite yana'mu luto fisa noune lite lu kiminogo kehelilane.

31 Ya luto fayahi go epina hiti gimi bomagi lilete ka'a liyafa hite Poluhi le'mete folugu'i Atipatili hepato bi'ahana. 32 Eteka'a melugu kapo malana gimi bomagi aku'i i behe hite kapoguti neago hosi yaga gupisalo minete bana bomagi le'mete moneka hepato bi'ahana. 33 Enali Poluhi Sisalia hepato le'mete bilete ai hiti faya hiti gamani bomofihi emi'ahana. 34 To gamani bouba ana fayahi leka soloto: Kai hiya kegi'a bo nohane luto Poluhi loka ho'ehina. Ya higo: Nani Silisia bo nohube luto Polu lu emi'ehina. 35 Ya ligo gamani bouba lu emi'ehina: Enali kifisa neina bona'i henetilenogo kai kagaka kehelilube. Ya luto luloto Helotihi gamani nonugu nagalugu he'mi etete gimi bomagi kaba hu etalo lu'ehina yabe.

Copyright information for `BEF