Acts 26

Polu Agilipaha bulo ka'a lu hokolo hu'ehina

Ya luto ligo Agilipau Poluhi ma luto lu emi'ehina: Kai nani nubulo kagaka alubo. Ya ligo Polu yaha'a li saga huloto ma luto lu epi'ehina:

Kibina bo Agilipao. Yatai kai kubulo kaga'ni lu hokolo huto negelo bito lu kimilube'mu nohube. To enali Yuta bona'magi nifisa neina kaga lu kimiluna'mu yabe. To Yuta bona'magi hapa'ani hiti to enali enoloka helata nehanamofihi kai keheliya i'ahane. To nalalu'niga kai kaga'nilo kosele'i mekehenogo kehelito minobo.

Asaga Yuta bona'magi nani koyapa'i neheya bo mino'ohunamofihi hapa'ni akeheli su he'ahabe. To nani me'nigu minoloto'ni alihi Yelusale hepato bula ola huto mino'ohunamofihi hapa'ni akeheli'ahabe. Enali nani'i koyapa'i keheli nete'ehitemo lu hokolo hu kimilabe. Nani koyapa'i yata'a Felosi bona'magihi hapa'ani lito mino'ohuna ya'mana suhi keheli'ahafi fulu huto meni'ibe. Ai asaga mono katimofihi hapa'a hoto ni'ibe, lite lu kimilabe. To nani yatai maga ho ti'ohugo nifisa ite ka foya neniminamofihi hapa'a ma huto ni'ibe. Koyapa'i Hu'mau tatatigihi kaga molo epolo'ehinamofihi mana'a huto hilibe luto'ni nani geba hu'ohube. Enali nayahi luga luga su hoto nigigusagati loemo heleko malago nagatimagi utehi etehi Hu'mamofitoga nunumu nama lite minete komopa'ani aitoga amuya melete emite ananamofihi nogo geba hite mine'ahana yabe. To kibina bo'nimaka, nani'ni hiti anana'mu luto komopa'ni emito geba hu'ohunana'mu lite Yuta bona'magi yatai nifisa neibe. To lenali Yuta bona'i henabe lite Hu'mau fili'ahana bona'i enele'mo ho metilibe lite lenegekesa nekehelibe?

Koyapa'i nani'ni asaga suhi li huto huto Yesu Nasalete bomofihi gi'a li melugu malalube luto asaga negekesa keheli'ohuna yabe. 10 To nani ya'mana suhi Yelusale hepalugu ali huto hu'ohube. Mono noto kaba bona'magitogati kaga liloto'ni Hu'mamofihi bona'a babu lito nagalugu enele'mo mologo alihi enoho nefiligomo nani bati hite nugufagu laga hina suhi nehabe lulata hu'ohuna yabe. 11 Nani babu yupahi Yuta bona'magi li nupa hite minelata nehana nonugu posa gito enayato lito naga osatu enibi yigiloto Yesutoga komopa'ani neemina he'milafi luto naga'i epi'ohuna. Enali kumu luto nani nitaluga logo bilata higo fato fato hepato foto'i nehanalo enegene mane ito enoholata hu'ohuna yabe.

Polu Kilisitohi bona'a lolo hu'ehina kaga lu hokolo hu'ehina

12 Ya'mana suhi hilube luto mono noto kaba hulata bomagi buto ana suhi li huto hubo lite noho lifigo Tamasiko hepalugu ti'ohuna. 13 Kibina bo'nimaka, fuligaha kanalo nani kapo moloto notugo kokulumaguti fana mehenauba yege hoto limito nani'ni hiti to nemege'i melete bana bona'i hiti nohutalo lusina huto fi besa lo'ehina yabe. 14 Ya higo lali asaga'i melugu limito ko gehesa hulototi nani nogo mone ma luto Hibulu nogoguti ligo keheli'ohube: Solio, Solio. Kai hena hibe luto nani'i negene mane ito nonahane? Kosa kosa'namofihi kigigusatu'i noita kaika kugufakagu limo fito kugufamofihi gabu foya noemine. 15 Ya luto ligo ana nogomofihi ka'alo nona'a nani ma luto lu'ohuna: Sipi Bo'ni, kai kiyi'agabe? Ya luto Sipi Bouba lu'ehina: Nani Yesuita negene mane ito nonahata bomofita nolube. 16 Ya nohunagi kai ho tito ho ti fefe lubo. Kai kele kele pana'ni lolo huto yatai kubulo hu'ehinana hiti to alihi kubulo hilinanamofihi luga'a bonatoga lu yege halane luto nani kaitoga kubulo hu'ohube. 17 Isilaeli bona'i hiti to fegutoga bona'i hiti enali folagaha'anigu koho lifinogo'ni bita bonatogati nani kele'mo kubuto biluna'mu yabe. 18 To kai enubu'ani li gili gili huto metepunaguti fana mehenagu enele'mo nomoloto Sataha amuya'aguti Hu'mamofihi kapo'agu enele'mo malalane. Ya hitogo enali komopa'ani nanitoga niminogo foipana'ani kele li epelenogo Hu'mau enele'mo eto higo nehana bona'magi folagaha'anigu hepa'ani lilabe.

Polu mono foya li'ehinamofihi kaga'a Agilipahi lu emi'ehina

19 Kibina bo, Agilipao. Nani ya'ma luto kokulumaguti nubulo hinamofihi ka'a pelesa mei'ohube. 20 Nani yata'a hapi fito Tamasiko hepa'alugu bona'i lu epiloto'ni alihi Yelusale bona'i lu epiloto to asaga Yutia kegi'a hepa'i ni'inalo ni'inalo lu epimofa'na huloto'ni to ana huto fegutoga bona'i hiti ma luto lu yege ho epi'ohuna: Lenali foipa fato fato suhi nehanamofihi he'mi su helete Hu'mamofitoga i behe hite bilete hetofa sunogo hite bona'i enubulo minalanauba mana'a huto hilibe. 21 Nani ya'mana suhi hunana'mu lite Yuta bona'magi mono nonuguti nayato lite noho fililune'mu hi'ahana yabe. 22 Ya hana ya'mana kana'agu Hu'mau nehe'molata higo mino'ohuna. Ya'mu luto nani maga ho ti'ohuto bona'i lagaso'afi to napa'afi mone'ago hite nehanamagi enubulo nani kaga'ni lu noepube. Ma noluna kagaya koyapa'i kaga lu yege hose bomagi hiti Moseu hiti huto hilibe lite li'ahana'a nani ana huto lu noepube. 23 Ai Mesiau gabu foya lito fililoto ai yata'a kohe to letoto kene keliguti aku'i ho tilina'mu yabe. Ai Yuta boti hiti fegutoga bona'i hiti ya'ma lubuto bise'namofi hiti mino fana toto minosemofihi kaga'a lu yege ho epilina'mu yabe lite li'ahabe luto Polu lu'ehina yabe.

24 Polu ya luto kaga noligo Fesitasiu bunepa ito amuya kaga ma luto lu emi'ehina: Poluo. Kai negi nohane. Kehelise'nakauba kekesagu bai toto kele'mo negi nonago negi kaga nolane. 25 Ya ligo Polu kaga'alo nona'a ma luto lu emi'ehina: Sipi bo, Fesitasio. Nani negi nagi meno'ohube. Nani nekesa'ni ni'igo ma'naka luto nolube. 26 To kibina bo, Agilipao. Kai ya'manana asaga'i keheliya i'ahata'mu luto nani koli mehuse amuya moloto kaga lu nokumube. To ya'manana fala kito sugunaluga huto mehu'ehinagi kai asaga'i yege yege'i huto hu su ho'ehinana akeheli bati hu'ahane. 27 Kibina bo, Agilipao. Koyapa'i ka lu yege holata bomagi li'ahana kaga keheli'ahata ni'ifihe? Nani nekesa nokeheluna kai akeheli'ehilata'mu yabe. 28 Ya ligo Agilipau ma luto Poluhi lu emi'ehina: Yatai hupamone kana'asilo nani'i Kilisitohi bo nele'mo lolo hilube luto kai nokehelipihe? 29 Ya ligo Polu ma luto lu'ehina: Hupamone kanafi yatama kanafi ya bati huto ni'ibe. Ya hu'ehina nani nunumu'ni Hu'mamofitoga ma luto ni'ibe: Kaika hiti to asaga bona'i yatai malo kaga'ni nekehelinamagita nani suhi lolo hilabe luto nokehelube. Ya hu'ehina ma seni naga'i lenalitoga meminalibe luto nokehelube.

30 Polu ya luto lulago ya'ma kibina bouba gamani bona'a hiti to Benisi hiti ho tilete nonuguti fegutoga limite ma lite lu keheli'ahana: Ya'ma bomofihi ho filila to nagalugu le'mo molola hilutana mone li huto mehu'ehibe. 32 Ya hilete Agilipau Fesitasihi ma luto lu emi'ehina: Ya'ma bouba Lomu gihiti bo Sisa ka'ni kehelilibe luto kehe meitita lali gulu ho etonogo bitita'mu yabe.

Copyright information for `BEF