Acts 27

Polu botigu tito Lomu melugu bu'ehina

1Botigu tito Itali hepalugu bilune lite enali lu bati hilago Poluhi hiti to luga'a nagalugu nehana bona'i hiti Yuliasiu Lomu gimi bomagihi kaba'ani ai ya'ma sipi gihiti bomofihi luba bona'amagi yabe lite enigi helata hanamagihi enayanuga bi'ahana. 2Boti mone Esia hege nagamilugu bilube'mu Atalamiti hepatoti nohinagu lali buto tiloto nobuto anagu Alisitaka, Tesalonika metogati Masetonia hepato bo nohigo moneka bu'ohuta yabe. 3Ya huloto eteka'a Sitoni hepato neheti'ohuta. Ya'ma gimi bona'i kaba'ani Yuliasiu Poluhi le'mo laga huto'a ai lalu'agita ete be tigite ana'ina'amu muhi nobilina emilo luto lu epi'ehina. 4Yaloti ho tito nobunogo habahuba losopagati boti li kose'na hina'mu luto Saipalasi nagamilugu me'mo ti'ehinalo kegi'a habahi menolina sopaga i molo i molo huto bu'ohuta yabe. 5To Silisia hiti Pamifilia hiti hege nagami mupa'a i gofa hoto Lisia kegi'a Maila hepato neheti'ohuta. 6Ya hepatoti gimi bomagihi kaba'aniuba boti Alekasatilia hepatoti Itali metoga bilube'mu nohinagu lele'mo molo'ehina yabe.

7Hege nagami'i nobiligo habahuba hiti lito luna higo botiuba fulu fulu huto bigo ya humo nobunogo loe lugufa kana'a li he'munogo kosele kasele gofa loholago alihi Naitasi hepa'mofihi mula kegi'a neheti'ohuta. To habahuba felele mehuse'na higo ana kegi'a bu yatama mehuse Kiliti nagamilugu me'mo ti'ehinalo ni'ina kegi'a habahi melinaloga boti li moloto Salomone Nekisa be ligito bu'ohuta yabe. 8Hege nagami'uba bilito gofana'a higo kapo bilutana'mu huloto hege nagami beleha'aga boti li molo li molo huto Enubuto Bilata Hisa yabe lite gi'a helata nehana Lasia hepa lebato neheti'ohuta yabe.

9Ana hepatoga babu kana minonogo hege nagami'i babu lito bililoto muyagu tigo ya'mu luto kapo mebiluta suhi higo analoko nohunogo Yuta bona'magihi sipi yupapo foipana'ani kele li'ehina yupahi alebe ligi'ehina. Ya higo Polu ma luto logo go epolo'ehina: 10Ma bose, hege nagami'i lusina huto biliba biliba huloto asaga fe'no hiti boti hiti ho fi tenogo bona lugufa he'mi su haluta suhi nohigo nani bu nogobe. 11Ya lina kaga gimi bo kaba'aniuba mekehelise boti afo'afu yagi to botilo nolina bo yagi etali la'ina kaga'atiti loko keheli bati huto mino'ehina yabe. 12Boti melelata nehana hisalo yasi yupahi bati huto meminose hepa'i ni'inago hege nagamilugu boti li moloto babeyafa huto Finikisi hepato nehetiluta bati hilifi lite babu bona'magi li baga i'ahana. Boti melelata nehana hise Kiliti ni'ina ai layahi yoga'aga bu hu nomoloto si'a layahi lamaga'aga hu molo'ehinago yalo bati huto yasi kana'alo minalupi lite li'ahana yabe.

Hege nagamilugu sipi habafahi li'ehina

13To yofo kegi'ati fulu fulu yasi ligo enali li'ahana suhi hilune'mu hilete botiguti ketana he'migo hege nagamilugu limito ni'ina li bilite botigu li melelete Kiliti beletoga boti li mele li mele hite bilune'mu hi'ahana. 14Ya nehago ana'asilo mele'isi yege notina kegi'ati sipi habafahi lito nagamilugu me'mo ti'ehinanagati limi'ehina. 15Ya huloto boti oto ana habahuba li kule kule higo ana habahi ilaga huto mebiluta'a higo ya hunipa ya hunipa huloto he'munogo ana habahuba fa'mene lele'moto bu'ehina yabe. 16Layahi soga'a kegi'a Kota lagaso me'i ti'ehinanamofihi be ligito nobuto habafaha nohi nesi'a limi'ehina. Ya higo kapo bilutana'mu huloto sipi botimofihi lagaso boti'atu le'mo buto bi'ohuta yabe. 17Enali lagaso boti kefefe hilago hehe hilete sipi botimofihi sopa'aga nagatu'i amuya melete gi ule'ale hi'ahana. Libia hege nagami beletoga buto kehelugu fi pota gilupi lite enelesa'ani gofa ligo koli bena hilete sipi botimofihi habafaha noha'a li koyofo hilago habahuba ai'a enele'moto bu'ehina. 18Italuga logo bina habahuba amuya moloto liba liba higo eteka'a sipi botigu ni'ina fe'nohi ga ilegete nagamilugu li he'mi mele mele hilete, 19ologo'a sipi botimofihi nasana asaga'i enayatu lite nagamilugu he'mi mele'ahana yabe. 20Ya hilago babu kana'agu yege okaba'a sonofi'i okaba'a hiti bu mego'ohuta yabe. Ya'ma kokulumagu sopopotu fi hekini lo'ehinagi biluna kapo'a bu mego'ohune. To sipi habafapogo babu lito liba liba huto mino'ehina yabe. Ya higo lugufati lubuto bito meminaluta supo nohibe luto kehelune.

21Babu kana'agu nose'na mo site minago Polu folagaha'anigu ho tiloto ma luto lu epi'ehina: Ma bomagita, lenali koyapa'i nani lu lepuna kaga liyafa hite Kiliti hepa'i he'mite meatita ya'ma huto ketana li lugufalo memolola to babu fe'noha'ani meminigila hitita'mu yabe. 22Ya hu'ehinaya nani yatai lu nolepube, lenali lenugufatinigu fulu bati hino. Hena'mugope bo mone meminigilina ma botigo li sibina huto minigilina'mu yabe. 23Nani Hu'mamofihi lalu'afita nohuto'ni asaga yupahi komopa'ni aitogago emito minolata nohuna bo nohube. Ya'mu luto yatai folugu'i Hu'mamofihi agelo'auba nani nemetoga ho ti'ohuto ma luto lu nimi'ehina: 24Poluo, kai kelesa melinogo koli mehuse. Ya'ma sipi bo, Sisahi bulo buto ho tilana'mu yabe. To kai kehelibo. Asaga bona'i ma sipi botigu nehana enali'i Hu'mau kai'i akimi'ehibe. 25Ya luto lu'ehinagi nalalu'nigita lenali asaga'i lenelesa melinogo koli mehilo. Hena'mugope Hu'mau lu nimi'ehina'a huto hilina'mu yabe luto nani komopa'ni aitoga emito nohube. 26Ya'mu luto lali hololu luto butoti me'i ti'ehinana mone ni'ilinaga minose gilune.

27To nayahi luga luga su holoto nigigusagati loegi loegi hele ko malana yagi folugu'i botiuba Metitelia hege nagami folagaha'agu haya koloto bu'ehina. Ya nohigo folugu kana folaga talaga nohigo botilo kaba bomagi botiuba hege nagamilugu me'i mone ni'ina lebato nobigo be ge'ahana. 28Ya hilete enali nagato sipi gela'a hiti'na naga ilete nagami hefunugu he'mi etago limilete bu gana ana hefuhi supa noto emagu'na minago nesi kana'a minoka hilete aku'i ana suhi hite bu gana nesi'asi sebaya toka hu'ehigo be ge'ahana. 29Botiti efatoga buto ibe tele bibe hilifi lite enelesa'ani gofa ligo ya'mu lite yatama naga'i loegi loegilo keta'a hiti'na naga ila ila hilete botimofihi megesa'agati he'migo hefunugu limilago go'i mele'isi lilibe lite numuna hi'ahana. 30Ya nehago botigu lili'na lite humofa'na hilata nehana bomagi i fenene hite koli hilune lite lagaso boti hefunugu he'migo limilago babeyafa suhi lite sipi boti golaga'agati nagato keta'a hiti'na naga inogo hefunugu limilina suhi hila ya hila hite akili akili mine'ahana yabe. 31Ya nehago Polu bu enogoloto gimi kaba bomofihi to bona'a hiti ma luto lu epi'ehina: Enali botigu kaba hite humofa'na hilata nehana bomagi ma sipi botigu meminalana lenali lenugufatini li lenubuto mebilana'mu yabe. 32Polu ya luto lu epigo gimi bomagi sipi botilo naga i'ahana naga'i ho laga hu he'migo boti nagami mupa'alo bu'ehina.

33Go'i alilube'mu go kulu kulu notigo nose'na mo site minana bona'i nose'na luga'a nalo luto Polu ma luto enogo'na bi'ehina: Lenali 14 yegegu habafahi su halifi lite geba geba hite minete ana kana'agu nose'na mo site menose mine'ahabe. 34Ya'mu luto nalalu'nigita lenogo'na nobunagi nose'na no lenubuna hete yalo lenali bati hilabe. To latahatinigu okatini mone'isi i tegiloto fenene mehilina'mu yabe. 35Polu ya luto luloto beleti nose'na lito asaga enali enubulo Hu'mamofitoga fokehi ho emito nunumu huloto li pata sito nalube'mu hu'ehina. 36To enali ka'a keheli emite enugufagu laga higo enali silaga'i nose'na no baga i'ahana. 37To botigu asaga'i mino'ohuta asaga'i leka soto li nupa huto bu gota 276 bona'i mino'ohuta yabe. 38Asaga bona'i nose'na no baga ilete aliha'a legeya nose'na luga'a botigu mele'ahana hege nagamilugu he'milago bi bi hilago boti keta mehuse hu'ehina yabe.

Boti tele tulu bi'ehina

39Botigu kaba hite humofa'na hilata nehana bomagi etehi go'i noligo ya huto hege nagami beletoga nootagi lite bu go bati mehi'ahana. To benebehi ni'inalo sibilipa homo mololata nohina ni'inago analo bati hilifi boti li bego hilune li'ahana yabe. 40Ya lilete naga'i moneto ketana naga ilete he'migo hefunugu limito boti li tokolo hu'ehina ho hepulu tu he'migo hefunugu nolimigo moneko kumu ana botimofihi le'mo fotogo hago nobina naga'i gulu ho he'mi'ahana. Ya hilete botimofihi golaga'agati habafaha noha'a li putu tago habafahuba enubulogago enele'mo tufoto nobigo hege nagami kehetoga be gelete bi'ahana yabe. 41Ya hana ana boti'aniuba efato buto tiloto ilepa hoto ule'ale hu'ehina. To hege nagami'uba amuya bilito tito huto botimofihi ana'ina'a mone li gofa ho'ehina yabe.

42Ya'mu lite ana botigu minana nagalugu bona'i koli mefele'ehinogo enoho fili su halune lite gimi bomagi li'ahana. 43Ya hago gimi bomagi kaba'aniuba Poluhi le'mo buto bito he'malube'mu ekesa keheliloto lenali enoho mefililo luto laga hu epolo'ehina. To asaga bona'i nagamilugu nogosa ite keheli'ahana'a nukuma nete kehetoga kohe tete bilo, luto enoho lifi'ehina. 44To luga'a bona'i botilo li pili kete nehinogo itebe gili nehina'alo li'ehinogo hege nagami'uba lele'moto kehetoga bilibe lu'ehina. Ana suhi hilete asaga bona'i asaga'i bati hite kehetoga bu baga i'ahana yabe.

Copyright information for `BEF