Acts 28

Polu Molita hepato mino'ehina

Lali asaga'i bati huto kehetoga buloto keheluta ana hege nagamilugu ti'ehina metoga nehetutamofihi gi'a Molita yabe lite gi'a he'ahana yabe. Ya'mana hepato boana'magi hetofana hite lele'mo bati hi'ahana. To ko'i ilube'mu nohigo yasi higo logo gelete asaga'i lele'mete ana logolo laba hulago lota hu'ohuta yabe. Polu musa logo mone sa giloto moloto lito logogu he'migago ana logo sagu osifa'i mone nohinati logouba mukoho ligo fi gene toto limito Poluhi yanugu folo'ehina. Ana osifa'uba Poluhi yaha'alo heni kofigo ana hepato bona'magi be gelete ai lu emigo ai lu emigo ma lite li'ahana: Ma bomagita manauba bo mone ho fili'ehilina ni'ibe. Ai hege nagamilugu mefilinana nohibe. Ya hina bebe sana sipi felemouba minoba minoba mehilibe luto keheli'ehibe. Ya nelago Polu ana osifa'mo li fiki higo logogu buto lo filigo to ana osifa'uba Poluhi yaha'a mone heni getefe meho'ehina yabe. To Poluhi yaha'a lupe lupe bilifi lila to mele'isi limito melugu kalifi lite bulu'i helete yatama kana minana sibina mone mehu'ehina. Ya higo enali enekesa aku'i yigi fato melelete ma lite li'ahana: Ai felemo suhi mone fato'mofihi nohibe.

Ya'mana nagamilugu ti'ehina me'i kibina bo mone'mofihi gi'a Pubiliasi yabe luto mino'ehina bomofihi ai me'alo yabe. Ya'mana bouba ai noha'aluga lele'moto buto hetofana huto kaba hu letago ai nonugu nohi loegi monegi ko'ohuta yabe. Ya'mana kana'alo Pubiliasihi afo'afihi besigo si'alugati bila to gufa'a mukoho akoho ligo koloto mino'ehina. Polu ana bo aitoga buloto gufa'alo yahi lito nunumu hu etago besise'na'a su ho eto'ehina. Ai ya huto ye kolago babu bona'i ana ti'ehina metoga enebesigo mine'ahananamagi Polutoga ago ai ana huto enele'mo ye ko su ho'ehina yabe. 10 Ya'mu lite enali hetofana hite lele'mo bati hi'ahana. Alihi ana nagamilugu ti'ehina me'mofihi hepa'i he'mito bilune'mu nohunogo nose'nati su ho'ehina nona'a babu lite botigu li bai te lete'ahana yabe.

Polu Lomu hepato neheti'ehina

11 Ya'mana nagamilugu ti'ehina me'mo ikahi loegi monegi minoloto alihi boti mone sipi habafahi lina kana'alo oto mana ti'ehina melugu ni'ina botigu tilenogo lele'moto bu'ehina. To ya'mana boti Alekasatilia hepatoti yabe. To ana botimofihi sopa'aga gi'a Felemofihi Pana'a Loemale'i Yabe lite fayahi ge'ahana. 12 To lali Sailakuyu nohi hepato nehetilototi ana hepato yege loegi monegi mino'ohuta. 13 To ana hepa'i he'miloto lali i bego huto Legiu nohi hepato nehetito nohi mone'isi koloto eteka'a yofo kegi'ati habahuba li hapi fito botiti hago loe yupahi bulago lali Puteoli hepato neheti'ohuta yabe. 14 Ya'mana hepato Hu'mamofitoga komopa'ani emite neminana bona'i bu enogonogo ana bona'magi lali hiti salele mone minete bilabe lite lele'mo mele'ahana. To ya huloto Lomu hepato o'ohuta yabe. 15 To Lomu hepato ligibo lagabomagi ya hite neabe lite lali kumu lana'a akeheli'ahana. To enali lali'i legeba hite eba eba hite Apiasi Maketi hepato Kalina Nohi Loegi Monegi ni'inalo nehetilete lali'i lebe tigi'ahana. Ya hago Polu bu enogoloto gufa'agu laga gofa higo Hu'mamofihi gelo bi emi'ehina yabe.

Polu Lomu hepato mono ka lu yege ho'ehina

16 Lomu hepato nehetulenogo Poluhi ai'asigo gimi bo moneuba kaba hu etenogo minalibe luto Lomu gamani bouba lu'ehina yabe.

17 Alihi nohi loegi monegi koloto Polu ana hepato Yuta kaba bona'i kehe i tulu hu'ehina. Ana bona'i enali ete li nupa hilago ma luto lu epi'ehina: Nigibo nagabose. Lali bonati enele'mo sibina hula to tatatigitogati lilata nohuta suhati mone li sibina mehu'ohunamo ni'inamo Yelusale hepalugu nagalugu nele'me melelete Lomu bona'magi enayanugu nele'mo mele'ahabe. 18 Enali Lomu gamanimagi ka foya nimite kaga'ni kehelina nani ka foipa'a lu sibina mehu'ohugo noho fililana kaga'mu sa sa hana meni'igo he'mi netalana'mu yabe. 19 To nani bona'nimagihi enifisa mei'ohunamo ni'inaya Yuta bona'magi ya'mana kaga pelesa ibe. Ya'mu luto kapomu'i sa sa huloto Sisau gihiti bo sipi'auba kaga'ni kehelilibe luto kehe i'ohube. 20 To ya'ma kagasi'mu luto lenali'i kehe i nupa huto lu nolepube. Nani lenali'i bu lenogoto kaga lu lepilube luto yabe. To asaga lali Isilaeli bona'magita geba nohutanamofihi ya'ma Hu'mau le'mo ho ti'ehina bo, Mesiahi nani komopa'ni emito nohuto geba nohube. Ya'mana'mu luto ma seni naga'uba yatai nayanugu ma ina i'ehibe. 21 Ya luto ligo enali ma lite lu emi'ahana: Kai kumu lite Yutia kegi'ati fayahi mone gete lu melimi'ahabe. To Yutia kegi'ati bonati mone'amagi ete kai kumu ya huto hu'ehibe lite to sibina hu'ehibe lite yana kaga mone lu melimi'ahabe. 22 Ya hu'ehina kai kabagakaguti lu hokolo huto lu limilata kaga lali kehelilune. Hena'mugope asaga boana'magi enabagaguti kehelutamo ya hite ya'ma naga'magi loko hite fato nehabe lite kaga foipa'a lana'asigo nokeheluta yabe.

23 To enali kana mone melelete ana kana'alo babu bona'i ete Polu nohina nonugu li nupa hi'ahana. Etehi hapi fito Polu kaga hapa hapa'a lu epiba lu epiba huto nohigo buto yege limi foloto sinihi gi'ehina. To ai ana huto Hu'mamofihi Kapo'amu kaga'a le'mo bati huto lu epi'ehina. To ai kaga koyapa'i lu huto huse bomagi hiti to Moseu hiti fayahi keye'ahanamofihi lu yege ho epi'ehina. To ya'ma kaga'atu enele'mo amuya moloto komopa'ani li keta mehuse hinogo Yesutoga komopa'ani emite minalabe luto lu'ehina yabe. 24 Luga'a bona'magi ya luto lu epina kaga keheli komopa'anigu nemalago to luga'amagi keheliya kalesa hi'ahana yabe. 25 Enali'ani fato fato enegekesa yigilete bula ola hilune'mu nehago Polu kaga mone ma luto lu epi'ehina: Tatatifihi Aisaiyahi kaga lu yege holata bomofihi bagalo Sikalafu'uba ma'naka luto ma luto lu emi'ehina yabe:

26 
  • Ya'ma boana'magitoga kai buto
  • ma luto lu epibo:
  • Lenali kaga'a keheli kehelilanaya
  • ana kagamofihi hapa'a
  • keheli hokolo mehilana'mu yabe.
  • Lenali bu goba bu goba hilanaya
  • ana bu galanamofihi hapa'a
  • mekehelilana'mu yabe.
  • Ya luto lu epibo.
  • To hena'mube?
27 
  • Ya'ma boana'magi
  • komopa'ani hekini loto ni'igo
  • enegekesa'aniuba kaga kehelilina'mu
  • kosele'a nohago
  • enali enegekesa'ani
  • i hekini lete nehabe.
  • To henabe lutobe?
  • Enali enubu'anigu bu gete kehelite
  • to enegekesagu kaga binogo kehelite
  • to komopa'anigu
  • nani kaga keheli fe lite hilete'ani
  • komopa'ani i gelehe hite
  • nanitoga elenogomo
  • enele'mo bati hiluna'mu yabe.
  • Ya hu epalalunaya
  • enali'i anana hu lalibe lite
  • enubu fili kete,
  • enegekesa hekini lete,
  • to komopa'ani i sepa ite nehanagihe.
  • Hu'mau ya luto lu'ehina yabe.
  • 28 To Polu mone kaga hiti lu epi'ehina: Yatai nani Hu'mau enubuto bilata kaga'a lu nimi'ohuto fegutoga bona'i nehanalo noho lifi'ehinagi enali ana ka lamana'a kehelilune'mu nehabe. 29 Polu kaga alu epi su holago Yuta bona'i bula ola hi'ahana. Enali'ani bite ai bugu figo ai bugu figo hite kenasabo bibu bibu hi'ahana yabe.

    30 Polu ai'a mina fi'ehina nonugu kufu loemo minoto boana'i aitoga elata hana koyone kaga lu epito enebe tigito enele'mo hu'ehina. 31 Ai Hu'mamofihi kapo'amofihi kaga'a lu yege ho epito Sipi Bo Yesu Kilisitohi kaga'a enelepito amuya kaga lu epilata higo bo moneuba kaga'a mone i laga mehu'ehigo Polu anaga mino'ehina yabe.

    Copyright information for `BEF